دکتۆر محەمەدئەمین عەلی : سەرۆک و پرسى سەرۆکایەتى بەعەقڵیەتى پاش زەبر .

بەشى یەکەم

لەزنجیرە نووسینى هەموومان نەخۆشین ـ کۆنیشانەى عەقڵیەتى پاش زەبر .

سەرۆک و پرسى سەرۆکایەتى بەعەقڵیەتى پاش زەبر بەشێکى ترە لەزنجیرە نووسینى هەموومان نەخۆشین  ( کۆنیشانەى پاش زەبر ) ، لەنوسینەکەدا ناوى کەسایەتیەکانم نەبردووە چونکە بابەتەکە لەسەر عەقڵیەتى سەرۆک و سەرکردە دەستڕۆیشتووەکانە لەکۆمەڵگاى پاش زەبردا ، بەو هیوایەى ڕاستیەکى زانستی بخاتە ڕوو وە لە داهاتویەکى نزیک یادوور لێکەوتەیەکى کاریگەرى پۆزەتیڤانە بهێنیتە ئاراوە ، خۆیان لەعەقڵیەتى پاش زەبر ڕزگاربکەن و بچنە ڕێزبەندى ئەو سەرۆکانەى ، کە لاى گەلەکانیان نەمرن .

سەرەڕاى ئەوەى کۆکەڵگاى کوردى لەدێر زەمانەوە گیرۆدەى عەقڵیەت و هزرى نەزانى داگیرکەرە یەک لەدواى یەکەکان و سیاسەتەچەوتەکانى بووە ، بەڵام لە هەمانکات سەرۆک و سەرکردەى ( میرنشین وخێل و ڕێکخراو پارت و بزوتنەوە  ڕزگاریخوازەکان ) ى کورد بڕوایان بە پەروەردەکردنى هزرو عەقڵیەتى کۆمەڵگا نەبووە ، نەک لەبەرئەوەى خۆیان هەڵگرى هەمان هزر و عەقڵیەتى نەزانى داگیرکەرەکان بوون ، بەڵکو دەرچەى عەقڵیەتێکى پاش زەبربوون  بەئیمتیاز ، مەوداى عەقڵیەت و خەبات و بیروبۆچونیان لەبەرژەوەندى تایبەت بەخۆیان و بنەماڵەو خێڵەکانیان تێنەپەریوە بۆ بەرژەوەندى گشتى و خزمەتکردنى نەتەوە ومرۆڤایەتى   . 

 کاتێک بونەتە خاوەنى نیمچە دەسەڵاتێکى بچوکى ناوچەیى و هۆشیان بەخۆیاندا هاتۆتەوە ، لەترسى لەدەستنەدانى بەرژەوەندیە تەسکە تایبەتیەکانى خۆیان و بنەماڵەکانیان پاشەکشێیان  لە کۆمەڵگاو خەلک کردووە ، دواتر هەڵسەنگاندنى زانستى و لۆجیکى و عەقڵانیان لەدەستداوە و متمانەی کۆمەڵگاکەیان دۆڕاندووە ، دەرئەنجام نەک دورکەوتوونەتەوە لەوخەباتەى پێشووى خۆیان دژ بە داگیرکەر بەڵکو بوون بە نۆکەرى بێگانەو خزمەتى سیاسەتە چەوتەکانیان کردوون ، لەم ڕوانگەیەوە بەهیچ شێوەیەک کاریان لەسەر عەقڵیەت و هزرى کۆمەڵگا نەکردووە ، بەپێچەوانەوە خەڵکیان گەوجاندووە لەپێناو مانەوەى بەرژەوەندیە تایبەتەکان ، بگرە ئەوەى ئەم سەرۆک و سەرکردە و شۆڕشگێرە بەڕێزانە کردویانەو دەیکەن هیچى لەداگیرکەرە دیکتاتۆرەکانى پیشخۆیان کەمتر نییە ، ئەگەر بڵیین ڕووى دوژمن و دیکتاتۆرەکانى پیش خۆیان سپى کردووە زیادەڕۆیى ( مبالغە ) نییە ! .

کاتیک بیرەوەریەکانى گۆڵدا مائیرى سەرۆک وەزیرانى ئیسرائیلم خوێندەوە و کەسایەتیە بیرمەندو سیاسەتمەدارەکانى وەک ( غاندى ، ماندیلا ، مارتن کینگ لوسەر ، جۆرج واشنتن ، وینستۆن تشرتل ، ماو تسى تونغ ، تشى جیڤارا وجۆن کیندى ) ـم هاتەوە یاد بەزەیم بەعەقڵیەتى سەرۆکە بێشومارەکانى وڵاتەکەم هاتەوە  .

هەڵبەتە سەروکە بێشومارو بەپرسەباڵاکانى وڵاتەکەم وەک خۆمان دەرچەى کۆمەڵگایەکى پاش زەبرن  بەڵام عەقڵیەتیان هەمان عەقڵیەتى پاش زەبرەو نەگۆڕاوە  ؟  هەموویان هەڵگرى هەمان عەقڵیەت و هزرو فیکرن ، زیاد لەپێویست هەستیارن بەرامبەر بەبەرژەوەندى خۆیان بنەماڵەو حیزبەکانیان ، کلتورى زیادەڕۆیى و ئەوپەڕگیرى زاڵە بەسەر دەروون و پیروبۆچوون و هەڵسوکەوتیان ، دوور لە لۆجیک و زانست و عەقڵانیەت هەڵسەنگاندن بۆ چەمکەکانى ژیان دەکەن ، کاتێک بابەتێک ئەوروژێنیت وەک دۆستێکى نزیک یاخود دوژمنێک لەقەڵەم ئەدرێت ، لەنیوەند ئەو دووهەڵبژاردەیە هیچیتر شک نابەن ، خۆ بە کەمزان و میهرەبان بەرامبەر بەغەیرە و خۆبەزلزان و دڵڕەق بەرامبەر بەهاونیشتمان ، نەمانى متمانە بەکۆمەڵگاو لەدەستدانى بڕوا بەدەستاودەستکردنى دەسەڵات ، دواجار بەسەربردنى ژیان لەترس و دڵەڕاوکێ لەبرى چێژ لێوەەرگرتن   .

گۆڵدامائێرى سەرۆک وەزیرانى ئیسرائیل لەپێناو چەسپاندنى حکومەتەکەى کاتیک  وەزیرى کار بووە ماوەیەکى زۆر لەژورێکى سەرباندا ژیانى ( غرفە فوق السطوح ) بەسەربردووە ، لەژیانیدا دووجار چۆتە ولایەتەیەکگرتووەکانى ئەمەیکا بۆ سواڵ و دەرۆزەو کۆکردنەوەى کۆمەک بێ ئەوەى پولێک لەو پارەیە چوبێتە گیرفانى خۆی و کەسووکارو حیزبەکەى ، نەک هەر ئەو بەڵکو زۆربەى  سیاسەتمەدارو سەرۆکە دڵسۆزەکانى میللەتان وەک غاندى ، ئەتاتورک ، ئیمام خومەینى و … هتد ، هیچیان لەدواى خۆیان بۆ کەسوکارو بنەماڵە بەجێ نەهێشتووە بێجگە لەخەزێنەیەک لەبیروباوەڕو نیشتمانپەروەرى و خۆشەویستی  بۆ میللەت ، کەچى سەرۆکەکانى ئێمە بەپێچەوانەوە بێجگە لە سامان و دەسەڵات بۆ نەوەکانیان هیچیتر بۆ میللەت بەجێناهێڵن ، هەربۆیە ئەستەمە ببینە خاوەنى شارستانى و حکومەتى نیشتمانى خۆمان  .

سەبارەت بەنەبوونى متمانەى سەرۆک بەدامودەزگاو دامەزراوە ناوخۆییەکان  ، خۆ بە زلزان بەرامبەر بەهاوڵاتى ، بچوک وخۆبەکەمزان  بەرامبەر بەغەیرە  ، سەرۆکە نیشتمان پەروەرو دڵسۆزەکانى وڵاتەم  بۆ چارەسەرى هەڵامەتێک ڕوولەدەرەوەى وڵات ئەکەن ! ، کاتێک سەرۆکى فەرەنسا شیراک نەخۆش کەوت پێویستى بەچارەسەرێکى تایبەت بوو کە لەو ساتەوەختەدا لەفەرەنسا نەدەکرا ، ئامۆژگاریان کرد بچێتە ولایەتە یەکگرتووەکانى ئەمەریکا ، بەڵام لەبەر ئەوەى خاوەنى شکۆمەندى و هزرو عەقڵیەتێکى تەندروستى سیاسى نیشتمان پەروەرەو مرۆڤدۆست بوو وەمتمانەى زیاد لەپێویست بەهاونیشتمانى خۆى بوو ،  دانى بەخۆیدا گرت تائەو ساتەى ئەو جۆرە چارەسەرە  گەیشە فەرەنساوە چارەسەریان بۆکرد ، کەلێى دەپرسن بۆنارواتە وڵایەتەیەگرتووەکانى ئەمەریکا بۆ چارەسەرکردن لەوەڵامدا ئەڵێ من ئەمەوێ لەژێر دەستى پزیشکێکى فەرەنسیدا گیان لەدەست بدەم نەک لەژێردەستى پزیشکێکى بێگانە ، ئەمەیە عەقڵیەتى سەرۆک و سەرکردەى سیاسەتمەدارو نیشتمان بەرامبەر بەهاونیشتمانى خۆى نەک عەقڵیەتى سەرۆکە بێشومارەکانى وڵاتەکەم ، ئەم نەبوونى متمانەیە بووە بەکلتورو بەرپرسەکانى خوارەوەشى گرتۆتەوە بۆ نموونە بەرپرسەکانى تەندروستى بۆ چارەسە ڕوولەدەرەوەى دامەزراوەکانى خۆیان دەکەن !   .

کلیک بکەرە سەر سمبولەکانی خوارەوەو ، ئەم بابەتە ئاشنا بکە بە هاوڕێکانت

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies