کامیار سابیر: پارتییەکانی ناو گۆڕان!

تێبینی: گفتوگۆکەی عومەر عینایەتیمان لە خوارەوە داناوە.

فراکسیۆنی گۆڕان لە پارلمانی ئەتککراوی کوردستانی ڕیفڕاندۆمەکەدا، لێڵکردنەوەیەکیان ( روونکردنەوە) بڵاوکردووەتەوە و دەڵێن عومەری عینایەت، رای تایبەتیی خۆیەتی و تەعبیر لە گۆڕان ناکات. ئێ باشە کابرا، لە هەموو کادیرەکانی پارتیی، لە هەموو کادیرەکانی یەکێتیی باشتر داکۆکیی لەم پرۆژە تاڵانیی و چەتەگەرییەی پارتیی و یەکێتیی دەکات، کەچیی ئەم پۆپۆلیزمەی ناو گۆڕان، جورئەت ناکات، گوێی ڕابکێشێت ( کە دەبووایە، دەری بکەن).
گۆڕان، پێی ناخۆشە پێی بگوترێ پارتیی لەناو گۆڕاندا هەیە! ڕاستییەکەی بۆچوونەکانی جەلال جەوهەر، شۆڕش حاجیی، هەڤاڵ ئەبوبەکر و عەبدوڵای مەلا نوریی و… تاد، لەسەر دەوڵەتی کوردیی، لەسەر ڕیفراندۆم و گێچەڵکردنی طائیفیی و بلۆکبەندیی مەذهەبیی، ڕێک قسەی دڵی ئەم ناسیۆنالیزمە تاڵانیی و چەتەگەرییەی پارتیی و یەکێتییە. پێموایە لەو بۆچوونەمدا هەڵەم نەکردووە و زۆر دووبارەم کردووەتەوە کە” زۆربەی نەژادپەرست، نەتەوەپەرست و ئیخوانییەکانی ناو گۆڕان، هێزی یەدەکی ناسیۆنالیزمی نەوتن و بە ڕاستەوخۆ و ناڕاستەوخۆ”، خزمەتی ئەجێنداکانی پارتیی دەکەن.
گۆڕان، دەبێ لەسەر مانیفێستێکی سیاسیی ڕۆشن، مۆبەڵایز بە فیکری سیاسیی ڕۆشن، خۆی ساغ بکاتەوە. ئەگەر خەڵک گرفتی ناسیۆنالیزم و کوردایەتیی هەبێت، ئەوە باشترین و رەسەنتریین حیزبی کوردایەتیی ( پارتیی و یەکێتیین) و پێویست ناکات، گۆڕان ئەم عەرەبانەیە ڕابکێشێت. ئەگەریش خەڵک دەنگ بۆ فشقیاتی دەوڵەتی ڕەیعیی و ئەم چەتەگەرییەی نەوت بدەن، ئەوە زۆر بێعەقڵییە بە دەستی سێ و چوار لە ڕێگەی پارتییەکانی ناو گۆڕانەوە، دەنگ بدەن.
باشترە بە دەستی یەک و بە مەرجەعی ئەصیڵی کوردایەتیی( پارتیی ) و پاشكۆکانی ( یەکێتیی)، دەنگ بدەن و ئەم زەحمەتە سیاسییە لە کۆڵ گۆڕان بکەنەوە.
لە هەمووی وێرانەتر، ئەم قەومچەویی و ئیخوانییانەی ناو گۆڕان، وەکو مەعریفەی سیاسیی، چەند بەتاڵ و چەند حەتاڵن؟ ئاخۆ فاشیزم هەر ئەوە نییە بە لێوتەوە دیار بێت، کاتێ من ئەم هەموو گەندەڵیی و دزییە، ئەم هەموو نادادیی و تاڵانییە، ئەم هەموو تێرۆر و سەرکوتکارییەی دەسەڵاتە کوردییەکە نەبینم و بچم گێچەڵ بە حکومەتی فاشیلی عێراق، یان بە سوننە و شیعەی بکەم، ئەوە من هەڵگری ڤایرۆسی فاشیزمی کوردییم و چاوم لە ئاست هەموو فاشیزمەکانی ئەم کوردایەتییە نوقاندووە و دەچم، باسی فاشیزمی ئەم و ئەو دەکەم. ئەم عیانەیەتەی گۆڕانیش، رێک ئەمە دەکات. بەڕاستیی شەرمە بۆ گۆڕان، ئەمانە قبوڵ دەکات. ناشکرێ هەر ڕەخنە لە فیکر و ئایدیۆلۆژیای سیاسیی ئەم حیزب و ئەو حیزب بگریت، دەبێ کاراکتەرە سیاسییەکانیشیان بەر شەلاقی ڕەخنە بدرێن و ئێسک و پروسکی ئەم قەومچەوییەتەیان، تێکبشکێنرێت.
ئەم برادەرە لەو نەتەوەییانەیە کە دەیەوێ پەرلمان کارا بکرێتەوە و بە ئیعازی پارتیی بچێتە شوێنەکەی یوسف محەمەد، چونکە گڵۆپی سەوزی پارتیی و یەکێتیی بۆ هەڵکراوە و یەکێکە لە”ئەکبەر وەطەنچییەکان”.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies