barzani-1

مەحمود ڕەزا : مەسعود بەرزانی بە چ سیفەتێ کۆبونەوە ئەکا ؟

ئەمڕو مەسعود بەرزانیی سەرۆکی پارتی ، نوێنەری کونسوڵگەری و نوێنەرایەتیەکانی بێگانەی لە هەولێر کۆ کردەوە و قسەی بۆ کردن .
میدیای حیزبەکەی بەرزانی وا باسی کۆبونەوەکەیان کرد کە بەناوی سەرۆکی هەرێمەوە میوانەکان بانگ کراون و مەسعود بەرزانی باسی شەڕی داعش و پێوەندی نێوان هەولێر و بەغدا و هەلومەرجی سیاسیی هەرێمی بۆ کردون و ، گوایا پێی وتون : ماوەیەکی تر لەگەڵ حیزبەکانی کوردستان کۆ ئەبێتەوە .
لە راستیدا ئەم هەنگاوەی مەسعود بەرزانی لە چەند لاوە سەرسوڕهێنەرە :
٭ لە لایەکەوە ، چونکە ئەم کابرایە نەک سەرۆکی هەرێم نیە ، بەڵکو کەسێکی کودەتا چیە و خۆی و حیزبەکەی کودەتایان کردوە بە سەر شەرعیەت و ، دوای مردن یشی بێ ، شایەنی ئەوەیە لە سەر ئەم کودەتایەی کردویەتی ، بدرێ بە دادگا و سزای قانونی لە سەر وەر گرێ .
٭ لە لای دووەمەوە ، لە بەر ئەوەی حیزبەکەی خۆی هۆکاریی یەکەمی قەیرانە قوڵەکانی ناو هەرێم و نێوان هەرێم و بەغدا یە ، ئەتوانێ بێ کۆبونەوە کردن بەم خەڵکەش واز لە خووی شێواندنی بەردەوامی هەمو شتەکان بهێنێ و بڕێ لە قەیرانەکان خاو بکاتەوە .
٭ لە لای سێیەمەوە ، چونکە کونسوڵگەریەکان بە دیفاکتۆ مامەڵە لەگەڵ مەسعود بەرزانی ئەکەن ، ئەگینا ئەوان هەمویان ئەزانن ئەم کابرایە بە زەبری چەک و بە کودەتا لە سەر کورسی سەرۆکی هەرێم خۆی هێشتۆتەوە ، ئەگینا سەرۆکێکی نا شەرعیە .
رەنگە بۆ نوێنەرانی وڵاتانی عەرەبی و وڵاتانی ئیسلامی ئەم هەنگاوەی مەسعود بەرزانی ئاسایی بێ ، بەڵام بێ شک بۆ نوێنەرانی وڵاتانی ئەوروپا مایەی لاقرتی و پێکەنینە بە ئاوەز و روی ئەم کابرایە . چونکە بە گوێرەی زانیاری من ، یەکێتی ئەوروپا دەمێکە بە نوێنەری تایبەتی خۆیانا پەیامی ڕووبەڕوو یان داوە بە مەسعود بەرزانی کە یەکێتییەکە لە دوای 19 ی ئابەوە ئەو بە سەرۆکی هەرێم نازانن … ئەگەر تەعامولی لەگەڵ بکەن بە دیفاکتۆ لەگەڵی ئەکەن .
٭ لە هەموی عاجبایەتی تر ئەوەیە کە مەسعود بەرزانی چەند رۆژێ لەمەو بەر پەیامی بڵاو کردەوە و داوای کرد پۆستەکەی ئەو نە کرێ بە بیانو بۆ رێک نە کەوتن . لە سەر ئەم راستە رێیە ، سەرەتایی ترین هەنگاو مەسعود بەرزانی ئەبو بی نایە بۆ ئەوەی پۆستەکەی نە کرێ بە بیانو ، ئەوە بوو کە چی تر بە ناوی سەرۆکی هەرێمەوە نە جوڵێ و نە چالاکێ و بەو ناوەوە قسە نە کا .
ئەم کابرایە کە خۆی و گرێی پۆستەکەی و ئینقلابەکەی بە سەر شەرعیەتا بونەتە مایەی قوڵتر بونەوەی قەیرانەکان و ، ئەو خۆی بەشی هەرە گەورەی کێشەکانە ، بە نیازە بە چ ناوێکەوە لەگەڵ حیزبەکانی کوردستان کۆ ببێتەوە ؟
ئەگەر وەکو سەرۆکی پارتی بە نیازە ئەو هەنگاوە بنێ و ئەگەر ئامادەیە بە بێ بیانو و راوڕێوی هێنانەوە واز لە کورسیی داگیرکراوی سەرۆکی هەرێم بهێنێ و ئامادەیە چارەسەری قەیرانەکان بسپێرێتەوە بە تاکە دەزگای شەرعیی هەرێم ، پارلەمانی کوردستان ، ئەو کاتە هەقێتی شانازی بە خۆیەوە بکا کە ئەبێ بە کلیلی چارەسەری بەشێ لە قەیرانەکان .
لێ ، تا مەسعود بەرزانی و حیزبەکەی و بنەماڵەکەی ئامادە نەبن شوێنەوارەکانی خیانەتی 12 ی ئۆکتۆبەری 2015 بسڕنەوە ، دەرچونیان لەو تەڵەیەی خۆیانیان پێوە کروە ، خەونی زڕاوە .

بەکلیکێک لەسەر سمبولەکانی خوارەوە ، ئەم بابەتە دەگات بەهاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies