به‌کر حسه‌ین: جامانه‌ی سوری بارزانیه‌کان، له‌ نیوان سوتاندن و پیروزیدا.!

* ئەم نوسینەم ساڵی 2011 نوسیووە
هه‌ل و مه‌رجی داخوازیه‌کانی خۆپیشاندانه‌کانی ناوچه‌ی سله‌یمانی به‌شێوه‌یه‌کی چاوه‌رواننه‌کراو رۆژانه‌ له‌ گۆران و گه‌شه‌کردندایه‌ که‌ جارێ نازانرێت ده‌گاته‌ کوێ. به‌ڵام زۆر ئاشکرایه‌ که‌ ئه‌وه‌ سه‌ره‌تای سه‌رده‌مێکی نویه‌ و ده‌سه‌ڵات تا ئێستا ئه‌گه‌رچی له‌وه‌ نارازیه‌، به‌ڵام له‌ ئه‌وه‌تێگه‌یشتوه‌ که‌ به‌شێوازه‌کانی جاران مامه‌ڵه‌ی له‌گه‌ڵ ناکرێت و به‌دوای چاره‌سه‌رێکدا ده‌گه‌رێت که‌ هه‌م گرفته‌که‌ هێوربکاته‌وه‌و هه‌م سیسته‌می ده‌سه‌ڵاتیش وه‌ک خۆی بهێڵێته‌وه. مێدیاکانی ده‌سه‌ڵات رۆژێک هه‌ره‌شه‌و تاوانبارکردن و رۆژێکی تر زمان ده‌گوررن بۆ هیورکردنه‌وه . وه‌ بۆ هه‌ر جۆره‌ زمانێکیش که‌سایه‌تی تایبه‌ت هه‌ن که‌ شاره‌زاو پسپۆرن تێیدا. جگه‌له‌وانیش” که‌سایه‌تی و به‌رێوه‌به‌ری مێدیا” هه‌ن که‌ توانای راگه‌یاندنی هه‌ردوو زمانه‌که‌یان هه‌یه‌ ،چ بۆ ئاشتی و چ بو شه‌ر . ئه‌ویش به‌ گوێره‌ی بریاری سیاسی له‌و ساته دا‌. به‌گشتی گرفته‌کان زۆرن وبابه‌تی زۆرلێکۆڵینه‌وه‌و نوسینن. یه‌کێک له‌و بابه‌تانه‌ی سه‌رنجی منی راکێشا و پێویستی به‌ کۆده‌نگی رای گشتی هه‌یه‌ ، گرفتی (سوتاندنی جامانه‌ی سور، له‌ خۆ پیشاندانه‌کاندا) که‌ ئه‌وه‌ له‌ رابوردودا هیچ ئامرازێکی دووبه‌ره‌کی و ململانی نه‌بوه‌. ئه‌وه‌ گرفت و دیارده‌یه‌کی نوێ یه‌ و ئه‌وه‌ تێکه‌ڵی ته‌ریقه‌ی نه‌قشبه‌ندییش کراوه‌،که‌ له‌ ناوچه‌کانی تری کوردستاندا ئه‌و تێکه‌ڵ کردنه‌ نیه‌.
من ئه‌گه‌رچی زۆر به‌ وردی سه‌یری میدیاکانم ده‌کرد ده‌رباره‌ی خۆپیشندانه‌کان و به‌رد هاویشتنی چه‌ند لاوێکی توره‌و دواجاریش ته‌قه‌لێکردنیان له‌لایه‌ن لقی 4 ی پارتیه‌وه، به‌ڵام له‌سه‌ره‌تادا وا رێنه‌که‌وتبو سوتاندنی جامانه‌ی سور ببینم و یان بیبیستم، روداوه‌کان زۆر و له‌ زۆر جێ و کاتی جیاوازدا روویان ده‌دا. به‌ڵام دواتر واده‌رکه‌وت که‌ کاری وا له‌ کوردستان وله‌ ئه‌وروپا کرابوو.
یه‌که‌م بینین و بیستنی من رۆژی 19 شوبات بوو که‌ له‌ سه‌ر شاشه‌ی KTV، 58 هه‌مین ساڵیادی دامه‌زراندنی یه‌کێتی قوتابیانی کوردستان له‌ ناوچه‌ی بارزان (مێرگه‌سور) پیشاندرا. دکتۆر ئاراس حه‌سۆمیرخان به‌ناوی نوێنه‌ری سه‌رۆک بارزانیه‌وه‌ پێشکه‌ش کراو چوه‌سه‌ر میکرۆفۆنه‌که‌و دوای سڵاوو پێشه‌کی وتاره‌که‌ی هاته‌ سه‌رباسی، خۆپیشاندانه‌کانی سله‌یمانی و ده‌ستدرێژی کردنه‌ سه‌رباره‌گای لقی 4 ی پارتی، دواتر ئاماژه‌ی کرد بۆ تاوانێکی گه‌وره‌تری خۆپیشانده‌ران که‌ ئه‌ویش‌ سوکایه‌تیکردن و سوتاندنی جامانه‌ی سوور بو‌ە‌‌. به‌رامبه‌ر به‌و کرداره‌ راگه‌یاندنێکی ئاگراوی وایدا که‌من هه‌ر حه‌په‌سام و باوه‌رم به‌ گوێی خۆم نه‌ده‌کرد که‌ شتی وا له‌م زه‌مانه‌دا ببیستم. ئه‌ویش ئه‌م رستانه‌ی خواره‌ی تێدا بوو‌:

دکتۆر ئاراس حه‌سۆمیرخان ووتی:
باهه‌مو خه‌ڵکی بزانن ئێمه‌ له‌وانه‌ خۆشده‌بین که‌ ئێمه‌ده‌کوژن، (دوباره‌ی کرده‌وه‌‌) ئێمه‌ له‌وانه‌ خۆشده‌بین که‌ ئێمه ‌ده‌کوژن. ئێمه‌ له‌وانه‌ش خۆشده‌بین که‌ ئیمه‌یان ئه‌نفال کرد. ئێمه‌ له‌وانیش خۆشده‌بین که‌ شه‌هیده‌کانمان ده‌سوتێنن. به‌س ئێمه‌ له‌وانه‌ خۆشنابین ئه‌وی جامانه‌ی سور ده‌سوتێنن. هه‌روه‌ها ره‌خنه‌ی گرت له‌ که‌مته‌رخه‌می حکومه‌تیش له‌و باره‌یه‌وه‌، ووتی.. ئه‌م له‌ حکومه‌تیش قبوڵ ناکه‌ین. نابی هیچ که‌سێک جورئه‌ت بکات ئه‌وی ناماقوڵی بکات. وه‌ بانگه‌وازی خه‌ڵکی ده‌ڤه‌ره‌که‌ی کرد بۆ تۆڵه‌ و هه‌ڵوێست { وه‌ک په‌یامی ئاماده‌باشی بۆ جه‌نگێکی پیرۆز }.

ده‌قی چه‌ند رسته‌یه‌ک، به‌ زاراوه‌که‌ی خۆی، ئه‌مه‌ی خواره‌وه‌یه‌:
باهه‌مو خه‌ڵکی بزانن ئه‌م دلوان خۆشبین ئه‌ویدمه‌دکوژن، (دوباره‌ی کرده‌وه‌‌) ئه‌م دلوان خۆشبین ئه‌ویدمه‌دکوژن. ئه‌م دلوانیش خۆشبین ئه‌ویدمه‌ ئه‌نفال کرن، ئه‌م دلوانیش خۆشبین ئه‌وی شه‌هیدێت مه‌ دسۆژن، به‌س ئه‌م دلوان خۆشنابین ئه‌وی جامانه‌ی سور ده‌سوژن. ئه‌م له‌ حکومه‌تیش قبوڵ ناکه‌ین. نابی هیچ که‌سێک جورئه‌ت بکات ئه‌وی ناماقوڵی بکات.
ئه‌م نوسینه‌ ره‌خنه‌و سه‌رزه‌نشت نیه‌ له‌ هیچ که‌سایه‌تیه‌ک، به‌ڵکو ره‌خنه‌یه‌ له‌ بۆچون و برواو راگه‌یاندنێک،که‌ پێویستم زانیوه‌ تیشکی لێکۆڵینه‌وه‌ی بخرێته‌سه‌ر، من رێزم هه‌یه‌ بۆ ئه‌و به‌رێزانه‌ی ره‌خنه‌م له‌ راو راگه‌یاندنه‌کانیان گرتوه‌ و هیوادارم که‌ به‌ دیالۆگێکی شارستانی بتوانین بگه‌ینه‌ هاورایی له‌سه‌ر مه‌رجه‌ بنه‌ره‌تیه‌کانی بنیاتنانی نه‌ته‌وه‌. ئه‌م نوسینه‌ بانگه‌وازه‌ بۆ تێکه‌ل کردنی هه‌موو جامانه‌کان ، بۆ گونجاندن و هارمۆنی کولتورو داب و نه‌ریتی ناوچه‌ جیاوازه‌کانی نیشتیمانمان، تا وه‌ک گوڵی ره‌نگاو ره‌نگی جیاواز، باخچه‌ گشتیه‌که‌ی کولتورمان ده‌وڵه‌مه‌ندترو جوانترو رازاوه‌تر بکات. نه‌ک جیاوازیه‌کانمان ببنه‌ ئامرازی سیاسی بۆ پێوه‌ری جیاوازی هاووڵاتی بوون،بۆ {هاووڵاتی پله‌ی یه‌ک } و هی پله‌ی دوه‌م و یان خواروتریش و ئه‌وه‌ش بکرێته‌ بناغه‌ی ره‌وایی دان به‌ پیرۆزی و ئیمتیازاتی جیاواز.
به‌ڵام به‌ گوێره‌ی چۆنێتی ره‌فتار له‌گه‌ڵ ئه‌و گرفته‌دا ئه‌م پرسیاره‌ لای من په‌یدا بوو : ئایا هه‌وڵ بۆ ئه‌وه‌ ده‌درێت که‌ جامانه‌ی سور بکرێته‌ هێلی سوور بۆ دابه‌شکردنی‌
هاونیشتیمانیانی کوردستان بۆ که‌مایه‌تیه‌کی ده‌سه‌ڵاتتدارو پیرۆزی پله‌ی یه‌ک و زۆرینه‌که‌ی نه‌ته‌وه‌که‌ش وه‌ک ره‌عیه‌و هاووڵاتی پله‌ی دوو ؟
له‌به‌ر ئه‌وه‌ی که‌ د. ئاراس وه‌ک نوێنه‌ری سه‌رۆک بارزانی پێشکه‌ش کرابوو، من چاوه‌روانی ئه‌وه‌بوم که‌ ئه‌گه‌ر ئه‌و راگه‌یاندنه‌ هه‌ڵه‌یه‌کی شه‌خسی بێت،سه‌رکردایه‌تی پارتی و مێدیا کانیان له‌وباره‌یه‌وه‌ شتێک بکه‌ن ، به‌ گوێره‌ی یه‌کێک له‌ و سێ هه‌ڵوێسته‌ی خواره‌وه‌:
1- لێپرسینه‌وه‌ له‌ ئه‌و راگه‌یاندنه‌ هه‌ڵه‌یه‌ و داوای لێبوردن.
2- بێده‌نگی ته‌واو له‌ روداوه‌که‌، به‌هێوای ئه‌وه‌ی شته‌که‌ ئالۆزتر نه‌بێت و هه‌ڵه‌کانی زیانبه‌خش تر نه‌بن.
3- وه‌ک ئه‌و بیرۆکه‌یه‌ی که‌ ده‌ڵێت باشترین به‌رگری ، هیرش کردنه‌. وادیار بوو که‌ پارتی هه‌ڵوێستی سێیه‌میان هه‌ڵبژاردبوو . به‌و بروایه‌وه‌که‌ ئۆپۆزیسیون و خۆپیشانده‌ران، به‌ سوتاندنی جامانه‌ی سور، خاڵێکی لاوازیان داوه‌ به‌ده‌سته‌وه‌ و کفرێکیان کردوه‌ که‌ له‌ لایه‌ک ده‌کرێت سودی ئه‌وه‌ی لێ وه‌رگیرێت که‌ سه‌رنجی کۆمه‌ڵگاکه‌، له‌ داخوازی خۆپیشانده‌ران و داوای چاکسازیه‌وه‌ بگۆرێت بۆ ململانێ یه‌کی لابه‌لا له‌سه‌ر چه‌ند روداوێکی سوتاندنی جامانه‌ی سور. به‌و بروایه‌شه‌وه‌ که‌‌ ئه‌وه‌ به‌ ئه‌ندازه‌ی له‌کیس چونی پێگه‌ی جه‌ماوه‌ری پارتی له‌ زۆر ناوچه‌دا، ئه‌و گرفته‌ لابه‌لایه‌ ده‌کرێت ببێته‌ هۆی قایم کردنی پێگه‌ی جه‌ماوه‌ری له‌ چه‌ند ناوچه‌یه‌کی تردا. به‌ گشتیش فرسه‌تێک بێت بۆ گواستنه‌وه‌ی راگه‌یاندنی پارتی له‌ به‌رگریه‌کی لاوازه‌وه‌ بۆ هێرش و فشار خستنه‌ سه‌ر ئۆپۆزیسۆن.
بۆیه‌ چه‌ند رۆژێک دوای ئه‌وه‌:
1- له‌ ئێواره‌ی ئازاردا، له‌هه‌مان که‌ناڵ نوێنه‌رێکی تری سه‌رۆک مه‌سعودبارزانی، به‌رێز شێخ ئه‌دهه‌م بارزانی، زۆر به‌ توندتر هه‌مان په‌یامی دوباره‌کرده‌وه‌ (به‌ڵام به‌ ده‌قێکی جیاوازتر له‌وه‌وی دکتۆر ئاراس) له‌گه‌ڵ هه‌ره‌شه‌ی توندترو تاوانبارکردنی راسته‌وخۆی گۆران. (ئه‌گه‌رچی ئه‌وه‌ پێچه‌وانه‌ی هه‌ڵوێستێکی پێشوتری به‌رێز کاک نێچیروان بارزانی بوو. ده‌رباره‌ی ئه‌و روداوانه، له‌ راگه‌یاندنێکدا ووتی: ئێمه‌ هیچ که‌س و لایه‌نێک تاوانبار ناکه‌ین و چاوه‌روانی ئه‌نجامی لێکۆڵینه‌وه‌ ده‌که‌ین…که‌ ئه‌و هه‌ڵوێسته‌ لێهاتویی و دیبلۆماسیه‌تی تێدا بوو.) له‌و دیمانه‌یه‌ی KTV دا هه‌ردولا شێخ ئه‌دهه‌م و کاک عه‌بدولوه‌هابی به‌رێوه‌به‌ری پرۆگرامه‌که‌ ‌هاورا بون له‌سه‌رتاوانبارکردنی گوران. شێخ ئه‌دهه‌م راسته‌وخۆ په‌یامه‌که‌ی ئاراسته‌ی به‌رێز نه‌وشیروان مسته‌فا کرد و پێی ووت: ئاغای گرده‌که‌ ئه‌وه‌ به‌ سه‌ددام نه‌کراوه‌ و ئه‌وه‌ به‌ ئه‌نفال نه‌کراوه‌ ، ئایا ئه‌وه‌ به‌ تۆ ده‌کرێت؟ دیمانه‌که‌ش به‌وه‌ کۆتایی هات که‌ هه‌ردوکیان هاورا بوون له‌سه‌ر ئه‌وه‌ی که‌ وادیاره‌ سه‌رانی گۆران نانی شوانیان خواردوه‌ . وه‌ ئه‌وه‌شی راگه‌یاند که‌ ده‌ یان هه‌زار بارزانیانی ئه‌و ده‌ڤه‌ره‌ ئاماده‌ن هه‌ر شتێک بکه‌ن چونکه‌ سوکایه‌تی به‌ پیروزیه‌کانیان کراوه‌.
جگه‌له‌و هه‌ره‌شانه‌، شێخ ئه‌دهه‌م رونکردنه‌وه‌ی زیاتری له‌سه‌ر پیرۆزی و مانای جامانه‌ی سور پێشکه‌ش کرد وه‌ک هێمایه‌کیش بۆ‌ رێبازی ئاینی نه‌قشبه‌ندی که‌ بارزانیه‌کان بروایان پێی یه‌تی و پێناسه‌ی کرد به‌ {عه‌داله‌تی بارزان } وه‌ک‌ بانگه‌واز بۆ یه‌کسانی و دادپه‌روه‌ری کۆمه‌ڵایه‌تی. باسی له‌وه‌کرد که‌ له‌ کاتی شه‌هیدبونی بارزانیاندا ئه‌وه‌ جامانه‌یه‌ وه‌ک کفن به‌کارهێنراوه‌و. و شتی تر له‌وباره‌یه‌وه‌. له‌ لای من ئه‌وه‌ش مایه‌ی سه‌رسورمانێکی تر بوو .
بۆچی وا له‌ پرر جامانه‌ی سور ئه‌و هه‌موو مانایه‌ی وه‌رگرت، له‌ کاتێکدا ئێمه‌ له‌وه‌و پێش هیچ مانا و هێمایه‌کی سیاسی و ئاینیمان له‌وه‌دا تێبینی نه‌کردوه‌، ئه‌وه‌ نه‌بێت که‌ تایبه‌تمه‌ندیه‌کی کولتوری و به‌شێک بێت شێوازی جل وبه‌رگی بارزانیه‌کان و هه‌روه‌ها هی خه‌ڵکانی تری غه‌یره‌ کوردیش.
دوای ئه‌و راگه‌یاندنانه‌،‌ به‌ سێ هه‌فته‌. له‌ رۆژی 20 ئازار، سه‌رۆکی هه‌رێم به‌رێز کاک مه‌سعود بارزانی، له‌ نیوان پیرۆزبایی نه‌رۆزه‌وه‌، په‌یامێکی ئاراسته‌ی گه‌ڵی کوردو خۆپیشانده‌رانی مه‌یدانی ئازادی سله‌یمانی کرد، که‌ تێیدا باسی زۆر بابه‌تی په‌یوه‌ندیدار به‌ گرفت و قه‌یرانی هه‌رێم کرد و له‌وه‌شدا بۆ یه‌که‌م جار سه‌رۆکی هه‌رێم خۆی باسی سوتاندنی جامانه‌ی سوری کرد و دڵگرانی خۆی پیشاندا به‌م راگه‌یاندنه‌ی خواره‌وه‌:
{” ئه‌وه‌ی من بزانم شاری سلێمانی شاری هه‌ڵمه‌ت و قوربانی له‌ سیه‌كان و چله‌كان له‌ كاتی كه‌ رژێمی ئه‌و سه‌رده‌می عێراق به‌پێی ئه‌حكامی عورفی حوكمی ئیعدامی ده‌ركردبوو بۆ هه‌ركه‌سێك جامانه‌ی سووری له‌سه‌ر بێت له‌و سه‌رده‌مانه‌دا سلێمانی جامانه‌ی سووری پاراست و له‌ باوه‌شی گرت من قه‌ت ناتوانم قه‌ناعه‌ت بكه‌م له‌ 2011 له‌ شاری سلێمانی خه‌ڵكی سلێمانی جامانه‌ی سوور بسوتێنن , ئه‌وه‌ی ئه‌م كاره‌ی كردووه‌ من دڵنیام بۆ فتنه‌ بووه‌ و كه‌سێكه‌ دووره‌ له‌ سلێمانی و هه‌ر خودی خه‌ڵكی سلێمانی رێگه‌ به‌و كه‌سانه‌ ناده‌ن و جامانه‌ی سوور ده‌پارێزن و چونكه‌ هیچ نه‌بێ كفنی هه‌زاره‌ها شه‌هید بووه “}
ئه‌وه‌ی که‌ زۆر باش بوو له‌و راگه‌یاندنه‌دا،ئاماژه‌کردن بوو به‌ په‌یوه‌ندیه‌ مێژوییه‌کان و هاوسۆزی خه‌ڵکی سله‌یمانی له‌ بارزانیه‌کان که‌ هه‌موی رێزو خۆشه‌ویستی و پشتیوانی بوه‌ له‌ کوردایه‌تی و شۆرش (زۆربه‌مان که‌م یا زۆر ده‌رباره‌ی ئه‌و مێژوه‌ی خوێندۆته‌وه‌ به‌ڵام من هیچ نایه‌ته‌ بیرم که‌ جامانه‌ی سور تایبه‌تمه‌ندیه‌کی ئه‌ گرفته‌ بوبێت ، به‌ڵکو ئه‌و هاوسۆزیه‌ بۆ خه‌بات و فیداکاری بارزانیه‌کان بوه‌)
‌.سه‌رۆکی هه‌رێم له‌و راگه‌یاندنانه‌دا ، هیچ ئاماژه‌ یان راستکردنه‌وه‌یه‌کی نه‌کرد بۆ هه‌ره‌شه‌کانی نوێنه‌ره‌کانی ده‌رباره‌ی ئه‌و گرفته‌ و به‌ڵام وا دیار بوو سه‌رۆک به‌ پێویستی زانیوه‌ که‌ به‌ زمانێکی تر قسه‌بکات و جگه‌له‌وه‌ش، ئه‌م راگه‌یاندنه‌ی سه‌رۆک، 20-ئازار بوو، دوای پتر له‌ مانگێک‌ له‌ راگه‌یاندنه‌که‌ی دکتۆر ئاراس و له‌و مانگه‌شدا هه‌ل و مه‌رجه‌که‌ش زۆر گۆررا بوو . هه‌رچۆنێک بێت ‌خۆ ئه‌گه‌ر سه‌رۆک ئاگاداری ناوه‌رۆکی راگه‌یاندنه‌کانی ئه‌و دوو‌ نوێنه‌ره‌ به‌رێزانه‌ی نه‌ بووبێت تا ئێستا،ئه‌وا ئه‌م نوسینه‌ سودی ئه‌وه‌ی ده‌بێت که‌ سیناریوی روداوه‌کان پیشانبداته‌وه‌.
ئه‌و جۆره‌ هه‌ڵویست و ئه‌و جۆره‌ راگه‌یاندنه‌ له‌به‌رژه‌وه‌ندی هاووڵاتیانی شه‌ره‌فمه‌ندی بارزانیه‌کاندا نیه‌و به‌ پێچه‌وانه‌وه‌، جیایان ده‌کاته‌و و دایان ده‌برێ له‌ نه‌ته‌وه‌که‌یان. خه‌ڵکی کوردستان به‌ گشتی و خه‌ڵکی سله‌یمانیش به‌ تایبه‌تی هه‌رده‌م هاوسۆزی و رێزیان هه‌بوه‌ بۆ خه‌بات وقوربانیدانی بارزانیه‌کان هه‌ر له‌ شورشه‌کانی بارزانه‌وه‌ تا کاره‌ساتی ئه‌نفالی بارزانیه‌کان له‌ سه‌رده‌ستی رژێمی فاشی سه‌ددامدا . وه‌ ئه‌وه‌ جیاوازه‌ له‌ هه‌ڵوێست له‌ شێوازی کرده‌وه‌کانی پارتی. بۆیه‌ ئه‌گه‌ر به‌هۆی کرداری چه‌ند لاوێکی توره‌ له‌ ده‌سه‌ڵات و سه‌رۆکه‌که‌ی ، کارێکی واش کرابێت، ئه‌وه‌ راست نیه‌ وا ته‌فسیر بکرێت که‌ دژی بارزانیه‌کان بووبێت.ئه‌وه‌ زیاتر له‌ وه‌ ده‌چێت که‌ لاسایی کردنه‌وه‌ی هه‌ندی نه‌ریتی وڵاتانی تربێت بۆ ده‌ربرینی ناره‌زایی به‌رامبه‌ر به‌ ده‌سه‌ڵات. ئه‌و ردالفعله‌ (دژه‌کردارانه‌)ی که‌ له‌لایه‌ن دوو نوێنه‌ری به‌رێز کاک مه‌سعوده‌وه‌ 1- دکتۆر ئاراس حه‌سۆمیرخان.
2- به‌رێز شێخ ئه‌دهه‌م به‌رزانی به‌شێوه‌ی هه‌ره‌شه‌یه‌کی راسته‌وخۆ بۆ سه‌رۆکی گۆرران وه‌ هه‌رشه‌ش له‌ هه‌مو کۆمه‌ڵگاکه‌ راگه‌یه‌نران . گوایه‌ بۆئه‌وه‌ی که‌سی تریش نه‌توانێ ناماقوڵی وابکات و یان ئه‌وه‌ ی که‌ ده‌هه‌زار که‌سی بارزانی ئایندارانی رێبازی نه‌قشبه‌ندی ئاماده‌ن هه‌رچی شتێک هه‌بێت بیکه‌ن ، چونکه‌ پیرۆزیان ئیهانه‌ کراوه‌ . هه‌مو ئه‌وانه‌ ئه‌وه‌مان پیشان ده‌ده‌ن که‌ چی مه‌ترسی راسته‌قینه‌یه‌ له‌سه‌ر ئه‌زمونی هه‌رێم .، ئه‌وه‌ چه‌سه‌قامگیریه‌که‌ بۆ ئه‌زمونی هه‌رێم که‌ به‌ کرداری چه‌ندلاوێکی نارازی و سوتاندنی جامانه‌یه‌کی سور، له‌ هه‌ر ساتێکدا بتوانرێت بکرێته‌ بیانوی شه‌ری ناوخۆو و دوباره‌کردنه‌وه‌ی کاره‌ساته‌ خۆکوژیه‌کانی رابوردوو ؟ ئایا باشتر نیه‌ که‌ هه‌رود لایه‌ن، ده‌سه‌ڵات و ئۆپۆزیسۆن، پێک بێن له‌سه‌ر گۆرانی بنه‌ره‌تی له‌ سیسته‌می حکومرانیمان و بێلاینکردنی هێزه‌چه‌کداره‌کان ؟ به‌ شێوه‌یه‌ک که‌ جێی متمانه‌و دڵنیایی کۆمه‌ڵگه‌که‌مان بێت ؟
له‌ جێی خۆیدایه‌ که‌ ره‌خنه‌ی له‌و لاوانه‌ بگیرێت و ئاماژه‌ بکرێت که‌ ئه‌و کرداره‌ کارێکی ناره‌وا بوه‌و و ئه‌وه‌ هیچ په‌یوه‌ندی نیه‌ به‌ داخوازیه‌کانی خۆپیشاندان و چاکسازیه‌وه‌. ئه‌وه‌ش به‌ راگه‌یاندنێکی عه‌قلانی و دیالۆگ ده‌کرێت و ئه‌نجامی باشتری ده‌بێت‌ نه‌ک به‌ هه‌ره‌شه‌ی تۆڵه‌ و خۆسازدان بۆ شه‌رر. ده‌بێت ئه‌وه‌ش‌ بزانرێت که‌ ئه‌و خۆپیشاندانانه‌ له‌ زۆربه‌ی کاتدا هیچ که‌س و هیچ لایه‌نێکی سیاسی ئه‌گه‌رچی به‌شداریشیان تێداکردبێت خاوه‌نی ته‌واوی نیین‌ و له‌وه‌ ناچێت هیچ لایه‌نێکیش خاوه‌نی ته‌واوی هه‌مو رێوپێوانه‌کان بووبن. بۆیه‌ ئه‌گه‌ر به‌رپرسێکی ده‌سه‌ڵات (که‌ زۆرجار ووتویانه‌: ئێمه‌ بروامان به‌ سه‌روه‌ری یاسا هه‌یه‌ !) به‌ بێ بنه‌مای یاسایی تاوانباری لایه‌ن و که‌سایه‌تی سیاسی تر بکات، ئه‌وه‌ لێهاتوویی ئه‌و که‌سایه‌تیانه بۆ پۆسته‌کانیان ده‌خاته‌ ژێر پرسیاره‌وه‌. خۆ ئه‌گه‌ر ئه‌وده‌سه‌ڵاتدارانه‌ ئه‌وه‌یان زانیبێت که‌ سه‌روه‌ری یاسا مانای چیه‌ و به‌ ئانقه‌ست یاسایان پیشێلکردبێت، ئه‌وه‌ش به‌رپرسیارێتیه‌که‌ گه‌وره‌تر ده‌کات و له‌ هه‌ردو حاله‌ته‌که‌دا سزای یاسایشی له‌سه‌ر ده‌که‌وێت. (به‌ هه‌مان شێوه‌ مێدیاکان و به‌رێوه‌به‌ری پرۆگرامه‌کانیش به‌رپرسن) .
له‌ به‌رژه‌وه‌ندی بارزانیه‌کاندا نیه‌ که‌ بکرێن به‌گژ هاونیشتیمانیه‌ کانیاندا و وا پیشان بدرێن که‌ ئه‌وان . ئینتیمای یه‌که‌میان بارزانی بونه‌ نه‌ک کورد بوون ، پیرۆزی یه‌که‌میان جامانه‌ی سوره‌ نه‌ک کوردایه‌تی. یان په‌یامێکی وا‌ به‌ میلله‌ته‌که‌مان بدرێت که‌ ” ئه‌وان جیاوازن ”
من هیچ ئاگاداری ئه‌وه‌ نه‌بووم و نیم که‌ جامانه‌ی سور ره‌مزێکی مه‌زهه‌بی ( رێبازی نه‌قشبه‌ندی بێت **) و یان هێمای خه‌باتی کوردایه‌تی بێت . رێبازی نه‌قشبه‌ندی که‌ سه‌دان ساڵ له‌ مه‌وبه‌رو له‌ زه‌مانی مه‌وڵانا خالیده‌وه‌ له‌ ناوچه‌کانی سله‌یمانی و هه‌ورامان و به‌ره‌و بوخاراو سه‌مه‌رقه‌ند بوونی هه‌بوه‌و هه‌یه‌ له‌وه‌ ناچێت جامانه‌ی سور هیچ (ره‌مز) هێمایه‌کی بێت . بێگومان ئه‌م جامانه‌یه‌ وه‌ک هه‌موو دیارده‌یه‌کی کۆمه‌ڵایه‌تی ده‌بێت سه‌ره‌تایه‌کی میژویی هه‌بێت . ئه‌وه‌یان من نازانم، به‌ڵام ئه‌وه‌ی که‌ ره‌نگه من و خوێنه‌ری به‌رێزیش تێبینی کردبێت ئه‌ویه‌ که‌له‌ زۆر ناوچه‌کانی خواروی عیراق و که‌نداوو نیمچه‌ دورگه‌ی عه‌ربی و سعودیه‌ و وڵاتانی سه‌روی ئه‌فریقا بوونی هه‌یه‌ { تێبینی شه‌پۆلی خۆپیشاندان و راپه‌رینه‌کانی گه‌لانی وڵاته‌ عه‌ره‌بیه‌کان بکه‌ن، له‌ زۆربه‌یاندا یان له‌ هه‌مۆیاندا،جامانه‌ی سور ، ده‌بینرێت } . به‌ڵام من نازانم ئایا ئه‌وه‌ تایبه‌تمه‌ندیه‌کی ئاینی هه‌یه‌ یان هه‌ر شێوازێکی جل و به‌رگه‌ و جیاوازی ره‌نگه‌ ،ئێمه‌ له‌سه‌رشاشه‌ی ته‌له‌فزیون و له‌ دادگایی کردنی عه‌لی حه‌سه‌ن مه‌جید (عه‌لی کیمیاوی) و هاشم سوڵتاندا، بینیمان که‌ ئه‌وان له‌ هه‌ندی دانیشتنه‌کاندا ،جامانه‌ی سوریان له‌سه‌ردابوو . به‌شێکی زۆری له‌ پیاوه‌ ئاینیه‌کانی سعودیه‌ جامانه‌ی سوریان هه‌یه‌ و من له‌وانه‌دا هیچ پیرۆزیه‌کم نه‌دیوه‌و ناشی بینم. بۆدڵنیابوون له‌وه‌ ده‌توانن له‌ ماڵپه‌ری گوگڵ دا بگه‌رێن بۆ (photo chemical ali,) وه‌ هه‌روه‌ها بۆ هاشم سوڵتان و پیاوانی ئاینی سعودیه‌ … هتد . لای من جامانه‌ هه‌ر ره‌نگێکی هه‌بێت بۆ پێویستیه‌کانی سه‌ری مرۆڤه‌ و به‌شێکه‌ له‌‌ داب و نه‌ریتی جل و به‌رگ، شتی گرنگتر که‌ پێناسه‌ی مرۆڤه‌کان بێت،ئه‌وه‌یه‌ که‌ له‌ ژێر ئه‌و جامانه‌یه‌دا چ میشک و فیکرو بیرکردنه‌وه‌یه‌ک هه‌یه. لای من رێزو ته‌قدیر بۆ برابه‌رزانیه‌کان، پیویست ناکات بۆ ره‌نگی جامانه‌ که‌یان بێت، به‌ڵکو ده‌بێت بۆ‌ میژوی خه‌بات و قوربانیه‌کانیان بێت. { که‌سانی چاک و خراپ له‌ دنیادا هه‌مان چاکه‌توپانتۆڵیان له‌به‌ردایه‌} بۆچی ده‌بێت ئه‌وه‌ تێکه‌ڵی نیشتیمان په‌روه‌رێتی و به‌های پیرۆز بکرێت؟ به‌ڵام خۆ ئه‌گه‌ر له‌به‌ر هه‌ر هۆیه‌ک لای برایانی بارزانی وای لێهاتبێت ، ئه‌وه‌ هیچ گرفتێک له‌وه‌دا نیه‌ و پێویسته‌ جێی رێزلێ گرتن بێت، و بێگومان هیچ پاساوێکیش نیه‌ بۆ سوکایه‌تی پێکردنی و کاری وا ناره‌وایه‌.
من له‌ سه‌ره‌تای شه‌سته‌کانه‌وه‌ ئه‌ندامی پارتی دیموکراتی کوردستان بوم و له‌ دوای جیابونه‌وه‌شم له‌ پارتی و هه‌ڵبژاردنی رێبازی سیاسی تر و تا ئێستاش، له‌ هیچ پروگرام و بانگه‌وازێکی سیاسیدا به‌ هیچ جۆرێک باسی جامانه‌ی سورم نه‌ بیستوه‌. له‌ ململانێ و دوبه‌رکیه‌کانی ناوخۆشدا ئه‌وه‌ هیچ کاتێک بابه‌ت و هۆکار نه‌بوه‌. ئه‌وه‌ تێکه‌ڵی سیاسه‌ت و شۆرش نه‌کراوه‌ و ئه‌وه‌ نه‌ سیمبۆل بوه‌و نه‌ رێباز. هه‌ر کوردایه‌تی رێبازی خه‌بات و شورش بوه‌ وهه‌ر له‌ پێناوی ئه‌وه‌شدا گه‌ل خه‌باتی کردوه‌و قوربانی داوه‌ (دروشم یان کوردستان یان نه‌مان بوه‌) .
زۆر سه‌یرو جێی سه‌رسورمانه‌ که‌وا له‌ پر جامانه‌ی سوور له‌ خوێنی شه‌هیدان و ئه‌نفالکراوه‌کانمان پیرۆزتر بێت و وه‌ک نوێنه‌رانی کاک مه‌سعود ئاماژه‌یان پێدا،{{ ئێمه‌ له‌وانه‌ش خۆشده‌بین که‌ ئیمه‌یان ئه‌نفال کرد .ئێمه‌ له‌وانیش خۆشده‌بین که‌ شه‌هیده‌کانمان ده‌سوتێنن . به‌س ئێمه‌ له‌وانه‌ خۆشنابین ئه‌وی جامانه‌ی سور ده‌سوتێنن }}
ئه‌ی ئه‌گه‌ر پێوانه‌ی پیرۆزی به‌ ره‌نگ و بابه‌تی کفنی شه‌هیدان بێت، خۆ به‌رامبه‌ر هه‌شت هه‌زار شه‌هیدی ئه‌نفالی بارزانیان،له‌وبه‌ریشه‌وه‌ سه‌دوهه‌شاودوو هه‌زار شه‌هیدی ئه‌نفال كه‌ زۆربه‌ی هه‌ره‌زۆری هی گه‌رمیان و ناوچه‌کانی سۆران بوون ، ئایا بۆئه‌وانیش جامانه‌ی ره‌ش یان مشکی بکه‌ینه‌ سیمبۆڵی هه‌ندێک پیرۆزی ؟ له‌ راستیدا، له‌ کاتی ئه‌نفال و له‌ناوبردنی کوردا رژیم مامه‌ڵه‌ی یه‌کسان بوه‌ له‌ گۆره‌ به‌ کۆمه‌ڵه‌کاندا به‌رامبه‌ر هه‌ردولا ؟ هیچ لایه‌ک کفن و دفن نه‌کراون ، به‌ڵکو به‌ ده‌سترێژی گولله‌ شه‌هیدکراون و به‌ جله‌کانیانه‌وه‌ فرێدراونه‌ته‌ گۆری به‌ کۆمه‌ڵ و به‌ شۆفڵ لمیان کراوه‌ به‌سه‌ردا. (تێبینی: راپۆرته‌کانی رێکخراوی چاودێری مافی مرۆڤ – رۆژهه‌ڵاتی ناوه‌راست ،ده‌رباره‌ی ئه‌نفال ) . جگه‌ له‌وه‌ش،له‌ مێدیاکاندا سه‌رهه‌ڵدانه‌وه‌ی گۆره‌ به‌کۆمه‌ڵه‌کان ئه‌وه‌یان پیشاندرا،که‌ چۆن هاووڵاتیان به‌ جل و به‌رگی ئاسایی خۆیانه‌وه‌ و له‌ گۆری به‌ کۆمه‌ڵدا داپۆشراون (نه‌ک به‌ کفن و دفنی سور یان ره‌ش )!!
راسته‌ سوتاندنی جامانه‌ی سور، هیچ په‌یوه‌ندیه‌کی به‌ خۆپیشاندان و داخوازی کۆمه‌ڵانی خه‌ڵکه‌وه‌ نیه‌. به‌ڵام ئایا ئه‌وه‌ له‌ راستیدا گرفتێکی وا گه‌وره‌ بوو‌ ؟ یان بۆ مه‌به‌ستی سیاسی و بۆ به‌رژه‌وه‌ندی حیزبی وا گه‌وره‌ کراوه‌ ؟
له‌ کۆتاییشدا، له‌ کاتێکدا که‌ به‌رێز کاک مه‌سعود له‌وباره‌یه‌وه‌ گله‌ییه‌کی نه‌رمتری له‌وباره‌یه‌وه‌ کرد.
{ ئه‌وه‌ی ئه‌م كاره‌ی كردووه‌ من دڵنیام بۆ فتنه‌ بووه‌ و كه‌سێكه‌ دووره‌ له‌ سلێمانی و هه‌ر خودی خه‌ڵكی سلێمانی رێگه‌ به‌و كه‌سانه‌ ناده‌ن و جامانه‌ی سوور ده‌پارێزن } له‌وه‌دا که‌سی تاوانبار نه‌کرد . ئایا پێویست ناکات به‌رێزیان هه‌ڵوێست پیشانبده‌ن له‌سه‌ر ئه‌و راگه‌یانده‌کانی ئه‌و به‌رێزانه‌ی که‌ وه‌ک نوێنه‌ری خۆی رایان گه‌یاندوه‌ و به‌بێ لێکۆڵینه‌وه‌و به‌ بێ به‌ڵگه‌، به‌رپرسێکی ئۆپۆزیسۆنیان تاوانبار کردو؟
من له‌ دواکاتدا، پێشنیاری ئه‌وه‌ ده‌که‌م که‌ کورد په‌روه‌رانی رێزه‌کانی ئۆپۆزیسۆن،و خۆپیشانده‌ران، یان مانگرتوانی ناوچه‌ جیاوازه‌کان، بۆ پیشاندانی هاوسۆزی له‌گه‌ڵ برا بارزانیه‌کانیاندا، له‌ هه‌ندێک بۆنه‌دا له‌گه‌ڵ جلی کوردیدا جامانه‌ی سور له‌سه‌ربکه‌ن، به‌هه‌مان شێوه‌ی جل و به‌رگه‌کانی تری ناوچه‌ جیاوازه‌کانمان. بۆ پیشاندانی هاوسۆزی و یه‌کریزی گه‌له‌که‌مان. و بۆ ئه‌وه‌ش ئه‌گه‌ر ئه‌وروداوانه‌ی پێشوو، هه‌ستی هه‌ندێکی بریندار کردبێت ئه‌و برینانه‌ سارێژ بکات و به‌هه‌ڵه‌ له‌ یه‌کتری نه‌گه‌ن . به‌وه‌ ئه‌و ده‌رگایه‌ش داده‌خرێت که‌ له‌مه‌ودوا ره‌فتاری وا‌ بۆ مه‌به‌ستی سیاسی به‌کاربهێنرێت.

تێبینی/
2- ده‌رباره‌ی رێبازی نه‌قشبه‌ندی که‌ له‌ دیمانه‌ ته‌له‌فزیونیه‌که‌ی به‌رێز شێخ ئه‌دهه‌م بارزانیدا، تێهه‌ڵکێشی ئه‌و گرفته‌ی سه‌ره‌وه‌ کرابوو، ئه‌وه‌ پێویسته‌ و ده‌کرێ هه‌وێنی یه‌کرێزی میلله‌ته‌که‌مان بێت نه‌ک تایبه‌تمه‌ندیه‌ک بۆ جیاوازی، له‌ بابه‌تێکی داهاتودا، هه‌ندێک سه‌رنجی له‌سه‌ر پێشکه‌ش ده‌که‌م.‌

لە گۆگلە بنوسە wtarikurd ڕۆژانە بابەتی نوێ بخوێنەوە. ACEPTAR
Aviso de cookies