ڕەسوڵ بۆسکێنى : خەمى نیشتمان و یادێک لە کۆڕەوەکەى 1991 .

ئێستا لەهەموو کات زیاتر ڕاى گشتى جیهان گەواهى دلێری و قارەمانى نەتەوەى کورد دەدەن ، هەر لەسەرەتاوە نەتەوەى کورد گەورەترین هێزى دوژمنانى تێکشکاندووە ، لافاوى هێرشەکانى ئەکەدى و ئاشوورى و مەغۆل و فارس و عەرەب لەبەردەم قارەمانیەتى کوردا خۆیان نەگرتووە و وەک بەفرى بەرخۆرەتاوى بەهار تواونەتەوە ، لەبەرامبەردا هەمیشە سەرکردەکانى کورد ناکۆک و دژ بەیەک ڕەفتاریان کردووە و ئەگەر سەرکەوتن و تێکشکانى دوژمنەکانیان لەمەیدانى شەڕدا مسۆگەر بووە ، بەڵام لەڕێگاى ململانێ و کەڵەوەکێشى نێو خۆیان دوژمنەکان دووبەرەکیان لەنێوان دروست کردوون و ڕەنجى قارەمانیەتیان بەبادا چووە و بەسەریاندا زاڵ بوون ، کێشە و ناکۆکى و ململانێ و دووبەرەکى نێوان کوردەکان هێندە کاریگەر و سەرسوڕهێنەرە چەندین داستان و ئەفسانەى بۆ هۆنراوەتەوە ، لە گێڕانەوەیەکیشدا تاوانەکەیان دەملى سەرکردەى ئیسلام خالیدى کوڕى وەلید ڕاکردووە ، گوایە خالید لەخواى گەورە پاڕاوەتەوە و نزاى کردووە هەرگیز کورد یەکنەگرن ، ئەگەر یەک گرتووبن دەڕۆستیان نایەن ، لەڕاستیدا ململانێى کوردەکان زۆر لەپێش خالیدەوە بەردەوام بووە ، دەگەڕێتەوە بۆ پێش سەردەمى ئیسلام و مەغۆل و عوسمانى و هەتا هاتنى ئینگلیزیش گەورەترین کێشەى کورد ململانێى نێو خۆیان بووە ، بەشێوەیەک مرۆڤ دێتە سەر ئەو ڕایەى عوسمانى و ئینگلیزەکان لەناو هیچ نەتەوەیەکدا ئەوەندەى کورد سیاسەتى ” پەرتکەو زاڵ بە ” یان نەچەسپاندووە ، هەمیشە بەو هۆیەوە دوژمنەکان بەسەر کوردا زاڵ بوون .

 خۆشبەختانە بەهەوڵى بەردەوامى سەرکردەکان و بەتایبەت خودى جەنابى مام جەلال لە کۆتایى سەدەى بیستەم ئەو وەهمە شکا و هەموو لایەنەکان لەژێر چەترى بەرەى کوردستانى دا کۆبوونەوە و بەهاوکارى جەماوەرى تینووى ئازادى دانیشتوانى شارەکانى هەرێمى کوردستان یەک دەنگ و یەک هەڵوێست لە دامودەزگاکانى بەعس ڕاپەڕین و بۆ هەمیشە بەعسیان لەم نیشتمانە وەدەرنا ، بەداخەوە بەهۆى مەترسى هاوپەیمانان لە هاتنە سەرکارى حکومەتێکى دژبە سیاسەتى ئەوان دەستیان لەسەر سزادانى سەدام حسین سوک کرد و ئەویش بۆى لوا تۆڵەى خۆى لە شارەکانى باشوور کردەوە و پەلامارى هەرێمى کوردستانیشى دا ، دڕندانە کەوتە پەلاماردانى خەڵکى بێ دیفاعى کوردستان ، دانیشتوانى کوردستان بۆ بەرەنگاربوونەوەى بەعس و پاراستنى گیانى خۆیان دیسان یەک هەڵوێست لە کۆڕەوێکى یەک ملیۆنى دا هەڵوێستى خۆیان دژ بە ڕژێمى بەعس ڕاگەیاند ، بەمەش سەرنجى تەواوى بەرگریکارانى مافى مرۆڤ و سۆزى مرۆڤ دۆستانەى ڕاى گشتى جیهانى بەلاى خۆیدا ڕاکێشا ، بووە هۆى دابین کردنى هێڵى 36 بۆ پاراستن و بەرقەرار بوونى ئاسایش بۆ خەڵکى کوردستان .

دانیاڵ میتەران کەلە خەمخۆرى و پەرۆشى دا بۆ نەتەوەى کورد وەک دایکى کوردان ناسراوە ، ویستى خۆى لەنزیکەوە ئاگادارى بارودۆخەکە بێت لەبەر ئەوە هاتە کوردستان و چاوى بە بەڕێزان مەسعود بارزانى و نەوشیروان مستەفا کەوت ، لەکاتێکدا لەگەڵیان کەوتە گفتوگۆ بارزانى بەدانیال میتەرانى گووت کێشەى کورد کێشەیەکى گەورەیە و لە عیراق نەهامەتى زۆرى بەدەست ڕژێمى عیراقەوە چەشتووە ، ناکرێت کێشەى کورد تەنیا وەک کێشەیەکى مافى مرۆڤ سەیر بکرێت ، کێشەى کورد لەعیراق کێشەیەکى سیاسیە و پێویستە لە ڕیشەوە چارەسەر بکرێت ، دانیاڵ میتەران گووتى : من خۆشەویستیەکى زۆرم بۆ نەتەوەى کورد هەیە ، دەمەوێت کێشەى کورد وەک کێشەیەکى نەتەوایەتى بچێتە پێشەوە ، لە زۆربەى وڵاتانى دنیا داواى هاورکاریم بۆ نەتەوەى کورد کردووە ، بەڵام ئەوان دەڵێن ئێمە هاوکارى کورد ناکەین ، چونکە ئەوان لەنێوان خۆیان دا ناکۆکن ، لەو کاتەدا میتەران وەکو پرسیار ئاراستەى بارزانى کرد ئایا ئێستاش کورد لەنێوان خۆتان دا ناکۆکن ؟، بارزانى داشى سواربوو لەبەر ئەوەى هەموو کورد لەژێر چەترى بەرەى کوردستانى دا کۆبووەوە ، لەوەڵامى میتەران دا بارزانى گووتى نەخێر وەتى کورد هەیە وەکو ئێستا یەک دەنگ و یەکگرتوو نەبووە ، ئەم قسەیە نەک بۆ ئەوکات بەڵکو هەتا مێژوو ماوە مایەى خۆشحاڵى خەمخۆرانى نەتەوەى کوردە ، ئەى بۆ ئێستا بارزانى وەڵامى چیە ؟ لە کاتێکدا ڕێکخراوى تیرۆریستى داعشى مرۆڤ کوژ و دوژمنى مرۆڤایەتى لەسەر دەستى پێشمەرگە قارەمانەکانى کورد نابووت و پەک خراوە ، تەواوى دنیا شاهیدى فیداکارى نەتەوەى کوردە ، لەکاتێکدا دەوڵەتە زلهێز و بڕیار بەدەستەکانى دنیا لێمانەوە نزیکن و بەشدارى و چاودێرى کورد دەکەن ، لەکاتێکدا دوژمنانى کورد لەسەر هەر شتێک ناکوک بن لەسەر دژایەتى کورد یەک دەنگن و لەسەر مێزى گفتوگۆ کۆدەبنەوە ، لەکاتێکدا دۆستەکانمان هانمان دەدەن ناکۆکیەکانمان بخەینەلاوە و یەک هەڵوێست بین ، لەکاتێکدا بەهەستیارترین بارودۆخى سیاسى خۆماندا تێدەپەڕین ، ئایا ئێستا بارزانى دەتوانێ ئاوا بەدەنگى بەرز بڵێت وەتى کورد هەیە ئاوا یەک هەڵوێست نەبووە ، لەکاتێکدا بەشى هەرە زۆرى جەمسەرى هەموو ناکۆکیەکان بۆ بارزانى دەگەڕێتەوە ، چونکە ئەو خاوەنى سەرۆکى پەرلەمانە ، خاوەنى فراوانترین کوتلەى پەرلەمانیە ، خاوەنى سەرۆکى ئەنجومەنى وەزیرانە ، خاوەنى سەرۆکى ئاسایشى نەتەوەییە ، خاوەنى زۆربەى نوێنەرایەتیەکانى حکومەتى هەرێمە لە وڵاتانى دنیا ، و …..

سەرەڕاى هەموو ئەوانەش خۆشى سەرۆکى هەرێمى کوردستانە ، ئایا مەترسى لەچى هەیە ، بۆچى لەغیابى جەنابى مام جەلال وەک سەرۆکى هەمووان مامەڵە ناکات و هەمووان لەژێر چەترى یەک هەڵوێستى دا کۆ ناکاتەوە ، ئایا لایەنەکان نایانەوێ هەوڵى بارزانى بۆ ئەو یەک هەڵوێستیە لەبەرچاوبگرن ، لۆژیک ئەمە قبوڵ ناکا ، دەخوازین بارزانى کارى شێلگیرانە بۆ یەک هەڵوێستى هەمووان بکات و لایەنەکان لەیەک بەرەدا کۆبکاتەوە ، من نامەوێ بەقسەیەک وەڵام بدرێمەوە و کۆتایى بێت ، دیارە ئەمە لەخۆبوردوویى و فیداکارى دەوێ ، من لەگەڵ خەڵکى ستەم دیدەى کوردستان دا بەکردار دەمانەوێ کار بۆ یەک هەڵوێستى لایەنەکانى کوردستان بکرێ و وەک سەرکردەکانى ڕابردوو زیان بە خۆمان و وڵاتەکەمان نەگەیەنین ، کێشەى کورد مافى ڕەواى نەتەوەیەکە نەکەینە قوربانى حەزەکانى خۆمان ، ئێستا منیش وەک خانمى میتەران دەڵێم هەتا کورد لەنێوخۆیان دا ناکۆک بن کەس نایەوێ هاوکاریان بکات ، هەروەکو لەکاتى نەخشەکێشانى دەوڵەتى عیراق لەلایەن ئینگلیزەوە ، دواى دەستنیشان کردنى هەموو لایەنەکانى دەوڵەتى عیراق پرسیار کرا ئەى مەسەلەى کوردەکان چى لێ دێت ( مس بێل ) لەوەڵامدا گووتى کوردەکان با هەر خەریکى شەڕى عەشایرى خۆیان بن ، ئەگەر ئێمە لەڕابردووى سەرکردەکانى نەتەوەکەمان نیگەرانین ، بۆ لەمەودوا جگەلە خۆمان کێ بەرپرسیارە .

بە کلیکێک لەسەر سمبولەکانی خوارەوە ، ئەم بابەتە دەگات بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies