شێرزاد شێخان حوسێن : كۆچكردن بۆ هەندەران تاوانە .

له مامۆستایەكی ئاینیم بیست كه ، كۆچكردن بۆ نیشتیمانی كافران گوناهێكی گەورەیه ، ئەوەی موسڵمان بێت ، نابئ بەرەو خاكی كافران سەر هەڵگرێ .

من ، لەو مامۆستایە و چەند مامۆستایەكی دیكەش دەپرسم : ئەرێ‌ ئێوە چۆن مامەڵە لەگەڵ ڕووداوەكانی ڕۆژەڤ دەكەن ؟ كوانێ‌ ئەڵتەرناتیڤی ئێوە بۆ ئەم قەیرانە تاقەت پڕوكێنەی كە هەرێمی باشوری كوردستانی تێكەوتووە ؟ ئەی ئێوە چی لەبارەی ئازادییەكانی تاك لێرە و لەوێ‌ دەزانن ؟ دەكرێ‌ پێمان بڵێن مافە مەدەنییەكانی ئێرە و ئەوێ‌ چین ؟ 

تۆ بەبێ‌‌ خوێندنەوەیەكی واقیعی لەسەر بارودۆخی هەرێمی باشوری كوردستان ، هەرگیز ناتوانی فتوایەكی لەو جۆرە دەربكەی . ئەی چی لەبارەی ژیان و گوزەرانی ئەوێ‌ دەزانی كە ، زانینی پێویستییەكی حەتمییە .  چ قسەیەكت بۆ ئەو ڕێژە زۆرەی موسڵمانانی ئەوێ‌ هەیە .  بە تێگەیشتنی من ، تۆ مەبەستت ئەوەیە كە ئەوێ‌ نیشتیمانی كوفرە و كوردستانیش نیشتیمانی ئیماندارانی ئایینی پیرۆزی ئیسلامە و گورگ و مەڕ بەیەكەوە ئاو دەخۆنەوە ، بە مانایەكی تر له كوردستان گەر هیچت نەبێ‌ خۆ دینەكەت هەیه با مووچە و نانیشت نەبێ ‌.  با یاساش سەروەر نەبێ‌ خۆ لەناو موسڵمانانی ، لە كاتێكدا برسیێتی زۆر كاریگەرە لەسەر بیروباوەڕی تاكەكان ، بۆیە ئیمامی عەلی دەفەرمووێ‌ :  ئەگەر هەژاری پیاوێك بوایە دەمكوشت ، لێ‌ كارەساتی گەورەتر لەو هەرێمەی مامۆستا لەوەدایە كە زۆربەی هەژرەكانی لەژێر هێلی هەژاریدا دەناڵێنن

من جارێكی دیكە دەپرسم :

ئایا ئەو ڕێسا و یاسایانەی كە لە ئایینی پیرۆزی ئیسلامدا هاتووە ، تۆ و خەڵكی كوردستان وەك پێویست جێ‌ بە جێی دەكەن ؟ بە دڵنیاییەوە نەخێر ، بە بەڵگەی ئەوەی كە ئەگەر جەنابت وەك مامۆستایەكی ئایینی باس لە ڕاستییەكانی ژیان و گوزەرانی خەڵك بكەی و هۆكارە ڕاستەقینەكانی ئەو قەیرانانەی هەرێمی باشوری كوردستان بخەیەڕوو ئەوا بەلایەنی كەمەوە ڕیشت دەسوتێنن.

لەو خەوە قووڵە بەئاگا وەرەوە و خەڵكەكەش لەگەڵ خۆت بەخەبەر بێنە . ئەزانی ئەم هەرێمە هەڕاجكراوە لە چ بارودۆخێكی سەختدایە .  بۆ نموونە ؛ مووچەخۆری ئەم بەناو حكومەتە ، كە (5 بۆ  6) مانگ مووچەكەی پێ‌ نەدراوە و لە خانووی كرێشدا دەژی .  بەو هۆیەوە خۆی دەكوژێ ‌.  پێشمەرگەیەك لە بەرەكانی جەنگ دژی داعش   دەڵێ‌ : ( من ، لە داعش ناترسێم ، بەڵام لە خاوەن خانووەكەم دەترسێم  .  ئێستا چ قسەیەكت هەیە بۆ ئەو دوو نموونەیە لە نێو سەدان و هەزاران نموونەی دیكە ؟

 پێشمەرگەیەك كە لە زێدی باب و باپیرانی چوار دیوارێكی پێ‌ ڕەوا نەبینرێ ‌، بۆچی ئەوروپا و ، باشتر نییە . هاوكات ئێمە لەوێ‌ پەنابەر و بێگانەین سەبارەت بە خەڵكی ڕەسەنی ئەوێ‌ ، كەچی شوێنی حەوانەوە و مووچەی ژیان و سەرجەم خزمەتگوزارییەكانمان بۆ دابین دەكەن . بە بۆچوونی من ، لە هەر ڕووبەرێكی ئەم گۆی زەوییە مافەكانت فەراهەم بێت ، ئەو شوێنە نیشتیمانە . لەوەش واوەتر دەڕۆم و دەڵێم : ئێوە قەبارەی ئایینی پیرۆزی ئیسلام بچووك دەكەنەوە ، چەنكە بەپێی قسەكانتان ، ئەو ئایینەی كە لە بنەڕەتدا ڕەحمەتە بۆ جیهانیان ، كەچی بە سنوور و  ڕووبەرەوە دەیبەستنەوە و بەرتەسكی دەكەنەوە .

 تۆ لە وڵاتێكدا دەژی كە دزی و گەندەڵی و ستەم و بێ‌ دادی كۆمەڵایەتی و … هتد بووە بە بەشێك لە پەروەردە و بوونی تاكەكان و هەر كەسە و بەپێی ئەو دەسەڵاتەی كە هەیەتی لەبەرامبەر ئەوانی دیكە ئەنجامی دەدات ، هەر هیچ نەبێ‌ بیر لە سیستەمی حوكمڕانی وڵات بكەوە و بزانە دەتوانی ناوێكی لێ‌ بنێی !

 پێشمەرگەیەك كاتێ‌ شەهید دەبێ‌ ، خێزان و منداڵەكانی ناچار بە سواڵكردن دەبن .  لەوە زیاتر ماوە .

 با بەراوردێكی بچووكی ئەوروپا و كوردستان بكەم لەسەر بنەمای ئایینی پیرۆزی ئیسلام :

ئیسلام دەڵێ‌ : درۆ مەكەن ، ئەوان نایكەن . ئیسلام دەڵێ‌ ناپاكی مەكەن ، ئەوان نایكەن . ئیسلام دەڵێ ‌: فێڵ لە كڕین و فرۆشتن مەكەن ، ئەوان نایكەن . ئیسلام دەڵێ : بەزەییتان بەیەكتردا بێتەوە ،  ئەوان لەگەڵ خۆیان و ئەوانی دیكەش بەزەیی و مێهرەبانن . ئیسلام دەڵێ ‌: لەگەڵ یەكتر لێبووردەیی بنوێنن ، ئەوان زۆر لێبووردەن . ئیسلام دەڵێ‌ : ڕوو خۆش و دەم بەخەندە و قسە خۆش بن ،  ئەوان بەتەواوی وەهان . ئیسلام دەڵێ ‌: مافی مرۆڤ پێشێل مەكەن ، ئەوان پێشێلی ناكەن . ئیسلام دەڵێ‌ : مافی گیانداران بپارێزن ، ئەوان بە زیادەوە دەیپارێزن . ئیسلام دەڵێ ‌: جیاوازی لە نێوان كەسەكاندا مەكەن ، ئەوان نایكەن . ئیسلام دەڵێ‌ : بە فیزەوە مەڕۆن و خۆتان لێ‌ نەگۆڕێ ، ئەوان ئەگەر لە پلە و پایەیەكی زۆریش بەرزدا بن ئەوا لەگەڵ كەسە زۆر سادەكان دادەنیشن و قسە دەكەن و گاڵتە و گەپ و سەما دەكەن .

ئیسلام دەڵێ‌ : كەسەكان هەریەكەیان بەپێی توانای خۆیان بەرپرسیاریەتیان هەیە ، ئەوان كە جگەرەفرۆشێكیان منداڵێ‌ بچێتە لای و بییەوێ‌ جگەرەی لێ‌ بكڕێ‌ ئەوا پێی نافرۆشێ‌ و دەڵێ‌ هێشتا تۆ بچووكی ، بەڵام لە هەرێمەكەی مامۆستا باوكەكان منداڵە زۆر بچووكەكانیان دنێرن بۆ ماركێت و دوكانی كوچە و كۆڵانەكان بۆ ئەوەی پاكەتی جگەرە بۆ باوكیان بكڕن .

 ئیسلام دەڵێ ‌: مرۆڤ ڕێزدارە ، ئەوان بە كردار ڕێز لە مرۆڤ دەگرن ، بۆ نموونە ؛ ئۆتۆمبێلەكانیان لە هەر خێراییەكدا بن كاتێ‌ پیادەڕۆیەك دەپەڕێتەوە با لەسەر هێڵی سپی (zebra crossing) نەبێ‌ و مخالفیش بێت ، ئۆتۆمبێلەكە دەوەستێ‌ تا ئەو كەسە دەپەڕێتەوە و تەنانەت هۆڕینیشی بۆ لێنادات .

ئەوان  ١٠٠٪ ئیسلامەتی لە مامەڵە كردنیان لەگەڵ دەوروبەرەكەیان ڕەنگیداوەتەوە .

 بەڵام ئێمە ، نوێژ دەكەین و ڕۆژوو دەگرین و …هتد ، لە هەمان كاتدا درۆ دەكەین ، خیانەت دەكەین ، فێڵ دەكەین ، قۆرخكاری دەكەین ، دزی دەكەین ، داوێنپیسی دەكەین ، قسە دێنین و دەبەین ، شەڕ دەكەین و خەڵك بە شەڕ دێنین ، بڕوانامە دەكڕین و پارەی پێوەدەخۆین ، ملیۆنێك و چوار سەد هەزار مووچەخۆر لە هەرێمەكەی مامۆستا هەیە كەچی حەوت سەد هەزاری بە فعلی دەوام دەكەن ، واتە ؛  بندیواریشمان هەیە .

 بە كوردی و بە كورتی ئێمە ، زۆربەی هەرە زۆری گوفتار و كردارەكانمان دژی مرۆڤایەتی و پێكەوە ژیانە لە بەرگی ئیسلامدا .

 بە مەبەستی وەبیرهێنانەوەو دەڵێم ‌: ئیمه نه دەزانین ئیسلام بین نه دەزانین ئینسان بین ، وەك ئاشكرایە كە ، ئەوروپا و … بە ئینسانیەت دەژین ، لێ‌ ئێمە ، بەداخەوە نە ئیسلامیەتمان هەیە نە ئینسانیەت .

هەنووكە پێم بڵێ‌ چوونم بۆ ئەوروپا چ عەیبێكی تیایە یاخود چ زیانێكی هەیە ؟ خۆم وەڵامەكەش ئەدەمەوە ، باوەڕ بكە لە ئەوروپا فێری ژیان دەبی و هەست بە بەهای ئینسانبوون دەكەی ، بۆیەشە تكا لە بەڕێزت دەكەم تۆش وەرە و بزانە لەوێ‌ ئازادتری یان لێرە ، مەترسە خودا لە هەموو شوێنێكە و لێرەش دەتوانی خواپەرستی بكەی .

 كەواتە ؛ نووستنم لەسەر شۆستە و شەقامەكانی ئەوروپا زۆر شەرەفمەندانەترە لە ژیانێك لەژێر سایەی حوكمی مافیاكان و بازرگانەكانی نەوت لە هەرێمەكەی مامۆستا .

بە کلیکێک لەسەر سمبولەکانی خوارەوە ، ئەم بابەتە دەگات بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies