جیهاد محەمەد : ترید أرنب خذ أرنب ، ترید غزال خذ أرنب .

ئەمە قسە و وتەی یەکەم و کۆتای پارتییە !. پارتی بەم زمانە فێڵاوییە و هەندێک جاریش بە ئاشکرا و بێ سڵەمینەوە لە سەر زاری مامۆستا ئیمینکی وتەبێژەکەیانەوە و ، هەندێک لە سەرکردەکانییانەوە ، ئەم ( بەزەیی و میهرەبانییە ) دەنوێنن بەرامبەر بە حیزبە سیاسییەکانی کوردستان و ئۆپۆزسوێن و هەموو دەنگە ناڕازییەکان ، تا کەس گلەیی نەکات لە دوا رۆژدا و نەڵێت کوا بەشمان ؟!  ئەوەتا بە ئاشکرا دەڵێن ، فەرموون ، کەروێشکتان دەوێت ؟، ئەوە کەروێشک . ئاسکیشتان دەوێت ؟ ئەوە کەروێشک . گلەەیی نەکەن و ،  پێمان نەڵێن دیموکراتییەت نییە لە کوردستاندا !. ئەوەتا خۆتان بیستتان ، جەنابی سەرۆک ڕایگەیاند ئەم دیموکراتییەتەی پارتی و سەرۆک کە هەموو دنیا پێی سەرسامە گەڕانەوەی نییە ، چوونکە پارتی ڕێز لە میللەت دەگرێت و ئەگەر ئێوە بەو کەروێشکە ڕازی نەبن کە خوا و ئێمە بۆمان بڕیونەتەوە ، ئەوە ئێمە ڕیگەیەکی تر دەگرینەبەر !

مامۆستا ئیمنکی ، ئەمجارەش ڕایگەیاندەوە و ، تۆپەکەی هەڵدایەوە ناو گۆڕەپانی حیزبە سیاسییەکان و ئۆپۆزسوێن و یەکێتی هاوپەیمانەکەشی ، تا باش بزانن کە شکاندنی ڕای پارتی و درێژنەکردنەوەی ولایەتی سەرۆکەکەیان بۆ جاری سێیەم ، گوناحێکی گەورەیە و ، ئەوە مەحاڵە لای پارتی قبوڵ بکرێت !.

ئەم بێمنەتیی و هەرشەیەیی مامۆستا ئیمنکی بە ناوی پارتییەوە ، هەموو لێدوان و قسە و هەوڵ و خەباتی هەموو خەڵکی کوردستان و حیزبە سیاسییەکان بۆ سەروەریی یاسا و فەراهەمکردنی دیموکراتیی و هەڵبژرادنێکی بێخەوش و دوور لە ساختەکاریی خستەوە ژێر پرسیارەوە!، ئەم قسەیە ئەوەمان بۆ پشتڕاستدەکاتەوە کە سەرۆکی پارتی کاتی خۆی کە وتی : ئێمە بە خوێن هاتووین و بە خوێنیش دەڕۆین! بەردەوامە لەسەر قسەی خۆی . ئەم قسەیە پشتڕاستکردنەوەی ڕای هەموو ئەو چاودێرە سیاسییانەیە کە لە مینتاڵیتی ئەم پارتە و سەرۆکایەتییەکەیان وا تێگەیشوتن ، کە یان دەبێت ئەمان سەرۆک بن یان کاولکارییەک دروستدەکەن !.

دەبێت ئەو ڕێگەیە کام ڕێگە بێت کە مامۆستا ئیمنکی بە هەرشەوە دەڵێت ، دەیگرینە بەر؟!. دەبێت لەمەودوا هەموومان دەستەودۆعا بوەستین و بپارێینەوە کە ئەو ڕێگەیە ، ڕێگەی شەر و پەلاماردان و براکوژی نەبێت . ئاخر پیسترین و ناشیرینترین شتێک کە کرابێت لە نێوان حیزبە سیاسییەکاندا شەڕە ناوخۆییەکان بووە . خوێنڕشتنی خەڵکی ستەمدیدەی کوردستان بووە . خراپترین بیرکردنەو ، بیرکردنەوەیە لە شەر و پەلاماردان و خوێنڕشتن . پارتی ، باش ئەوە دەزانێت کە شەر ئەوەندە نەخوازراوە کە رەنگە خەڵکی بۆ خۆپاراستن لەو شەڕە نەگریسە بڵێن ، پارتی چیی دەوێت با بیکات و بیبات و داگیرییبکات و بەس شەرێک نەخولقێنن ، بەس ئەمجارەش ماڵمان وێران نەکەنەوە ، کوڕە گەنجەکانمان نەکوژرێن و کچە سەربەرزەکانمان ئەتک نەکرێن . جارێکیتر نبینەوە بە جێگەی گاڵتە و پێکەنینی دووژمن و ناحەزانی ئەم گەلە ستەمدیدەیە ، جارێکتری جەرگی دایکەکان هەڵنەقرچێننەوە ، جارێکیتر ئەوەندەی تر سەر و ڕیشی باوکەکان سپی نەکەن و فرمێسک لە چاوە کزەکانییان نەهێنن . جارێکیتر پۆشاکی ڕەش هەڵنەکێشنەوە لەبەری هەزاران خوشکی برا کوژرا و باوک کوژراو ، جارێکیتر خەڵکی دەڤەری زەرد و دەڤەری سەوز ئاوارە نەکرێنەوە . جارێکیتر بە سەدان گەنج لە ترسی شەری براکوژی ئاوارە و سەرگەردانی ئەم وڵات و ئەو وڵات نەبنەوە . جارێکیتر پێمان نەڵێنەوە، ئەم گەلە خۆ خۆرن ، ناتوانن خۆیان رێکبخەن، خوێڕێژ و شەڕەنگێزن .

من ڕام وایە ، ئەو ڕایەی کە دژ بە شەڕە ، ڕایەکی یەجگار مرۆییانەیە . پێویستە ڕێزیی لێبگیرێت ، پێویستە بە جۆرێک بەرجەستەبکرێت کە بکرێت بە پرۆژەیەکی مرۆییانەی پێشکەوتنخوازیی و ئاشتەواتیی ناو کۆمەڵگادا . کەچی بە داخەوە ، پارتی کاری لەسەر دەکات و دەیکات بە زەخیررەیەک بۆ دەستکەوەتی سیاسیی خۆی ، وەک ترسێک لە دڵی خەڵکییدا چاویلێدەکات و بەکاریی دەهێنیت بۆ بەرژەوەندییەکانی خۆی . بەڵام حەق وایە پارتی و سەرکردایەتییەکەی ئەوە باشبزانن ، ئەمڕۆ خەڵكانێکی زۆر هوشیار هەیە لە کوردستاندا ، کە چارەنووسی میللەتێک ڕادەستی ئەو جۆرە هەرەشانە ناکەن و خۆشیان دەپارێزن لە شەر و برا کوژی ، خەڵکی هوشیار نە شەڕ دەکات ، نە خۆشی ڕادەستی هەرشە نالۆژییک و نامرۆییەکان دەکات .

خەڵک ئەمڕۆ ڕازینییە لەسەر ئەم پرسانە :

• ڕازینییە بە نایاسایی کاندیدکردنەوەی سەرۆکی هەرێم .

• ڕازینییە بە نەگەڕانەوەی دەستور بۆ پەرلەمان و هەموارنەکردنەوەی .

• ڕازینییە دەستور بە جۆرێک تێپەرێنرێت کە سەرۆکایەتیی هەتا هەتایە بۆ مەسعود بارزانی بێت … خەڵک لەسەر هەموو ئەمانە ناڕازییە و ئامادەش نییە خوێنی دۆست و ئەندامێکی پارتی یا هەرچ کەسێکی تر بڕژێنرێ ت. ئامادە نییە لەسەر بنەمای ڕق و کینە و یەکتریی سڕیینەوە ململانێکان یەکالییبکاتەوە . ئیتر نازانم ئەم لۆژیکە سەردەمیانەیەیی خەڵک بە لۆژیکی هەڕەشەوگوڕەشە بۆ وەڵام بدرێتەوە!.

ئەگەر پارتی شەڕی دەوێت ، بۆمان هەیە بپرسین ، شەر لەگەڵ کێ ؟! لەگەڵ خەڵکێکی ستەمدیدەی سڤیل و هوشیاری وا کە دەخوازێت هەموو ئەم پێوەندییانە بە یاسا و رێسایەکی سەردەمییانە و دیموکراتییانە سنوری بۆ دابنرێت و رێکبخرێت :ـ

• پێوەندییەکانی هەموو حیزبەکان لەگەڵ یەکتری .

• پێوەندی ‌حیزبەکان بە حکومەتەوە .

• پێوەندی حیزبەکان بە خەڵکەوە .

• پێوەندی حکومەت بە خەڵکەوە .

• پێوەندی دەسەڵاتەکانی یاسایی و جێبەجێکاریی و دادوەریی و دەسەلاتی چوارەم(ڕاگەیاندن) لەگەڵ یەکترییدا … هتد .

• خەڵکی دەخوازێت چیتر ئەم میللەتە ستەمدیدەیە لە دەرەوەی مێژوودا نەمێنێتەوە و بگات بە کاروانی میللەتانی پێشکەوتووی دنیا.

• سیستەمێکی حکومڕانیی سەردەمییانەی داڕێژراو بە فەلسەفەیەکی دیموکراتی کە ئازادییە مرۆیی و ئابووریی و سیاسیی و فەرهەنگییەکان بووبیت بە پایەگەلێکی چەسپییو بۆی. وەک :ـ ئازادی ڕادەبڕین، ئازادی لە هەڵبژاردندا، ئازادی دەنگدان بۆ هەموو کەس ، ئازادی تاکگەرایی و چوونە دەرەوەی تاک لە ژێر کولتووری ترادسوێنە ڕزییوەکاندا ، ئازادی دین و ئاینزایی و باوەڕەکان ، ئازادی حیزبایەتیکردن و سیاسەتکردن، ئازادی بازرگانیکردن و کارکردن و هەڵبژاردنی ڕێگەی ژیان، ئازادی ژن و ، جیانەکردنەوەی لە پیاو،  لەسەر بنەمای پیاوسالاریی و باوک سالاریی و یاسا ئاسمانیی و دینیی و کولتوورە بەسەرچووەکان ، ئازادی خوێند و هەڵبژاردنی جۆری خوێندن ، ئازادی ڕاگەیاندن و قۆرخنەکردنی لە ژێر سێبەری حیزبایەتییدا، ئازادی زانیاریی وەرگرتن و ڕوونی لە کاریی حکومیی و کارگێڕییدا، بە تایبەتی ئازادی پێدان و وەرگرتنی زانیارییەکان بۆ رۆژانمەنووسان و ڕاگەیاندنەکان کارێکی پیویستە، ئازادی ڕۆژنامە نووسان و ڕاگەیاندنکاریی و رۆژنامەگەریی و، رێنەگرتنلێییان لە ڕووماڵکردنی هەرچ ڕووداو و کۆڕ و کۆبوونەوەیەکی سیاسیی و کۆمەڵایەتیی و فەرهەنگییدا. ئازادی ڕەخنەگرتن و قسەکردن لەسەر هەرچ ناهەمواریی و نایاساییەک بە خوێندنەوەی تایەبەتی ڕەخنەگر و قسەکەر، ئازادی کۆڕ و کۆبوونەوەکان و خۆ ڕیکخستن و خۆپیشاندان و مانگرتن و لێدوان، ئازادی ڕێکخراوەکانی کۆمەڵگای شارستانیی و مرۆیی کە ڕووخسارێکی جوانی هەرچ کۆمەڵگایەکە لە کۆمەڵگا شارستانییەکان .

لە لایەکیتر خەڵکی دەخوازێت :

• سیستەمێکی پەروەردەیی و پێداگۆگیی هاوچەرخی و دیموکراتیی هەبێت .

• سیستەمێکی تەندروستیی زانستییانە و مرۆڤدۆستانەی هەبێت. ئەم دوو بوارەی ژیان بنەمایەکی ستراتیژیی هاوچەرخە بۆ درووستکردنی کۆمەڵگایەکی شارستانیی و عەقڵکراوە و تەندرووست لە زۆر ڕووەوە .

• سیستەمێکی ئابووریی دادپەروەرانە و بەرهەمهێنەری گەشەسەندووی هەبێت،کە ژیانێکی ئاسودە بۆ تاکەکانی کۆمەڵگا مسۆگەربکات .

• سیستەمێکی عاقلانیی و مەعریفییانەی بەرجەستەکراو لە زنکۆکاندا هەبێت، تا زەوینەی داهێنان و توانا گەورەکانی تاکەکان خۆشبکرێت و کار ئاسانییان بۆ بکرێت .

• سیستەمی دیبلۆماسیی لەگەڵ حکومەت و میللەتانی دنیادا لەسەر بنەمایەک هەڵنرابێت کە بەرژەوەندی خەڵکی گشتیی و چوونە پێشەوە بەرهەمبهێنێت، نەک لەسەر بنەمای پێگەی خێل و بنەماڵە و ئەم حیزب و ئەو حیزب .

• سیستەمی شکۆمەندیی و ڕێزی مرۆڤەکان لە ئاستێکی بەرزدا بەرێوەبچێت .

• پێوەندییە کۆمەڵایەتییەکان و ململانێ چینایەتییەکان رێکبخرێت .

• سیستەمیی دادپەروەیی و دادوەریی وا هەبێت کە هاوڵاتی وەک هاوڵاتیی بخوێنێتەوە و کەس لە پلەی (هاوڵاتی) بەرزتر نەبێت لە بەرامبەر یاسادا و، لە هیچ بوارێک لە بوارەکانی ژیاندا، جگە لە پلەی شارەزایی و تایبەتمەندێتیی کە لە جێگەی شییاوی خۆیاندا دانبرێن و سوودییان لێوەربگیریت .

• سیستەمی ئاسایشیی نەتەوەیی سەربەخۆبێت و سەر و ماڵی خەڵکی بپارێزێت لە کارەسات و تاوانەکانی ناوخۆیی و، وڵاتپارێز و میللەت پارێزبێت لە تاوان و هەڕەشە و ترسە دەرەکییەکان .

• سیستەمێکی بیرکەرەوەی سیاسییانەی عاقڵانە لە تێپەڕاندنی ئەم قۆناغە ناهەموارەی هەموو گەلی کورد لە هەر چوار پارچەکەی کوردستاندا، لە سەر بنەمای پێکەوە ژیان و سەپاندنی مافی دیارییکردنی چارەنووسی هەرچ گەل و نەتەوەیەک . کە لە ڕاستییدا لەبارتریین و باشتریین زەوینەی بۆ سازبووە ، بۆیە پێویستە بیرکردنەوەی سیاسیی کوردیش لەو ئاستەدابێت تا ئەم دەرفەتە زێڕینە لە دەستنەدرێت .

من ڕام وایە، کە پارتی بە تایبەتیی و گەلی کورد بە گشتی، زیانێکی گەورە دەکات لەو چاو سورکردنەوە و هەڕەشەوگوڕەشانە، لەو خۆ سەپاندن و، هەوڵدانانەی کە پارتی دەیدات، بۆ کاندیدکردنەوەی سەرۆکی هەرێم بۆ جاری سێییەم بە زۆر و لە دەرەوەی یاسا. باشتریین ڕێگە بۆ چارەسەرکردنی کێشەکان کە بەرژەوەندی گەل و نەتەوە و هەموو حیزبە سیاسییەکان و پارتیشی تێدایە، ئەوەیە کە هەموومان بگەڕێنەوە بۆ لۆژیکی هەڵبژاردنێکی بێخەوش و دوور لە ساختەکاریی ، بۆ پەیوەستبوون بە یاساوە، بۆ دیموکراتییەت ، بۆ ڕێزگرتن لە ڕای هەموو حیزبەکان و رێکەوتنی سیاسییانە لە کاتی جیاوازییاندا لەسەر بنەمای بەرژەوەندیی گشتیی میللەت ، دوا جار بۆ بە هەند وەرگرتنیی هەموو ئەو ناڕەزایەتییانەی کە لای ئۆپۆزسوێن و خەڵکی گشتییەوە دروستبووە لەسەر ئەم عەقڵییەت و سیستەمی بەرێوەبردنەی ئێستای کوردستان .

نەرویج  – ٦/٥/٢٠١٣

 1,140 جار بینــراوە لەڕەهێڵپۆست

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies