شاناز ئیبراهیم ئەحمەد : دەڵێی نە بایان دیوە و نە باران !

بریارم دابوو کە لەسەر هەموو بابەتێک قسە نەکەم و زۆر شت جێ بهێڵم بۆ کەسانیتر ، بەڵام بە خوا هەر چەندم کرد خۆم پێ نەگیرا ، کە رای خۆم سەبارەت بە چاکسازییەکەی حکومەتەکەمان دەرنەبڕم . 

بەرێزان منیش وەک هەمووان موشتاقی گوێبیستی ئەو چاکسازییە بووم ، کە حکومەت بەتەما بوو بیکات .. و بە پەرۆشەوە وویستم پرۆژەکە بخوێنمەوە و منیش وەک ئێوە تا سەر ئیسقان لەگەڵ چاکسازیدام ، بەڵام لێتان ناشارمەوە پاش خوێندنەوەی خاڵی یەکەم ئیتر باقیەکەیم نە خوێندەوە .. بڵێن بۆ ؟
جارێ پێش هەموو شتێک نەدەبووایی کە بە بێ ئامادە بوونی ئەو وەزیرانەی کە بە فەرمانی قەرەقۆش لادرابوون ئەنجومەنی وەزیران کۆبونەوەی ئەنجامی بدا ، چونکە ئەوە بە واتای چەسپاندنی حوکمی دیکتاتۆری و پەسەند کردنی بریاری تاکرەوانە دێت .. سەبارەت بە پرۆژەکەش پاش ئەوەی ، کە یەکەمین خاڵم خوێندەوە کە نوسرابوو لە سەدا پەنجای دەرماڵەی سەرۆکی هەرێم و جێگرەکەی کەم دەکرێتەوە .. ئیتر خۆم ماندوو نەکرد بە خوێندنەوەی خاڵەکانی دووایی ..
پێم سەیر بوو کە حکومەتی هەرێم تا وەکو ئێستا درکی بەوە نەکردوە کە هەرێمەکەی بێ سەرۆک و بێ جێگرە .. و لە باتی ئەوەی بڵێت کە تەواوی مووچە و دەرماڵەی ئەو دوو پۆستەمان بڕی و تەنیا خانەنشێنیەکەیان بۆ سەرف دەکرێت کەچی هاتوون و وەک ئەوەی کە نە بایان دیبێت و نەباران و نە کێشەی کورسیەکەیان بە کێشەی سەرەکی هەرێمەکەیان دانابێت و نە زۆربەی قەیرانەکان و نە شکستی حەیران و سازانەکانیان گەراندبێتەوە بۆ بە زۆر هێشتنەوەی ئەو پۆستە هاتوون و دەڵێن وەڵا لە ١-١-٢٠١٦ وە نیوەی دەرماڵەکانیان دەبڕین ! خۆ لەوانەیە کە من هەڵە بم و مەبەستیان لە سەرۆک و جێگری داهاتووی هەرێم بێت و رەنگیشە پێدانی دەرماڵە مافێکی رەوای خانەنشینان بێت ، بەڵام ئەوەی کە دڵنیام لێێ ئەوەیە کە هەرێم نە سەرۆک و نە جێگری سەرۆکی نیە لەم کاتەدا .
گەر چی دڵنیام لە نیەت پاکی و هەوڵی بێ ووچانی جێگری سەروکی حکومەت بۆ دەرباز بوون لە قەیرانە ئابورییەکان ، بەڵام دڵگرانم کە هەوڵەکان بە شێوازێکیتر دەقوزرێنەوە و بە ئاقارێکی تردا دەبرێن !! ئەمە جگە لەوەی کە ئەم لەملاوە یەک لایەنە باس لە دروست کردنی دەوڵەت دەکات و ئەویتر پاش ئەو هەموو قوربانیدانەی حزبەکەی لە باتی ئەوەی کە وەک هەمیشە دەستپێشخەری حزبەکەی دەرخات ، کەچی قەرزارباریشمان دەکات و دەڵێت : گەر دژی راگەیاندنی ئیمارەتە مەزهەبیکەی هەرێم بین ئەوا خائینین و ، ئەوەکەی تر کۆبونەوە بە کابینەیکی خاوەن چەندین پۆستی کاتی دەکات ئەوەکەیتریش لەولاوە داوای ریفراندۆم دەکات ، لە کاتێکدا کە هەرێم بێ پەرلەمانە و لە مەملەکەتەکەماندا پرۆسەی ‌قڕو‌قپ پەیرەو دەکرێت .

بەکلیکێک لەسەر سمبولەکانی خوارەوە ، ئەم بابەتە بنێرە بۆ هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies