جیهاد موحەمەد : داڕوخانی ویژدانو میهرەبانیی دایکێکی عێراقی .
داڕوخانی ویژدانی مرۆڤەکان ، ترسناکتریین دیاردەیە لە ئێستایی کۆمەڵگای عێراقو کوردستاندا . لە کاتی بەرپابوونی جەنگو سزا سیاسییە نامرۆییەکانی وەک گەمارۆی ئابوورییو هەژارکردنو برسییکردنو بەرپاکردنی مەینەتی رەشوڕووتیی ، بە دەیان دیاردەی نامرۆییو بێویژدانییو داڕوخانو وێرانبوونی هەستو میهرەبانی مرۆڤەکانی لێدەکەوێتەوە .
دایک ، ئەو مرۆڤە میهرەبانەیە کە زەحمەتە بەهای میهرەبانییو خۆشەویستییو دڵسۆزیی پێوانەبکرێت ، مهیرەبانییو خۆشەویستی دایک بۆ کۆرپەو جگەرگۆشەکەی لە سەروو هەموو خۆشەویستییو میهرەبانییەکەوەیە . ١٥ی ئەم مانگە ” رۆژی جیهانی خێزان بوو ” زۆربەی لێکۆڵینەوەو چاوپێکەوتنو دیمانەکان لەگەڵ ئەوەی بە گشتی قسەیان لە سەر ئەوەبوو، کە خێزان کۆڵەکەی بنەڕەتیی پێکەو ژیانو پێکەوە هەڵکردنو خۆشەویستییو متمانەو بڕوایی کۆمەڵایەتی پێکدێنێت، ئەگەر ئەم کۆڵەکە بنەڕەتییە لەق بێت، یان لە گرێژەنە بچێت ، یان لاواز بێت ، ئەوە ترسێکی گەوەرەیە بۆ سەر ژیانی سەرجەم کۆمەڵگا ، واتا هیچ بەهاو نرخێکی دیکەی کۆمەڵایەتییو سیاسییو ئابوورییو فەرهەنگی هێندەی ئەم کۆڵەکەیە گرنگو بە بایەخ نییە ، لە هەمانکاتدا جەختیان لەسەر ئەوە دەکردەوە لە نێو ئەم ڕەهەندە گرنگو بە بایەخەشدا، ڕەهەندی دایکو دایکایەتیی یەجگار گرنگو بە بایەخە. هەموو توێژینەوە زانستییو کۆمەڵایەتییەکان ڕایان وایە، کە دایکو دایکایەتیی زۆر لە باوکو باوکایەتیی گرنگترە ، لە کاتێکدا کە باوکیش جەمسەرەکەی تری هاوکێشەکەیە لە خێزاندا، واتا بە بێ بوونی باوکیش هاوکێشەیی دروستبوونی خێزان پێکنایەت .
لەم لینکەدا (دایکێک) دەبینین دەستگیردەکرێت لەسەر ئەوەی مناڵەکەی دەفرۆشێت بە ٤ ملوێن دیناری عێراقی، جگە لە ڕاچڵەکاندنیی ویژدانی مرۆییمانو توڕەییمان، دەبێت پرسیارمان ئەوەبێت، ئەم داروخانی بێویژدانییو میهرەبانییەی دایکێک، کە بتوانێت مناڵەکەی خۆی بفرۆشێتو هەتا هەتایە نەیبینیتەوە دەبێت هۆکارەکەی چییبێت؟ پێش ئەوەی قسەیەک لەسەر هۆکارەکەی بکەم، بڕوا ناکەم هیچ ویژدانو بەهاو رەوشتێکی مرۆڤ لە جیهاندا هەبێت ئەمە قبوڵ بکات. جگە لەویژدانی داروخاوو نزمیی ئاستیی نا “مرۆڤبوون”ی ئەوانەی لە پێناوی بەرژەوەندییو چاوچنۆکیی پێگەی ماددییو مەعنەوەیی خۆیاندا لە ئاژاڵە دڕەندە برسییەکان دڕەندەتر دەبن دەرحەق بە مرۆڤ، بۆیە نەک بە خەیاڵیاندا نایەت، کە لافاوی خوێن لاشە بەرێت، بەڵکو وەک تیرۆریستەکەی سوریا کاتێک “سەربازەکەی کوشت، سنگیشی هەڵدەدرێتو دڵەکەی بە کاڵی دەخوات”. حوکمەتی عێراقییو هەموو ئەو سەرکردە سیاسییە گڵاوانەی شەڕو جەنگێکی نامرۆڤانەیان بۆ گەلی عێراق بەرپاکردوەو خەڵکیان گەمژەو کۆیلە کردوە لە ژێر ناوی شیعەگەرێتییو سونەگەرێتییو عروبەو کوردایەتییو تورکمانچێتیدا، هۆکاریی سەرەکیی ئەم کارەساتو تاوانانەن. ئەو سەرکردە سیاسیانەی بێ شەرمانە، هەستیی”نەتەوەیی”و سۆزیی”نیشتیمانپەروەریی” خەڵک دەروژێننو خوتوکەی هەستیی دروستبوونی دەوڵەتی کوردیی دەدەن لە پێناوی بەرژەوەنیی خۆیانو حیزبەکانیانداو هیچ حسابێک بۆ ژیانو کەرامەتی مرۆڤەکان ناکەن، هیچ حسابێک بۆ هەڵوەشاندنەوەو لێکترازانی خێزانەکان ناکەن، سەرچاوەی سەرەکیی دەیان کارەساتو تاوانی لەو جۆرەن. دەسەڵتدارە سیاسییەکانی ئەمرۆی عێراق بەرپرسیارن لە دەیان کارەساتو تاوانی لەو جۆرە. ئەگەر خەڵک برسییو تینوو رەشوڕوتو داماوو بەشمەینەت نەبێت ، ئەگەر مێشکی خەڵک بە جۆرێک نەشۆرابێتەوە، کە هیچ شتێک لەم جیهانەدا بەهاو نرخی نییە جگە لە پارەو سەرەوەتو سامانو ژیانێکی ئاژاڵیانە ناگاتە ئەو ئاستە لە داروخانی وێژدانو نامیهرەبانییو بێ بەزەییو نەمانی خۆشەویستی بۆ کۆرپەکەی .
گڕتە ڤێدیۆی ڕوداوەکە
[su_youtube url=”https://www.youtube.com/watch?v=_yfjJWDj19Y” width=”500″ height=”320″ responsive=”no”]https://www.youtube.com/watch?v=9L8_tWAbVO0[/su_youtube]
کوردستان .