Mustafa-Qaid-Qadir

پەشێو حەمەئەمین : چاکسازی ئاوا ناکرێ جەنابی وەزیر ..

بەڕێز جەنابی وەزیر

وەك دەزانین لە ئیستادا کوردستان لەژێر مەترسیەکی گەورەی تیرۆردایە بە هەموو ماناکانیەوە ، لە گرنگترینیان تیرۆری خاك وتیرۆری مرۆیی وتیرۆری ئابووری ، ئەویش لە ئەنجامی سەرهەڵدانی ئەو گرووپە تیرۆرستیە بێ ئامانجەی ڕووی لە ناوچەکە کردووە ، بەڕێزیشتان کەسی یەکەمن لە ڕووی ئەمنیەوە بۆ بەگژدا چوونەوەی ئەم ڕەوشەو ئاسایی کردنەوەی باروودۆخەکە . بەڵام ئایا قەت لە خۆتان پرسیوە کە ئێوە کێن و چ کارەن ؟ ئایا بەڕاست کەسی یەکەمن ؟ لەوانەیە وەڵامدانەوەی ئەو پرسیارە بۆ بەڕێزتان چەند ڕەهەندێکی هەبێ ، کە پەیوەست بن بە نهێنی سیاسەتەوە ، بەڵام ئەوەی کەهاونیشتمانیان لێی گەیشتوون وچاودێرانی سیاسی دەیخوێننەوە باگراوندێکی تری هەیە .
ئەوەندەی کە ئێمە سەرنجمان داوە بەڕێزتان زیاتر لە پێشمەرگەیەکی گەڕۆکدەچن ، کە ڕەها کرابێ بۆ هەرشوێنێك کە پێی خۆش بێ بچێ ، نەك وەزیرێك کە خاوەنی هەموو جۆرە بڕیارێک بێ لە نێو وەزارەتێکدا . پێم وانیە لەوەدا هەڵە بم کە پێتان بڵێم ئێوە کەسێکی دڵسۆزن و دەتانەوێ کاری باش بکەن ، چونکە ڕابردوتان سەلمێنەری ئەو ڕاستیەیە ، بەڵام لێرەدا ئەو کەسە کاری باش دەکات ، کە بتوانێ دەسەڵات و هەیمەنەی خۆی بەسەر بنەما حیزبیەکاندا زاڵ بکات و یاسا کۆنەکان تێکبشکێنێ و لە جێگایان یاسای نیشتمانی دابنێ . بەڵام ئایا دەتوانن بڵێن لە هەوڵدانتان بۆ ئەو کارە سەر کەوتوو بوون وئامانجتان پێکاوە ؟ بێگوومان نەخێر.
ئێمە دەستخۆشیمان بۆسادەیی و بەسەر کردنەوەی بەرەکانی جەنگ و کردنەوەی دەرگای وەزارەتەکەت هەیە بەڕووی هاوڵاتیاندا ، بەڵام کێشەی هەرە گەورەی ئەم وەزارەتەی بەڕێزتان کەمی مووچەی پێشمەرگەو گەندەڵی و بێ چەکی و زاڵ بونی هەیمەنەی حیزبە بەسەریدا . لە تەواوی دنیادا وەزارەتی پشمەرگە پڕۆسێسی خۆی هەیە ، دەزگایەیەکی نیشتمانی بە یاسا ڕێکخراوە بۆ بەگژدا چوونەوەی تیرۆروو پاراستنی سنوورو ئارامی ووڵات ، ئیتر لە هەر ووڵاتێك بە ناونیشانی جیا جیا . بەڵام ئایا لە وەزارەکەی ئێوەدا چ بەهایەك ماوەتەوە بۆ بەنیشتمانی بوون ؟ لە چالاکیەکانی ئەم ڕۆژانەی دووایدا ئەوە ئاشکرا بووکە شتێك نەماوە بە ناوی وەزارەتی پێشمەرگە ، کە هەڵگری بنەما نیشتمانیەکان بێ ، چونکە ئاڵاسەوزەکەی یەکێتی وئاڵا زەردەکەی پارتی لە ڕەبیەکاندا زۆر بەرزتر لە ئاڵای کوردستان چووبونە کەشکەڵانی فەلەك .

پێشمەرگەیەك بۆی گێڕامەوە ووتی بایی سەدوو هەشتا هەزارفیشەکم لە حیسابی خۆم کڕی وچووم بۆ سەنگەر ، پاش یەك دوو ڕۆژ لە مانەوەو بەرگریدا . ووتی هەواڵیان پێ داین کە بەڕێزتان لە گوێڕ بەسەریان دەکەنەوە ، فەرمووی زۆرخۆشحاڵ بووین بەئەندازەیەك کەزارمان زیاتر پێکەنینی هەڵنەدەگرت ، کە پێیان وابوو چەك و خواردن وهاوکاریان بۆ دەبەن ، چونکە پێیان وابوو لوتفی وەزیر زیاتر لەوە دەنوێنێ لەوەی کەسێکی ئاسایی بەسەریان بکاتەوە ، ووتی بەر لەچوونی جەنابتان لە نێو خۆیاندا پارەیان کۆکردبوەوە و ئاویان پێ کڕی بووکە بۆ خۆیان نەبوو بیخۆن ، تا لەئانی گەیشتنتدا تینوێتیت بشکێنن وبەو ئاماژەیە پێت بڵێن کە خۆشیان دەوێی ، بەڵام ووتی بەگەیشتنی ئەونە چەك نە هاوکاری نەخواردن تەنانەت ئاویشیان بۆ نەهێشتینەوە بۆشەویش کەوتبوونە بۆسەی داعشەوەو لە نێویاندا خاڵی شەهید بوو بوو .

ئەم چیرۆکەی سەرەوە بۆبەڵگەدارکردنی بێ دەسەڵاتی جەنابتانە ، کە دڵنیام بۆ خۆتان ئەو ڕەوشەتان بە دڵ نیە ، من لێرەدا چەند پرسیارێکت ئاڕاستە دەکەم بە هیوام پێت بگەن !

+ پێشمەرگەو وەزارەت لەم جەنگەدا چ ڕۆڵێکیان پێ درا ؟
+ ئایا یەکێتی و پارتی ئیسغلالی ئەو ڕۆڵەیان نەکرد؟
+ لێرەدا گرنگترین پرسیار ئەوەیە ، چۆن دەبێ وەزارەتێك کە سەروەتی نیشتمانی گەلێکە ، بە قەد دەزگایەکی حیزبی چەكی نەبێ ؟
+ هەست ناکەن ڕٶڵتان لە نێو ئەم وەزارەتە ، ناگاتە ڕۆڵی ئەندامێکی سەرکردایەتی حیزبیك چ یەکێتی بێ چ پارتی ؟
+ باشە بۆ ناپرسن کە بەدەیان هەزار نفووزی پێشمەرگە هەیە کە مووچە لەو وەزارەتە وەردەگرن ،ئەی ئیستا لە کوێن و بۆ دەبێ چاوتان لە هاونیشتمانیان بێ تا بەخۆبەخش چەکتان بۆ هەڵگرن ؟
+ بۆ ڕێگە دەدەن ئەوەندە کەسانی هەلپەرست ومزایەدە چی ، بە قاتی کروو کڵاشی پەڕۆینەوە ، لە بەرەکانی جەنگدا بەکامێرایەکەوە وەك پاڵەوانی حیزب خۆیان نیشان دەن ؟
+ بۆ چی بڕیار نادەن جگە لە ووتە بێژی وەزارەتی پێشمەرگە هیچ کە س ولایەنێك بۆی نەبێ لێدووان بدا ؟
+ پێتان وانیە ئەو قسەیە ڕاست دەرچوو کە بەر لە پێکهێنانی حکوومەت ، ئەندامێکی مەکتەبی سیاسی یەکێتی ووتی گەر وەزارەتی پێشمەرگە بدرێت بەگۆڕان ، ئێمە چەکەکانی هێزەکانی حەفتایان ڕادەستیان ناکەین وهیچ ئیلتزامیكی پێوە ناکەین ؟

بەڕێز جەنابی وەزیر ..
ئەمانە ئەو ڕاستیانەن کە ئێمەی ئومێد سارد کردووەو، تەواوی پێشمەرگە دڵسۆزەکانیشی نیگەران کردووە ، باشیش دەزانم کە بۆ خۆتان بە باشی درکتان پێ کردووە ، ئیتر کە ئەمە لاشەی وەزارەتەکەت بێ .
چۆن دەتوانی هێزەکانی حەفتاو هەشتا یەکبخەیتەوەو دەستی حیزبی لێ دوور خەیتەوە ؟
چۆن دەتوانی گەندەڵیەکانی تیا نەهێڵیت و مووچەی پێشمەرگە زیاد بکەیت چاکسازی بکەیت ؟
چۆن دەتوانی شەرعیەتی زیاتر بدەیتە ئاڵای کوردستان ؟ لە کاتێکدا لای ئەوان هیچ بەهایەکی بۆ نەماوەو ئەوەی مقەدەس بێ ئاڵا سەوزوو زەردەکەی خۆیانە !
بەڕێز جەنابی وەزیر بە دووای مەرهەمدا مەگەڕێ ، چونکە ڤایرۆسی حیزب سەراپای باڵای وەزارەتەکەتی داپۆشیوە .
ماوەیەك لەمەوبەر (بەڕێز نەوشیروان مستەفا ) لە ووتارێکیدا ووتی ، گرێبەستی دەنگ دەرەکانی گۆڕان لە گەڵ بزووتنەوەی گۆڕاندا ، بۆ هەفتەیەك و دوو هەفتەو ، مانگ و دوومانگ نیە ، بە ڵكو بۆ چوار ساڵە .
ئێوەش کە خەڵکی دەنگی پێداون و بەڵێنتان بە بڕینی دەستی حیزب داوە لە نێو حکوومەتدا ، ئیتر خەڵکی زۆر ڕەشبینە لێتان کە بتوانن ئەو دەستە ببڕن ، ئەمە نا لە بەر ئەوەی کە ئێوە خاوەن بەڵێن نەبوون ، بەڵکوو لە بیری ئەوباوەڕە سەختەی یەکێتی و پارتیەوە سەرچاوەی گرتووە ، کە تا ئیستا باوەڕیان بەو پڕەنسیپە نیە کە دەبێ دەست لە کاری حکومی هەڵگرن .
لەوانەیە بەڕێزتان پاساوی ئەوەتان هەبێ کە لەسەرەتای ڕێگادان و هێشتا لە کەناردان ، بەڵام تاریکی مانگ سەر لە ئێوارە دیارە ، بۆیە لەم حکوومەتە سەدا سەد حیزبیەدا ، ئەستێرەی ئەمەلتان دڵنیام نادیارە .
لە کۆتاییدا دەڵێم ئەوەی کە لەسەر شانی ئێوە بێت ، ووتنی ڕاستیەکانە ، وەڕێگە چارەش ، یا ئەوەتا سەقفێکی زەمەنی دابنێن و دووا ئیزاری خۆتان بدەن ، یا ئەوەتانێ دەست لە کار بکێشنەوە و ڕووی خۆتان لەوەی کە ئیستا هەن جوانتر بکەن .

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies