شێرزاد شێخانی : سه‌ركرده‌كانی داهاتو و میزاجی گشتی .

 

هه‌ڵبژاردنه‌كانی سه‌ركردایه‌تی یه‌كگرتوی ئیسلامی له‌ناو كۆنگره‌ی حه‌وته‌می ئه‌م حزبه‌دا ده‌رخه‌ری راسته‌قینه‌ی میزاجی گشتی كۆمه‌ڵانی خه‌لكی كوردستان بوو . ده‌نگه‌كانی ئه‌بوبه‌كر هه‌ڵه‌ده‌نی و دكتۆر موسه‌نا ئه‌مین په‌یامێك بو به‌وه‌ی ئیدی كه‌سایه‌تیه‌ سیاسیه‌ ته‌قلیدی و كلاسیكیه‌كان رۆڵیان تمام شد ، ئێستا میلله‌ت چاوی له‌نه‌وه‌ی دوه‌می سیاسیه‌كانی كوردستانه‌ به‌تایبه‌تیش ئه‌وانه‌ی جورئه‌تی ره‌خنه‌گرتنیان هه‌یه‌و خۆیان ئه‌كه‌نه‌ داكۆكیكاری مافی میلله‌ت و ئه‌توانن به‌رامبه‌ر ده‌سه‌ڵاتی دیكتاتۆرو سته‌مكاری بوه‌ستنه‌وه‌ و قسه‌ی خۆیان له‌پرسه‌ سیاسیه‌كاندا هه‌بێت .

پێشتر له‌هه‌ڵبژاردنه‌كانی په‌رله‌ماندا ئاسایی نه‌بوو كه‌سێكی وه‌ك عه‌لی حه‌مه‌ صالح بارته‌قای شه‌ش كاندید ده‌نگ بێنێت ، به‌ڵام ئێستا ده‌ركه‌وت كه‌ ئه‌م زاته‌ موسته‌حه‌قی ده‌نگی زیاتریش بوو ، ئه‌و خه‌ڵكه‌ی هه‌ڵیانبژارد له‌خۆڕاو به‌عاتیفه‌وه‌ ده‌نگیان پێنه‌دا .. ئه‌و شه‌ڕه‌ی ئێستا عه‌لی وسۆران عومه‌ر ئه‌یكه‌ن عه‌رشی دیكتاتۆری هه‌ژاندوه‌و میلله‌تیش له‌دوای ئه‌م هه‌مو سته‌م و زوڵمه‌ی لێی ئه‌كرێت ، چاوی له‌م نه‌وه‌ دلێرو ئازایه‌یه‌ كه‌ چڵكاوخۆرو به‌رژه‌وه‌ندویست نین ، له‌خه‌می مافی میلله‌ته‌كه‌یاندان و شه‌ڕی قوتی مناڵان ئه‌كه‌ن .

قسه‌یه‌كی كاك قادر عه‌زیز هه‌یه‌ كه‌ ئه‌ڵێ : هه‌ر كه‌سێك له‌پارتی نزیك ببێته‌وه‌ به‌ئاگره‌كه‌یه‌وه‌ ئه‌سوتێت . ئه‌م قسه‌یه‌ زۆر راسته‌ ، چونكه‌ بینیمان ئه‌وانه‌ی له‌مه‌سله‌حه‌تی پارتیدا چ له‌ناو حزبه‌كانی خۆیان چ له‌سه‌ر ئاستی په‌رله‌مان و حكومه‌ت و ته‌نانه‌ت له‌ناو میدیاكانیشدا قسه‌ ئه‌كه‌ن چۆن ریسوا بون و یه‌ك له‌دوای یه‌ك توشی شكستی ئابروبه‌رانه‌ بون و له‌به‌رچاوی میلله‌ته‌كه‌یانا رووره‌شتر بون .

رێكه‌وتنه‌كه‌ی یه‌كێتی و گۆران و كۆبونه‌وه‌ی په‌سه‌ندكردنی رێكه‌وتنه‌كه‌و شكستی باڵی زه‌ردی ناو سه‌ركردایه‌تی یه‌كێتی نمونه‌یه‌كی تره‌ له‌م شكست و ئابروچونانه‌ی خۆیان و ئه‌و پارتییه‌ی داكۆكییان لێئه‌كرد .. گه‌ڕانه‌وه‌ی مامۆستا سه‌لاحه‌دین به‌هادین و كشانه‌وه‌ی نوێنه‌ره‌كانی پارتی له‌ركابه‌ری ئه‌ودا ، نمونه‌یه‌كی تر .. ده‌نگی زۆری ئه‌بوبه‌كر هه‌ڵه‌ده‌نی و موسه‌نا ئه‌مین به‌ڵگه‌یه‌كی تری شكسته‌كانی پارتییه‌ .. له‌داهاتوشدا ده‌یان كه‌سی تری گه‌نجی ناو حزبه‌كان دێنه‌ پێشه‌وه‌ و سیاسییه‌ ورگ ئه‌ستوره‌كانی به‌پاره‌ی دزراوي ميللةت پاشه‌كشه‌ئه‌كه‌ن ، له‌كۆنگره‌ی داهاتوی یه‌كێتیشدا ئه‌مه‌ دوباره‌ ئه‌بێته‌وه‌و نه‌وه‌ی دوه‌م دێته‌ پێشه‌وه‌ ، له‌كایه‌ی سیاسیشدا ئیدی پارتی ناتوانێت به‌ده‌م چه‌وركردنی هه‌ندێ پیره‌ سه‌ركرده‌ یا له‌زمه‌گرتن له‌هه‌ندێكیان سیاسه‌ته‌كانی خۆی به‌سه‌ر خه‌ڵكیدا بسه‌پێنێت ، له‌میدیاشدا ئه‌وانه‌ی دێنه‌ سه‌ر شاشه‌كانه‌وه‌ ئه‌وانیش بایی خۆیان شه‌رمه‌زرا ئه‌بن كاتێك دیفاع له‌سیاسه‌ت و هه‌ڵوێسته‌كانی ئةو حزبة ئه‌كه‌ن و ئێستا میلله‌ت قێزیان لێئه‌كاته‌وه‌ .

خۆری پارتی له‌ئاوا بونه‌ ، ئه‌و سیاسه‌ته‌ تاكڕه‌وییه‌ی تا ئێستا په‌یڕه‌وی كردوه‌ جارێكی تر مایه‌ی قبوڵ نابێت له‌لای نه‌وه‌ی تازه‌ی سیاسیه‌كاندا ، مه‌گه‌ر هه‌ر وه‌كو پیشه‌ی خۆی به‌پشتبه‌ستن به‌هێزه‌ ده‌ره‌كییه‌كانه‌وه‌ بتوانێت درێژه‌ به‌و سیاسه‌ته‌ دیكتاتۆرییانه‌ی خۆی بدات و به‌زه‌برو زه‌نگ بتوانێ تۆزیك پارێزگاری له‌پایه‌كه‌ی بكات ئه‌مه‌ش هه‌ڵبه‌ت تا سه‌ر نابێت ، چونكه‌ رۆژ له‌دوای رۆژ به‌ره‌ی دژ فراوانتر ئه‌بێت به‌تایبه‌تیش ئێستا ئه‌و حزبه‌ ده‌ستی بۆ قوتی خه‌ڵكیش بردوه‌ .

قسه‌یه‌كی سه‌رۆكی ئه‌مریكا به‌نوكته‌ له‌مدواییانه‌ له‌ دیداری ساڵانه‌ی كۆشكی سپی له‌گه‌ڵ میدیاكاراندا گێڕایه‌وه‌ كاتی وتی : یه‌كێك له‌سه‌رۆكی كۆمپانیاكان 100 ملیۆن دۆلاری له‌هه‌ڵمه‌تی هه‌ڵبژاردندا سه‌رفكرد بۆ ئه‌وه‌ی من ده‌رنه‌چم ، خۆ ئه‌و پاره‌یه‌ی بدایه‌ته‌ من خۆم ئه‌كێشایه‌وه‌ له‌كێبركێی سه‌رۆكایه‌تی و پێویست به‌و هه‌موو پاره‌یه‌ نه‌ئه‌كرد سه‌رفی بكات . پارتیش له‌جیاتی ئه‌وه‌ی خه‌ریكی پیلان و تێكدانی ریزی حزبه‌كانی تر بێت ، با خۆی راستبكاته‌وه‌و رێز له‌ئیراده‌ی خه‌ڵك بگرێت ، چ پێویست ناكات به‌پرۆژه‌و پاره‌ی دزراوی میلله‌ت ده‌ست بخاته‌ ناو كاروباری لایه‌نه‌كانی تره‌وه‌ ، چونكه‌ نه‌وه‌ی دوه‌م به‌رێگاوه‌یه‌و گه‌رده‌لول هه‌ڵیكردوه‌ . 

کلیک بکەرە سەر سمبولەکانی خوارەوەو ، ئەم بابەتە ئاشنا بکە بە هاوڕێکانت

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies