ئاکۆ برایم : موچە بۆ نى یە ؟ .

ساڵانى نەوەدەکان بەهۆى ئابڵوقەو فشارى رژێم و ، نائارامى و بارگرژى و، جەور وستەمى دوژمنانى دەرەکى و ، نەبوونى سەرچاوەى داهات و ژێرخانێکى ئابورى تۆکمە ، حکومەت زۆر بەزەحمەت دەیتوانى مووچەى فەرمانبەران دابین بکات ، جارى وا هەبوو بە سێ مانگ و پتریش و مووچە نەدەدرا ، بەڵام سەرجەم فەرمانبەران رەچاوى بارودۆخ و رەوشەکەیان دەکرد ، هەروەها بەقەولى ئەوسا ساوایى و کەم ئەزمونى حکومەتیشیان لەبەرچاو دەگرت ، بۆیە سەربارى بارگرانى و چەندین ئابڵۆقە ، موچەخۆران کەلو پەلى ناو ماڵ و ، تەنانەت دەرگا وپێخەفى خۆیان دەفرۆشت ، بە دروشمى ( سەرى بەرز بۆ مووچە نەوى ناکەین ) روبەروى هەستیارترین و تاڵترین رۆژگار بوونەوە ، کەمترین نارەزایى و مانگرتنیان ئەنجامدا .

ئەبوایە حکومەت و دەسەڵاتداران ئەو وەفا و ئەمەک و لەخۆبوردوەى فەرمانبەرانیان لەبەر چاو بگرتایە و ، کە لەو کات و بارە ناهەموارەدا خاوەنى ئەو هەڵوێستە جوان ومەردانیە بوون ، بەهەموو شێوەیەک پاداشتى بدانایەتەوە ، کەچى بەداخەوە وانەکەوتوە ، بەشێوەیەکى دیکە پاداشت درانەوە ، ئەوەتا ئەمڕۆکە دەبینین ئێستا شوکر بۆخوا حکومەت بارى دارایى و وەزعى ئابورى زۆر زۆر باشە ، خاوەنى چەندەها سەرچاوەى داهاتە ، جگەلە بەشە بودجەى بەغدا ، بەڵام بەداخەوە هەمووساڵێک ئەم قەیران و نەبوونى مووچەیە سەرودڵمان دەگرێت ، بارى بژێوى و ژیانمان دژوار دەکات.

سەیرەکەى ئەوەیە نەئەندام پەرلەمان نەحکومەت نە دارایى بەتەنگ ئەو گرفتەوە نین وبیر لەرێگە چارە ناکەنەوە ، کە دڵنیام ساڵێکى دی و دوان سیان ودەى دیکەش وەکو کێشەى کارەبا و بەنزین سەرو دڵمان دەگرێت . بەبێ ئەوەى بیرێک لە چارەسەر و دەرباز بوون لەو قەیرانە بکەنەوە.

ئەم بێ موچەى و نەدارییە زیاتر بەرۆکى فەرمانبەرانى کەم مووچە و بێ پلەى گرتۆتەوە ، دەنا وەک تر بەڕێوەبەر و وەزیر و گزیر و ئەندامانى پەرلەمان بەباى خەیاڵیانا نایەت ، چونکە لەسەرێک مووچەکانیان هێندە بەرزە کە ئەگەر ساڵى چوار مووچەش وەرگرن سەرو زیادیانە ، لەسەرێکى دیکەوە بەشێوەی نەسریە یان هەر رێگایەکى دیکە بێت شتێکیان لەحکومەت و ئەملا و لا دەست دەکەوێت . ئەوەى کەدەمێنێتەوە فەرمانبەرانى وەکو ئێمەن ، کە سەرچاوەى داهات و بژێویمان تەنها هەر ئەوبڕە مووچەیەیە ، ئەوەشمان پێ رەوانابینین؟

ئەم بێ موچەى و گیرفان خاڵیەى فەرمانبەران ، جگە لەوەى کاریکردۆتە سەر ناخ و دەروونیان، توڕەیى و نیگەرانى و پەستی بەروویانەوە دیارە ، راستەوخۆ یان ناراستەوخۆ ، قسەو پلار ئەگرنە حکومەت، بەدواى خۆشیدا چەندین کێشەى کۆمەڵایەتى و پەشێوى وئاژاوەى ناوەتەوە ، چەندین جار بیستومانە کە خەڵکانێک لەتاو نەدارى و بار گرانى خۆیان کوشتوە. هەروابێتەوە ئەم یەک دوومانگە لەسەرئەو نەدارى و دواکەوتنى موچە، چەندین بەسەرهات و روداوى ناخۆشم بیستوە ، کەلەهەموویان ناخۆشتر و ناهەموارتر لێک هەڵوەشانى خێزان و جیابونەوە بووە ، کە هۆکارەکەشى هەژارى و بێ پارەیى بووە . زۆر فەرمانبەرى کرێچى دەناسم ، کە بەیانی هاتوە بۆدەوام ، بەچاو و قورگى پڕلەگریانەوە هاتوە ، کە پرسیارمان لێکردوە و ، ویستومانە هۆکارەکەى بزانینن ، یەکەو راست وتویەتى ئەمشەو لەسەر ئەوەى کرێکەمان نەداوە ، خاوەن خانوەکەمان بەخۆى چەند کەسێکەوە هاتوون ویستویانە شڕ وشتاڵمان فڕى بەنەدەرەوە ، تا بەتکا ورجاى دەرو دراوسێ ، چەند رۆژێک مۆڵەتیان داوین. لەوەش ناخۆشتر فەرمانبەرێکى کەم مووچە لەدایەنگەیەک کاردەکات ، رۆژانە دەبێت کرێى چوار پاس بدات بۆ هاتوچۆ ، مناڵەکەشى لە باخچەى ساوایانە ، باخچەى ساوایانیش لەبرى خواردنى مناڵان ، مانگانە بڕى 20 هەزار دینار لەهەر مناڵێک وەردەگرێت ، ئەوبەڕێزە موچەکەى زۆر کەمە و کرێچى و نەدارە، بۆیە ناتوانێت ئەو بڕە پارەیە بدات ، بۆیە بەواسیتە و تەکلیف باخچەکەى رازى بوون کە ئەو مناڵە لەو پارەیى ببەخشرێت ، بەمەرجێک کەسو کارى پێش نیوەرۆ بێن بەشوێندا ، ئەو مناڵە داماوە بۆى نەبێت لەوێ نان بخوات.

کەچى بەداخەوە ئەو بەڕێزە بەو ژیان کوللە مەرگیە قایلە ، بەڵام بەوەش وازى لێناهێنن ، ئەو و من و چەندین فەرمانبەرى تر بەهۆى هەڵەى بەشى ژمێریارى بەڕێوەبەرایەتیەکەمان کە پار ساڵ پاداشتێک کراین ، بەلام دەڵێن سەهوەو هەڵەى حسابى بووە لەو پاداشتەدا ، دەبێت بۆیان بگێڕینەوە ، بۆیە بڕیاردراوە مانگانە یەکى بڕێک پارە لەمووچەکانمان ببڕن. ئەوەش قیروسیا و رەزامان بەرەزاى خۆا. بەڕێوەبەر کە بەحساب وقسە کەبیستومانە و وایان پێ راگەیاندوین ، گەورە وبەرپرس و خەمخۆرى فەرمانبەرانە و ، لەخەمى ئەواندایە ، هەستاوە بەرێگەیەک مووچەى بۆ فەرمانبەرانى بەڕێوەبەرایەتى یەکەى خۆى مەیسەر کردوە ، بەشەکانى دیکەى سەربەڕێوەبەرایە تیەکەى کە چەند سەد فەرمانبەرێکن فەرامۆش و وەلا ناوە . کە جوانتر و خۆشتر دەبوو ، ئەوبەڕێزەش هاو خەمى ئێمە بوایە وبەو بڕیارە رازى نەبوایە ، هەوڵى بدایە مووچەى بۆتەواوى فەرمانبەران دابین بکردایە ، یان ئەگەر ئەوەشى بەلاوە نەکردەو قورس بوو ، دەیتوانى مووچەى پلە بەرزەکانى نەدایە و لەبرى ئەوە بیدایە بەو فەرمانبەر و کارمەندانەى کە مووچەکانیان کەمە و کەم ئەندام وکرێچین .

من تەنها ئەوەندە دەڵێم و هەمووش چاک دەزانین ، کەمرۆڤ برسى ونەدار و بێ پارەبوو ، لەپێناوى پەیداکردنى داهات ، پەنا دەباتە بەر زۆر کارى نەشیاو ، هەرلەدزى و ، راوەڕوت کوشتن و کارى تێکدەرانە،تا دەگاتە سەر فرۆشتنى ئابڕو وناموس. بۆیە تەمەننا دەکەم بەزوترین کات لەم میحنەت و نەهامەتیە رزگارمان بێت و دووچارى کارى وا نەشیاو نەخوازراو نەبین ، چونکە هەرتاوانێک بەو هۆیەوە روو بدات لەئەستۆى حکومەت و پارە بەدەستەکانە ، خوداش بەردار نى یە بۆ ئەو زوڵم و ناهەقیە. با ئاهو نزولەى ئەو هەزاران فەرمانبەر و بەش خوراوە نەتان گرێت ، نەتان بیستوە دەڵێن نزا و پاڕانەوى مەزوڵوم رەت ناکرێتەوە ، لەنێوان زوڵم لێکراو یەزدان دا هیچ پەردەیەک نامێنێت !!

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies