بورهان شێخ ڕەئوف: داعشى دواى عێراق و عێراقى دواى داعش.

ئەگەر چى دەوڵەتى ئیسلامى لە عێراق و شام لە ساڵى 2014 لە مزگەوتى نورى لە شارى موسڵ ڕاگەیەنرا لە لایەن ئەبوبەکر بەغدادى خەلیفەى دەوڵەتەکەوە وا ئێستا لە دواى پووکانەوەى ئەو دەوڵەتە و لە دەستدانى زۆربەى ڕووبەرەکانى بندەسەڵاتیان لە عێراق و بەرتەسک بوونەوەى دەسەڵاتى ڕەشیان لە چەند شارۆچکەو گوندێکدا لە عێراق و لە شامیش لە ڕەقە لەگەڵ هێزەکانى سوریاى دیموکراتدا لە شەڕێکى قورسدان و ڕۆژ بە ڕۆژ زیاتر لە قاڵب دەدرێن.
بۆیە لە عێراقدا لەمەودوا هیچ بنەمایەکى ئەو دەوڵەتە وەحشیگەرییە نامێنێت چونکە نە خاک و نە خەڵکیان لە بندەستدا نامێنێت و بەڵکو دەبنەوە بە ڕێکخراوە تیرۆریستیەکەى جاران وخۆیان لە گەڵ بارودۆخى نوێدا ڕا دەهێنن.
ئەوەى ڕوون و ئاشکراو بەڵگە نەویستە ئەوەیە کە هێزەکانى عێراق بە پشتیوانى هاوپەیمانان بست بە بستى خاکى عێراق پاک دەکەنەوە لەو هێزە تیرۆریست و وەحشیگەرە کە سێ ساڵى ڕابردوو هەموومان شاهیدى تاوان و حەماقەتەکانیان بووین. بەڵام ئەوەى قورسەو کارى جدى و هەوڵ و تێکۆشانى هەموو لایەکى ناوخۆ ودەرەکى گەرەکە ئەو بیرو مێشک و هزرو بۆچوونان کە هەڵگرى بیرى توند ئاژۆیى ئەو زەمینە لە بارو بە پیتەن کە تووندڕەوى بەرهەم دێنن چۆن و بەچى ڕیگایەک بەریان لێدەگیرێت؟
نابێت ئەوەشمان لە بیر بچێت ئەمڕۆ داعش هەر لە عێراق و سوریا خاوەنى پێگەو گۆڕەپانى ململانى نەبووە، بەڵکو هەر لە باکورى ئەفریقیا لە میسرەو تاوەکو مۆریتانیا بوونى هەیە جگە لە بوونى باڵێکى بەهێز لە ڕۆژهەڵاتى ئاسیا بە تایبەتى لە فلیپین و هەروەها جگە لەوەى کە شانەى تریان لە ئەوروپا و ئەمریکا و ڕوسیا هەیە.

چارەنووسى چەکدارە تیرۆریستەکانى داعش
ئەوەى جێگەى ترسى زۆرێک لە وڵاتانە چارەنووسى چەکدارەکانى دەوڵەتى ئیسلامیە لە دواى هەڵوەشانەوەى دەوڵەتەکەیان چونکە ئەو چەکدارانە لەزۆر کونج و کەلەبەرى دنیاوە کۆببوونەوە هاتبوونە عێراق و شام ئێستا مەترسى ئەوە هەیە و پێشبینى ئەوە دەکرێت ئەوانە بگەڕێنەوە بۆ وڵاتەکانى پێشووى خۆیان و لەوێ دەست بکەنەوە بە کارو چالاکى تیرۆریستى هەروەکو پێشتر لە زۆر جێگەدا باسى کراوە کە سەدان لەوانە خاوەنى ناسنامەى ئەوروپى و بە تایبەتى فەرەنسى بوو ن.
پێویستە ئاماژە بۆ ئەوەش بکەین هەندێک لە شارەزایان و لێکۆڵەرانى بیرى تووندڕەوى باسى ئەوە دەکەن کە هەندێک لەو چەکدارانە پووچەڵى ئەو بیرو بۆچوونانەیان بۆ دەرکەوتووە دەکرێت ڕابهێنرێنەوە بۆ کارى ئاسایى ژیانى تایبەتى خۆیان.

عێراقى دواى داعش
ئەوەى جێگەى نیگەرانى و بگرە سەرسووڕمانیشە هەڵوێستى حکومەتى عێراقە بۆ ناوچە ئازاداکراوەکان لە دەستى داعش و هەموو عێراقیش چونکە هیچ پلان و بەرنامەیەکى ڕاگەیەنراو یان ئامادەکراوى نیە بۆیان بەڵکو ئەوە وڵاتانى ئیقلیمى و دراوسێ ى عێراقن زیاتر چاویان لەو ناوچانەیەو لە هەوڵى پڕکردنەوەى بۆشایى دواى نەمانى داعشن.
لە هەمانکاتدا ئەوەى شایانى هەڵوەستە لەسەرکردنە ئەوەیە زۆرێک لە چاودێرانیش لەسەرى هاوڕان ئەوەیە کە ململانێ ئتنیکى و تائیفیەکانى ناوچەکە ئێستا لە ساڵى 2014 ى کاتى سەرهەڵدانى داعش زیاتر لە برەو گەشەدان بۆیە بە دوورى نازانن کە ململانێ لە سەر دەستکەوتەکان لە نێوان وڵاتانى ئیقلیمى ببێتە فاکتەرێک بۆ دوورکەوتنەو لە شەڕى تیرۆر و داعش.
هەروەکو دیارە ئەو وڵاتانەى لە سەر گۆڕەپانى عێراق و شام ڕۆڵ و کاریگەرییان هەیە لە هەوڵى ئەوەدان کە فراوانترین ڕووبەرى خاکى ئازادکراو لە دەستى داعش بخەنە بندەستى خۆیان بۆ نمونە ئێران عێراق وەکو باخچەیەکى پشتەوەى ماڵەکەى خۆى دەبینێت و تورکیا چاوى لە ولایەتى موسڵەو بە تایبەتى هەرێمى کوردستان و ئەمریکاش لە هەوڵى کەمکردنەوە و دانانى سنوورە بۆ هەژموون و دەستێوەردانى ئێرانە لە عێراق و سوریا بۆیە وردە وردە ململانێکان زیاتر دەردەکەون ئەگەر جاران لە ژێر پەردەى شەڕى تیرۆر و داعشدا شاراوە بوون.
ماوەتەوە بڵێین کوردیش ئێستا کە بە ماڵێکى شێواو قەیرانگەلێکى جدى و نیگەرانى کۆمەڵگاى نێودەوڵەتى لە سست بوون وپەککەوتنى پرۆسەى دیموکراسى لە هەرێمەکەدا چاوى لە دیاریکردنى چارەنووسى خۆیەتى وەکو لایەکى براوە و بەشداربوویەکى جەنگى تیرۆر بەتەماى غەنیمەو دەستکەوتى ئەو جەنگەیە کە بەشداربوویەکى کاراو کاریگەربوو لە سێ ساڵى ڕابردووداو قوربانى گەورەو زەبەلاحى بۆبەخشى.
شیعەش وەکو پێکهاتەیەکى سەردەستە و براوەى شەڕەکە ئێستا خۆى بە سەرکەوتوو دەژمێرێ و خوازیارى عێراقێکى سنتراڵ و بە هێزە بە هەمان ڕیتمى پێشوو دەڕوات و بە تایبەتى کە ئێستا خاوەنى هێزى تائیفى حشدى شەعبیە خۆیەتى.
سوونەش لە دۆخێکدایە کە ئیرەیى پێ نابرێت چاوەڕوانى مەرحەمەتى ئەمریکا و هاوپەیمانەکانێتى کە بە هانایانەوە بێنەوە پێگەو جێگەى لە دەستچوویان بۆ بگێڕنەوە.

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies