رێبوار حەمەوەیس : یەکێتى و یەکگرتوو .

ئەو قەیرانە سیاسى و ئابورییانەى هەرێمى کوردستانیان گرتۆتەوە لە دواى رێگریکردن لە سەرۆکى پەرلەمانى کوردستان و دەرکردنى وەزیرەکانى گۆڕان لە حکومەت بەبڕیارى مەکتەبى پارتى دیموکراتى کوردستان ، جگەلەوەى تاڕادەیەکى زۆر رەنگى سنورەکانى دوو ئیدارەیى تۆخکردەوە ، هێزو لایەنە سیاسیەکانیشى بەسەر دوو بەرەدا دابەشکردوە .
بە پێى لێدوان و هەڵوێستە راگەیەنراوەکانیان ، بەشێک لە هێزو لایەنە سیاسیەکان کە بریتین لە باڵی ناڕازیى یەکێتى نیشتمانى کوردستان و باڵى دهۆکى یەکگرتووى ئیسلامى و کۆتاکان و چەند حزبێک کە خاوەنى یەک کورسین لە پەرلەمانى کوردستان ، لە بەرەى پارتى دیموکراتى کوردستاندان و پشتیوانى سیاسەتەکانى ئەو حزبە لەناوخۆ و دەرەوەى هەرێمى کوردستان دەکەن ، ئەم بەرەیەش نزیکە لە دەوڵەتى تورکیا بە سەرۆکایەتى ئاکەپە ،
بەشێکى تریش لە هێزو لایەنە سیاسیەکان کە بریتین لە باڵى دەستڕۆیشتوى یەکێتى نیشتمانى کوردستان و باڵى سلێمانى یەکگرتووى ئیسلامى و کۆمەڵى ئیسلامى ، بە جۆرێک لە جۆرەکان و لە رێگەى وتارو لێدوانەکانەوە هاوشانى بزوتنەوەى گۆڕان سیاسەت دەکەن و پێیان وایە ئەوەى پارتى لە دواى ئۆکتۆبەرى ساڵى 2015 دا کردى نایاساییەو بۆتە مایەى قوڵبونەوەى قەیرانەکان ، لایەنەکانى ئەم بەرەیەیە تێڕوانینیان بۆ چارەسەرکردنى قەیران و پرسە سیاسیەکانى ناوخۆ و دەرەوەى هەرێمیش لەیەکەوە نزیکە ، هەموشیان پێکەوە تاڕادەیەکى زۆر لە بەغدادو ئێرانەوە نزیکن .
جگەلە یەکێتى و یەکگرتوو ، گشت لایەنەکانى تر خۆیان لە نێوان ئەو دوو بەرەیەدا یەکلاکردۆتەوەو چاوەڕێن دۆخەکە لەبەرژەوەندییان بشکێتەوە .
دابەشبونى یەکێتى و یەکگرتوو بەسەر بەرەى گۆڕان و پارتى پەیوەندى بە کۆمەڵێک فاکتەرى ناوخۆیى و دەرەکى ئەو دوو حزبەوە هەیە ، دۆخى ناوخۆى ئەو دوو حزبەش وایکردوە ، چ گۆڕان و چ پارتیش ، نەتوانن ئامانجە سیاسیەکانیان بەدى بهێنن ، بەو واتایەى تا ئێستا گۆڕان نەیتوانیوە زۆرینەى پەرلەمانى کۆبکاتەوە بۆ هەموارکردنەوەى یاساى سەرۆکایەتى هەرێم و پرسى چاکسازى و داهاتى نەوت . پارتیش بە هەمان شێوە تا ئێستا نەیتوانیوە زۆرینەى پەرلەمان کۆبکاتەوە بۆ رێکخستنى دانیشتنى پەرلەمانى کوردستان و هەڵبژاردنى دەستەیەکى نوێ بۆ پەرلەمان و سەرلەنوێ پێکهێناوەى حکومەت بەبێ گۆڕان و کۆمەڵى ئیسلامی ، ئەم مەبەستەى پارتى لە دوا پەیامى بارزانیدا ئاراستەى لایەنە سیاسیەکانى کرد .
یەکێتى کە خاوەنى هەژدە کورسى پەرلەمان و یەکگرتووش خاوەنى 10 کورسى پەرلەمان ، دواى تێپەڕبونى چەند مانگێک بەسەر پەکخستنى پەرلەمان ، روئیایەکى رونیان نیەو هێڵى سێیەمیان هەڵبژاردوە کەئەویش چارەسەرکردنى کێشەکانە لەرێگەى گفتوگۆ و دانیشتنى گۆڕان و پارتى ، ئەم رێگاچارەیەش تا ئێستا بێ ئاکام بوە لەبەرئەوەى گۆڕان سورە لەسەر دەستبەکاربونەوەى سەرۆکى پەرلەمان بەر لە کۆبونەوە ، پارتیش بەهەموو جۆرێک گەڕانەوەى دکتۆر یوسف محەمەد وەک سەرۆکى پەرلەمان بۆ هەولێر رەتدەکاتەوە .
هەڵبژاردنى رێگاى سێیەم لەلایەن یەکێتى و یەکگرتووى ئیسلامیەوە ، ئەوەندەى پەیوەندى بەدۆخى سیاسى و ئابورى و بەرژەوەندى باڵەکانى ئەو دوو حزبەوە هەیە ئەوەندە پەیوەندى بە هەوڵى جدى ئەو دوو حزبەوە نیە بۆ دەربازبوون لە قەیرانەکان ، چونکە سەرکردایەتى ئەو حزبە باش دەزانن کەتواناى بڕیاردانیان نیەو لە حالەتێکیشدا ، گەر بڕیارى خۆ یەکلاکردنەوە بدەن ئەوا جیابونەوەى باڵێکیان دەبێتە کارێکى حەتمى .

بەکلیکێک لەسەر سمبولەکانی خوارەوە ئەم بابەتە دەگات بەهاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies