نەوزادى موهەندیس: با ئەردۆگان ئیسلامەتی بە کورد نەفرۆشێتەوە.

کاتێک کورد ئیسلام بوە .. تورک هەر ئیسلامیشی نەناسیوە.
سەرەتا دان بەو ڕاستیەدا دەنێم کە هەڵبژاردنی دین و مەزهەبەکان کارێکە هیچ تاکێک خۆی لە هەڵبژاردنیدا ئازاد نەبوە بەڵکو لە دایک و باوکەوە بۆی ماوەتەوە. هەروەها بەشێوەیەک لەشێوەکان دەچنە ‌چوارچێوەی ئازادی تاکەکەسیەوە کە مافی هیچ کەس نیە ڕەخنەی پێ‌ لەکەسانی تر بگرێت.بەڵام کاتێک کار گەیشتەوە ئەوەی بەرامبەرەکەت کە خۆی بە ئیسلا م دادەنێت و تۆش بە کافر و سوپایەکیش بەناوی ((سوپای موحەمەدیەوە و بەدەسپێکی سورەتی فەتح ))ەوە دەنێرێتە سەر خاک و گەلەکەت و قەتڵ و عامت دەکات وەکو ئەوەی جیهادی کردبێت دژی کافران و لەدەرەوەی خاکی ئیسلام.ئیتر هیچ بوارێک نامێنێتەوە بۆ ئەوەی کە قسەنەکەیت و وەڵام نەدەیتەوە.
ئەوەی ئەمڕۆ ئەردۆگان و حیزبەکەی ئاکەپە بەناو ئیسلامەوە دەیکەن بەرامبەر هەموو کورد و بەتایبەتیش لە ڕۆژئاوی کوردستان، تەنانەت لەلایەن مەسیحی و جولەکەکان و بێ ‌دینەکانیشەوە مایەی قبوڵکردن نیە. بۆیە حەزمکرد بە داتاو زانیاری و ئامار جیاوازی لەنێوان ئێمەی کورد و تورکدا بکەم و پیشانی بدەم، کە چۆن کورد دڵسۆزترین جەنگاوەری ئیسلام بون و چۆنیش بونەتە ئیسلام:
1- کورد لە سەردەمی خەلافەتی عومەری کوڕی خەتابدا بونەتە ئیسلام و کوردستان کەوتۆتە ژێر دەسەڵاتی ئیسلامەکانەوە لەساڵی 16 بۆ 20 کۆچی و تەنانەت بێ‌ بەرەنگاری و شەڕێکی قورسیش.
2- لە ئێساتای هەرێمی کوردستاندا بەنزیکەیی 5500 مزگەوت هەیە و لەو ژمارەیەش نزیکەی 1000 مزگەوت نوێژی هەینی تیادا دەکرێت کە دەگاتە 1 ملیۆن نوێژکەر. لەکۆی گشتی ژمارەی دانیشتوانی هەرێم کە نزیکەی 5 ملیۆن کەسە. هەر یەک کەس ((0،001)) مزگەوتی بەردەکەوێت.
3- سەدان و هەزاران کەڵە پیاوی ئاینی و نوسەر و شاعیر و ئەولیا و پیاوچاک و زانا لەکوردا هەڵکەوتون کە بونەتە نمونەی زیندوو گەشاوەی هەموو دونیای ئیسلام.
* تورکیا لە سەردەمی خەلیفەی ڕاشدی عوسمانی کوڕی عەفاندا ئیسلامی پێگەیشتوە، واتە لەدوای کوردەوە تورک بونەتە ئیسلام و تورک بە شەڕ و جیهاد بونەتە ئیسلام.لە ئێستادا کە ژمارەی تورکیا 80 ملیۆن کەسە، تەنها 84684 مزگەوت هەیە. واتە هەر یەک کەس ((0،001)) مزگەوتی بەردەکەوێت.کە لێرەدا دەردەکەوێت کورد بەهێندەی تورک و بگرە زیاتریش مسوڵمانترە.
* لەبەرامبەریشدا و لەساڵی 2002وە کە ئاکەپە و ئەردۆگان بونەتە دەسەڵاتدار لە تورکیادا کە بەناوی حیزبێکی ئیسلامی و ئیخوانیەوە هاتونەتە سەر حوکم، بەم شێوەیە دینی بەکارهێناوە بۆ خزمەتی مانەوەی خۆی و حیزبەکەی و لەهیچ کارێکی ناشەرعی و ناڕەوا و بەدڕەوشتیش سڵی نەکرۆدۆتەوە ئەوەتا:
1- لەدەستوری نوێی تورکیادا دینی ئیسلام دینی ڕەسمی نیە کە کمال ئەتاتورک دایناوە،تاکو ئیستا و لەو هەمواری دەستورەی کە ئەردۆگان کردی نەیتوانی یان نەیکرد کە ئەو مادەیە هەموار بکاتەوە و ئیسلام بکاتە دینی ڕەسمی.
2- بەپێی مادەی 227 لە یاسای ژمارە 5237ی تورکیا کە لە 26/9/2004 پەڕلەمان پەسەندی کردوە و لەساڵی 2005دا کەوتۆتە واری جێبەجێکردنەوە دەڵێت (( حوکمی بەندکردن بۆ ئەوکەسانەی کە بەدڕەوشتی دەکەن لەنێوان 2-4 ساڵدایە،بەڵام ئەو کەسانەی کە بەویستی خۆیان ئەو کارە دەکەن هیچ سزایەکیان بۆ نیە)). ئەمەش دوو ڕوویی ئەردۆگان و ئاکاپە دەردەخەن کە چۆن ڕێگەیان بەبەدڕەوشتی داوە لەکاتێکدا خۆیان بە ئیسلام و موسڵمان دادەنێن.
3- بەپێی چەند ئامارێک: لەماوەی 13 ساڵی دەسەڵاتی ئاکاپە و ئەردۆگاندا ڕێژەی بەدڕەوشتی لە تورکیادا بە ڕێژەی 1680% زیادیکردوە.بەشێوەیەک :
15هەزار ماڵی بەدڕەوشتی مۆڵەتپێدراو هەیە جگە لە بێ مۆڵەتەکان.تەنها لەشاری ئەستەمبوڵدا 3 هەزار کچ و ژن ئەو کارە دەکەن.کمال اورداک سەرۆکی کۆمەڵەی مافی مرۆڤ و تەندروستی جنسی دەڵێت ژمارەی ئەو کەسانەی کە لەبواری بەدڕەوشتیدا کاردەکان دەگاتە 300هەزار کەس لەژن و لە پیاو.
4- تەمەنی خانەنشینی بەدڕەوشتکار بە 60 ساڵ دیاریکراوە بە پێی یاسای تورکیا و تائێستاش کاری پێدەکرێت.
5- تورکیا لەسەر ئاستی دونیادا 14 هەمین وڵاتە کە کاری بەدڕەوشتی تیادا دەکرێت بەناوی گەشتوگوزاریەوە.
6- داهاتی ساڵانەی تورکیا لەکاری جنسی و بەدڕەوشتیەوە دەگاتە 4 ملیار دۆلار.
7- لەساڵی 2002دا 2669 کەس تۆتمەتبارکراون بە کاری بەدڕەوشتی و لەساڵی 2007دا بۆتە 4494 کەس و لەساڵی 2011دا بۆتە 8409 کەس.
8- لەوڵاتی تورکیای ئیسلامی ئەردۆگان و ئاکەپەدا،بەدڕەوشتکاران لە پیاو و لە ژن بەهۆی زۆری ژمارەیانەوە داواییان کرد کە ((سەندیکایەک))یان بۆ دابمەزرێت بۆ ئەوەی پارێزگاری لەمافەکانیان بکات.ئەوەبوو لەساڵی 2013دا ئەو ئاواتەیان هاتە دی و سەندیکایەکیان بۆ دامەزرا لەسایەی دەسەڵاتی خەلیفە ئەردۆگانەوە بەناوی((سەندیکای چەتری سوور))وە.
* کەچی لە ئێستادا ئەردۆگان و بەناو پیاوە ئاینی و مەلاکانیەوە جیهاد ڕادەگەیەنن دژی کوردی مسوڵمان و سورەتی فەتح لەهەموو نوێژێکی بەیانیاندا دەخوێنن بەدرێژایی هێرشەکەیان بۆ سەر ڕۆژئاوا. بۆیە دەڵێم کورد چەندە دڵسۆز و ساویلکە بوە لەوەرگرتن و جێبەجێکردنی دینی ئیسلامدا بەڵام سەد ئەوەندەش بەناوی دینەوە ئەنفال و جینۆساید و پاکتاوی ڕەگەزی و کیمیاویباران کراوە و قەتڵ و عامکراوە لەسەر دەستی بەناو برا مسوڵمانەکانیەوە.
*بۆیە ئەردۆگان هیچ کات ناتوانێت ئیسلامەتی ڕاستەقینە بەکورد بفرۆشێتەوە و خۆیمان لێبکات بە خەلیفە و کوردیش بەکافر.تاوانی کورد تەنها ئەوەندەیە کە خاوەنی دەوڵەت و هێز ودینێکی تایبەت بەخۆی نیە.گەر ئەوانەی هەبوایە سەدانی وەک ئەردۆگانی لەگۆڕدەنا.