ئاکۆ برایم: ریفراندۆم چى یە؟

ئێمەى نەخوێنەوارو نەزان، پەى بەزۆر شت و باس و خواسى سیاسى نابەین و تەقەى سەرمان دێت، بەڵام شوکر و هەزار حەمدو و سەنا بۆخۆا، کەوەک تۆڵەکەو دڕک و داڵ سیاسى و موحەلیلمان زۆرە، کە ئەگەر لەبرى سیاسەتمەدارانە قەل و قازمان هەبوایە، ئێستا ساحێبى گەورەترین کێڵگەى دەواجن بووین، مەجبور نەئەبوین مریشک و هێلکە لەملاو لا هاوردە بکەین.
نەخوێنەوارە سیاسى یە، فوول عەشایەرە سیاسى یە، کەللە پووتە سیاسى یە، خڵەفاو و هێر و گەمژەیە سیاسى یە. بەکورتى و بەکوردى چۆن گشتمان ئەزانین شوفێرى بکەین، ئەوهاش ئەتوانین وەزع و باس و خواسى سیاسى و گۆڕانکارى ئیقلیمى و جیهانی یەکان بتەحلیلێینن.
زۆر وتن قورئان خۆشە، بێ عەیەبى نەبێت لەحزورتانا منیش وەعدم یاوە بەختى خۆم تاقی بکەمەوە، لەسەر ئەم حاڵ و زروفەى تێی کەوتوین رەئى خۆم و بۆچونەکانم لەسەر ریفراندۆم بخەمە روو، بفەرموون ئەگەر بەدڵتان نەبوو، هەقى گلەیتانە و قسەى خۆتان بکەن.
1- ریفراندۆم باشترین تلیاک و مۆرڤین و ئاریتن و ڤالێۆمە، ئەتوانین زۆربەى کات میللەتى خەواڵوى پێ بێهۆش و مودمین بکەین، مەعاش و ئاو و کارەبا و خزمەگوزاریى لەبیر بەرینەوە.
2- ریفراندۆم عەجیبترین پاک کەرەوەیە، چەشنى فاست و سابوون و دیتۆڵ و تایت، ئەتوانین هەرچى چڵک و عارەق و پیسى و شەرمەزارییە لە خۆمانى پاک بکەینەوە.
3- ئەو ریفراندۆمە حەیاتە گەورەترین دەهۆڵە، هەتا لێى دووربیت دەنگى خۆشە، ئەشتوانیت گەورە و بچووکى پێ بێنیتە هەڵپەرکێ.
4- ئەو ریفراندۆمە ئازیزە باشترین زەخیرەیە بۆ موستەقبەلى هەنێ سیاسەتمەدار، تا بیکات بەتڕو منەت بەسەر میللەتى کڵۆڵەوە بڵێت لەعانى فەرمانڕەوایى مندا هەول و هیمەتى سەربەخۆیم یاوە، لاکین باو باپیرانتان منەتیان پێ نەبووە.
5- ریفراندۆم خۆشترین و شیرینترین خەوە هەموو کەسێک حەز ئەکات بیبینێت و خەبەرى نەبێتەوە.
6- ئەو ریفراندۆمە ئەتوانێت ببێتە کۆمپانیاو مارکێت بەهۆیەوە کۆمەڵێک سیاسى و بەرپرس بکاتە توجار و بزنس مان.
7- ریفراندۆم ئاوێکى لیخن و چڵکاوە، کەس نازانێت بنەکەى چى یە، کەچى لەخۆمانەوە حەز ئەکەین بچینە ناوى مەلەى تیا بکەین وژێرى ببینین.
8- ریفراندۆم لاستیکێکى خەت کوژانەوەیە، ئەتوانین سەرلەبەرى غەڵەت و شتە ناشیرین و خەتە خوارو خێچەکانى پێشووى پێ رەش بکەینەوە.
9- ریفراندۆم تازەکردنەوەى گرێبەست (عقد)ە لەنێوان سەرۆک و کورسییە تاقانەکەیا.
10- ریفراندۆم کەشتى و پاپۆڕێکى حکومەتە، ئەیەوێت لەزەریاى پڕ لە قەیران و برسێتى رزگارمان بکات و بمانبات بۆ ناو جیهانى سواڵ و سک هەڵگوشین و ئیفلاسى.
11- ریفراندۆم لەیلایە و خەڵکیش مەجنونە تا ئەبەد بەیەک ناگەن
12- ریفراندۆم سەیارەیەکى شەق و شڕى چوار تایە پەنچەرە، کەچى سایەقەکەى عینادو کەللە رەقەـ ئەیەوێت بەپاڵ و شەڕەشەق بیگەیەنێتە مەنزڵ.
13- ریفراندۆم مناڵێکى تازە پێگرتووە، چووە بەچاڵى نەعلەتا و ئەیەوێت بە سەر لوتکەى قەندیلدا هەڵگەڕێت.
14- ریفراندۆم یارییەکى فتبۆڵێنە لەنێوان هەڵبژاردەى کوردستان و هەڵبژاردەى ئەڵمانیا، سور ئەزانین کە شکست ئەهێنین کەچى زۆر چاو قایمانە ئەچینە ساحەوە.
15- ریفراندۆم قوربانى کردنى ئیسماعیلەکانى میللەتە بۆ حەزرەتى ئالى ئەلکورسى.
16- ریفراندۆم گەورەترین (حاویە) زبڵدانە ئەمانەوێت هەرچى پسى و پۆخڵەواتى رابردووە لەناو ئەودا بیشارینەوە.
17- ریفراندۆم تاکتیکێکى موعاێیرە بۆ شەرعەیت دان بە پیرۆز هێشتنەوەى خێڵ و بنەماڵە و قەوم و عەشرەت.
18- ریفراندۆم دەرپێ کورتى خانمێکى نازدارە، حەساسترین شوێنى پێ ئەشارێتەوە.
19- ریفراندۆم راپرسى یە بۆ ئازادى و سەربەخۆیى، تا لەرێگەیەوە زمانى رۆژنامە نووسان و نەیاران لەبنا ببڕێت و تێڵاتڕێنیان بکات.
20- ریفراندۆم حەبى دیکسۆنە، حکومەت پەناى بۆ ئەبات تا لە لەڕو لاوازى و زەعیفى پێ پەردەپۆش بکات.
21- ریفراندۆم بلیتى یانسیبێکى ماوە بەسەر چووە، چاک ئەزانین قیمەتى نى یە کەچى هەر ئەیکڕین
22- ریفراندۆم میکیاجکردنى سەرو فەساڵى ناشیرینى ئەو بەرپرسانەیە کە نیو سەدەیە زوخاوە سکیان کردوین.
23- ریفراندۆم ساختەکردنى ناسنامە و مێژووى ناپاکیە، بۆ وڵاتپارێزى.
ریفراندۆم زۆر فەقیرە. فریودانى گەنج و پیرە.. دەستیشم بەهەویرە هەر ئەوەندەم لەبیرە

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies