PUK-1

کاوسێن بابەکر : یەکێتی ، کۆتایی بەم دۆخە بێنە .

زۆرجارو لەگەلێک قۆناخدا وتومانە دۆخەکە هەستیار و ناسکە ! بەڵام بەبەراورد بەو قۆناخانە ئەم دۆخەی ئێستا زۆر هەستیارەو  لەناسک ناسکترە ! لەکاتێکدا دڕەندەترین هێز کە داعشە لە هەموو لایەکەوە شەڕی لەدژمان بەرپاکردووە ، ناوچەکە سەرجەم بووە بەشەڕگەو جگە لە دەوڵەتەکانی ناوچەکە و تێوەگلاو لەشەڕ چەندین ووڵاتی دیکەی دونیاش ئەم جەنگەیان قۆستۆتەوە بۆ یەکلاکردنەوەی کێشەکانیان و پچڕینی بەشی خۆیان لە کێکی دوای جەنگ و گۆڕینی نەخشەی سیاسیش بەشێوەیەک لەشێوەکان بووەتە ئەگەرێکی زۆر بەهێز ، کە کورد وەک گەورەترین نەتەوەی بێ دەوڵەت بۆتە دیفاکتۆ لە هاوکێشەکانداو دەرفەتێکی زێڕینی بۆ هاتۆتە پێش ، کە زوڵمی سایکس بیکۆ و و داگیرکاری سەدان ساڵەی مێژوو ، بەدەوڵەتی سەربەخۆی خۆی قەرەبوو بکاتەوە .

بەڵام لەگەڵ هەموو ئەو ڕاستیانەدا ، سەرکردایەتی سیاسی کورد نەیتوانیوە دۆخەکەو ئەگەرەکان باش هەڵسەنگێنێ و یان توانیویەتی و لەبەر بەرژەوەندی حزبی و کەسی خستوویەتە پشتگوێ ! چونکە  کورد خۆی دەبێ ئامادەییەکی باشی هەبێ و یاریکەریکی ئازاو پتەوی گۆڕەپانەکەبێ ، دەنا کەس نایەت خێری پێبکات ، یاریکەرە زلهێزەکانیش ئەگەر چی سۆزێکیان بۆکورد هەیە ، لەکۆتاییدا بەدوای بەرژەوەندی خۆیانەوەن ، کەواتە دەبێ کوردخۆی ستراتیژی خۆی هەبێ وبە ئیرادەیەکی بەهێزەوە ، کاری بۆ بکات . بەڵام بەداخەوە هەموومان شاهیدی  سەرکردایەتی سیاسی کوردین ، ئەوەندەی بەدوای بەرژەوەندی کەسی و حزبیەوەن هێندە کار بۆ دواڕۆژی ئامانجە نیشتمانیەکان ناکەن ، ئەوەتا پەرلەمان ئیفلیجکراوەو حکومەت لەوپەڕی لاوازیدایەو بەدەست دەیان قەیرانەوە دەناڵێنێ ، کەچی تائێستا ئامادەنین تایبەت پارتی و گۆڕان کە کێشەکانیان کۆتایی پێبهێنن و لەبەرژەوەندی خۆیان داشکێنن و ماڵی کورد یەکخەنەوەو بەهێزوو گوڕو تینێکی دیکەوە بەرەو ڕووی مەترسی و ئەگەرەکان بوەستنەوە . یەکێتی کە ڕۆڵێکی گرنگ دەگێڕێ و دەیانجار بە پرەژەی باش و بەسەردان و گفتوگۆ لەگەڵ سەرجەم لایەنەکان هەوڵی بەرپرسانەو خەمخۆرانەی داوە ، بەڵام بەداخەوە هیچیان لەپارتی و گۆڕان لە بەرژەوەندیەکانیان نەهاتنە خوارەوە و لەعینادی و غرووری خۆیان بەردەوام بوون . پارتی پێی وایە نابێ پەشیمان بێتەوە لەلابردنی دکتۆر یوسف و لەشان و شەوکەتی کەم دەکاتەوە ، گۆڕانیش پێیوایە داشکاندنێکی گەورەیە ئەگەر یوسف نەبێتەوە بەسەرۆکی پەرلەمان ! بەم شێوەیە چەندین مانگە گەلەکەمان باجی ئەم غرووری و عینادیانە دەدات . بەڵام بەرژەوەندی گەلەکەمان زۆر لەوە گەورەترە کەحزبێک سیاسەتێکی شکست دێنێ یان سەرکەووتوودەبێ ، ئێستا نۆرەی یەکێتیە هیچکە گوێ لە قسەی بەرژەوەندیانەی ئەو حزب و ئەوم حزب نەگرێ و دۆخەکە کۆتایی پێبهێنێ و پەرلەمان کارا بکاتەوە بە سەرۆکایەتیەکی نوێوە و حکومەتێکی نوێی فریاکەوتنی نیشتمانی پێکبهێنن لەگەڵ پارتی و ئەوانی تریش بەشداربن باشە بەشدار نابن ، زۆر ئاسایی وەریبگرن تا هەڵبژاردنی داهاتووکە کەمتر لەدووساڵی ماوە . ئەم حکومەتە و ئەم پەرلەمانە کاری سەرەکیان پێداچوونەوەبێ بەسەرجەم کایەکانی حکومەتداو ؛ کەیسی نەوت ، گومرگەکان ، پەیوەندی هەرێم – بەغدا ، ببنبڕکردنی گەندەڵی ، بەهێزکردن و چەکدارکردن و پۆشتەکردنی پێشمەرگە ، مەسەلەی ڕیفڕاندۆم و دەوڵەتی سەربەخۆ ، کەیسی سەرۆکایەتی هەرێم و هەموارکردنی یاساکان بەپێی پێداویستیەکانی سەردەمەکەو … هتد ، هیچکە جەماوەرو مووچەخۆران بەرگەی ئەم دۆخە ناگرن ، ڕووداوەکان زۆر بەخێرایی تێدەپەڕن ، دەبێ کورد ئامادەی هەرئەگەرێک و پێشهاتێک بێت . بەڵێ یەکێتی بەمەرجی ئەو ئەرکانەی سەرەوە لەگەل پارتی ، دەتوانێ وابکات و سەردەمێکی نوێ چاوەڕوانی حکومەت و سەرکردایتیەکی نوێیە کە دەرەقەت ڕووداوو پێشهاتە چاورونکراوو نەکراوەکان بێت .

بە کلیکێک لەسەر سمبولەکانی خوارەوە ، ئەم بابەتە دەگات بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies