tenha-5

پشکۆ نەجمەدین : ڕامـــــــــــــــان .

(( بۆ تۆ ! کە ئێستایش چاوەکانت، ڕەنگی هەنگوینیان لێ دەڕژێ و هەناسەت بۆنی وەنەوشە .. بۆ تۆ ))

نە دەتوانم بیرێک لە تۆ بکەمەوە ،

نە لە شیعر ،

نە لە سبەینێی ئەم شەوە ،

خۆیشم هەر هیچ ..

لە ژاوەژاوی شەوگاردا :

گیانم لەبەر سامی جەستەی بیرکردنەوە هەڵدەلەرزێت

بیرم تەنها لە قووڵاییی بیرکردنەوە ڕادەمێنێت

تۆیش لە چاوی تێڕاماندا سەوز دەبیت .

شەوان پرچی ئەستێرانت دەهۆنییەوە و

بەیانیانیش بە دەستێکی پڕ لە هەتاو

لە ملی ڕۆژت دەئاڵاند ..

گەر تۆ نەبای

ڕۆژەکانیش وەکو تەنیایی تاریک و

وەک نامۆیی بێ دڵ دەبوون .

سەرت : شەپۆلی بەکڵپەی خەونەکانت .

ڕۆحت: ئارام وەک شنەبا و

ناخت : باخچەی ئەو گوڵانەی بە تارای تەم داپۆشرابوون .

ئێستە لە کوێی ؟

ڕنەگبێ نهۆ لە سێبەری دارەوەنێکی هەڵچوودا

لە جێلەلەی کۆچەڵەی ئەو یادەوەرییانە بڕوانیت

کە تەرزەی مەرگ دایشۆریون ..

ڕەنگبێ ئێستا

سواری سەرکۆڵی ئەسپێ بیت ،

زینی : گوڵدۆزبێ بە گومان ،

یاڵی : هەڵژنراو لە بۆنی پەلکەزێڕینەی خوێنی خۆت ،

چوارپەل : لە ڕەنگی ونبوون و

ناڵەکانی : زاخاودراو بە تەمتومان.

ئەی تۆ کەنگێ سەری ئەسپت

بەرەو شەوی شاری دڵم وەردەگێڕی ؟

تۆ کەی دێیت و کڵپەی سەرت

لە بوونمدا جێ دەهێڵی ؟

لەسەر مەرزی فەنابووندا چاوەڕێتم ،

تۆ کەی ڤیزەم بۆ دەهێنی ؟

1997

431 جار بینــراوە لەڕەهێڵپۆست

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies