Pshtiwan-abdulla-2

پشتیوان عه‌بدوڵا : کام ڕێگا چارە ” نەتەوەپەرستی یان نیشتمانیبون ” .

” نه‌ته‌وه‌په‌رستی نه‌ك هه‌ر خۆشه‌ویستییه‌کی کوێرانه‌یه‌ بۆ نه‌ته‌وه‌ و نیشتمان ، به‌ڵکو هه‌ر پێنج هه‌سته‌که‌شی له‌ده‌ستداوه “

هه‌ردوو چه‌مکی نه‌ته‌وه‌په‌رستی و نیشتمانپه‌روه‌ری په‌یوه‌ندیان ڕاستەوخۆیان ‌به‌چۆنیایەتی په‌یوه‌ندی و تیڕوانینی تاکه‌کانی کۆمه‌ڵ هەیە بۆ نه‌ته‌وه‌و نیشتمان . ئه‌م دوو چه‌مکه‌ هه‌میشه ‌تیکه‌ڵ به‌یه‌ك ده‌کرێن و زۆربەی خەڵک بۆ هه‌مان مه‌به‌ست به‌کاری ده‌هێنن . به‌ڵام له‌ڕاستیدا جیاوازییه‌کی گه‌وره‌و بەرچاوهه‌یه ‌له‌نێوان ئه‌م دوو چه‌مکه‌دا . نیشتمانپه‌روه‌ر ئەو کەسەیە کە هه‌میشه‌ شانازی به‌پرنسیپەکان و به‌هاکانی نیشتمانه‌که‌ی ده‌کات ، ‌هه‌موکات زۆر شێلگیرانە بۆ چاکسازی و راستکردنه‌وه‌ی هه‌ڵه‌و که‌موکوڕی یەکانی نیشتمانه‌که‌ی هەوڵ دەدات . له‌هه‌مانکاتدا دان به‌ سه‌روه‌ری وڵاتانی تردەنێت له‌سه‌ر بنه‌مای دیسپلین و که‌لتوری نەتەوەییان .

نه‌ته‌وه‌په‌رست دوچاری گێژاوی سه‌ربه‌رزی و شکۆمه‌ندی که‌لتوری نه‌ته‌وه‌یی و پرینسیپی نیشتمانه‌که‌ی بوه‌و دان به‌که‌موکوڕییه‌کان دا نانێت . نه‌ته‌وه‌په‌رست له‌کاتێکدا که‌ هه‌میشه‌ به‌چاوی ره‌خنه‌ سه‌یری که‌لتوری سیاسی و کۆمه‌ڵایه‌تی نیشتمان و نه‌ته‌وه‌کانی تر ده‌کات ، که‌لتوری سیاسی و کۆمه‌ڵایه‌تی نه‌ته‌وه‌و نیشتمانه‌که‌ی خۆی به‌ به‌رز ده‌نرخێنێت ، ‌هه‌میشه‌ هه‌وڵ ده‌دات بانگێشه‌ی ئه‌وه‌ بکات که‌ وڵات و نه‌ته‌وه‌که‌ی گرنگترین وڵات و نه‌ته‌وه‌ن‌ له‌ جیهاندا . له‌ڕاستیدا ئه‌وه‌ی گرنگه ‌باشی پرنسیپه‌کانی نیشتمان و به‌های به‌رزی کۆمه‌ڵایه‌تییه‌ نه‌ك گرنگی و به‌هێزی وڵات له‌نێوه‌ندی نێو ده‌وڵه‌تیدا .

جیاوازی سه‌ره‌کی و بنه‌ڕه‌تی نه‌ته‌وه‌په‌رستی و نیشتمانپه‌روه‌ری له‌وه‌دایه ‌که ‌نیشتمانپه‌روه‌ر وڵاته‌که‌ی خۆش ده‌وێت و شانازی پێوه ‌ده‌کات له‌سه‌ر بنه‌مای دسپلینی سیاسی و که‌لتوری کۆمه‌ڵایه‌تی و به‌های مرۆیی ، به‌ڵام له‌هه‌مانکاتدا هه‌ڵه ‌و که‌موکوڕیه‌کانیش ده‌ست نیشان ده‌کات و کار له‌پێناو نه‌هێشتنیان و چاکسازیکردنیان دەکات ، به‌ڵام نه‌ته‌وه‌په‌رست شانازییه‌کی کوێرانه‌ به‌نه‌ته‌وه‌ و وڵاته‌که‌ی ده‌کات ، ته‌نانه‌ت گه‌ر نه‌ته‌وه ‌و نیشتمانه‌که‌ی کاری نا به‌جێ و ناشیاویش ئه‌نجام بده‌ن .

هه‌ڵسوکه‌وتی نیشتمانپه‌روه‌ر هه‌ڵسوکه‌وتێکی هه‌ستکردنه‌ به ‌به‌رپرسیاریه‌تی به‌رامبه‌ر گه‌ل و نیشتمان ، به‌ڵام هه‌ڵسوکه‌وتی نه‌ته‌وه‌په‌رست هه‌ڵسوکه‌وتێکه‌ دور له‌ به‌رپرسیاریه‌تی و لەهەمان کاتدا هەلسوکەوتێکی ‌ملهوڕانه ‌و کوێرانه‌یه ، کە ئه‌مه‌ش زۆرجار ده‌بێته‌ هۆی هه‌ڵگیرسانی شه‌ڕو کوشتار و ‌دروست بونی ئاژاوه‌ و ناجێگیری سیاسی .

واته‌ جیاوازی نێوان ئه‌م دوو چه‌مکه ‌له ‌هه‌ستکردن به‌ به‌رپرسیاریه‌تی به‌رامبه‌ر به‌گه‌ل و نیشتمان خۆی ده‌بینیته‌وه . نیشتمانپه‌روه‌ری هه‌ڵچونێك و مه‌یلێکی سۆزدارانه‌ی کاتی نییه ، به‌ڵکو هه‌ست و بیرکردنه‌وه‌یه‌کی ژیرانه ‌و جێگیر و به‌رپرسانه‌و به‌رده‌وام و درێژخایه‌نه . به‌رپرسیاریه‌تی گه‌ل به‌رامبه‌ر به‌نیشتمان ، نیشتمان به‌رامبه‌ر به‌گه‌ل ، گه‌ل و نیشتمان به‌رامبه‌ر بەجیهان .

له‌لایه‌کی تره‌وه‌ ، نه‌ته‌وه‌په‌رست گرنگی به‌ به‌رپرسیاریه‌تی نادات و به‌لایه‌وه‌ گرنگ نییه ‌و بەڵکو تەنانەت کوێریشه‌ له‌ئاستیدا . به‌ڵکو ئه‌وه‌ی گرنگه‌ به‌لایه‌وه‌ دلسۆزی و وه‌فاداری بێ قه‌یدوشه‌رتی تاك و نه‌ته‌وه‌ و گه‌له‌ بۆ نه‌ته‌وه‌ و ڕابه‌رانی نەتەوەکەی . هه‌ر ئه‌م بیرکردنه‌وه‌ کوێرانه‌یه‌ که ‌مرۆڤه‌کان نوقمی گێژاوێکی ملهوڕانه ‌ده‌کات و ، له‌ئاکامدا مرۆڤه‌کان ده‌کات به ‌ده‌رویشیکی کوێرانه‌ی رێبازێکی مه‌زهه‌بی و خێڵه‌کی ئاسا . تاکه‌کانی سه‌ر به‌م ره‌وته‌ هه‌رده‌م ئاماده‌ی جێبه‌جێکردنی بڕیاری سه‌رکرده‌کانیانن و هه‌میشه‌ ئاماده‌ی کڕنۆش بردنن . ئه‌م دڵسۆزیه‌یان ته‌نها لە چوارچێوەی کڕنۆش و پەرستنی رێباز و حیزبێکی دیاریکراودا خۆی ده‌بینێتەوە . ئه‌م دڵسۆزییه‌ به‌ده‌گمه‌ن پیادە دەکەن بۆهاوڵاتیان و که‌سانی سه‌ر به‌ رێبازه‌کانی تر نەتەوەپەرستی هەستێکی دۆگماتیزمانەیە و بروای بە پراگماتیزم نی یە و تەنانەت لە پراکتیکدا دژایەتیشی دەکات .

وێڕای ئه‌مه‌ش نه‌ته‌وه‌په‌رسته‌کان هه‌ست به‌ به‌رپرسیاریه‌تی به‌رامبه‌ر به‌ پلاتفۆرمی سیاسه‌تی نه‌ته‌وه‌ و نیشتمان ناکه‌ن . نه‌ته‌وه ‌و نیشتمانیان هه‌رچی یه‌ك بکات ، نه‌ته‌وه‌په‌رسته‌کان یان نکۆڵی لێ ده‌که‌ن ، یان پاساوی بۆ ده‌دۆزنه‌وه . به‌ڵام له‌هه‌مان کاتدا ، گه‌ر هه‌مان کار و به‌رخورد و سیاسه‌ت لە لایەن وڵات و نه‌ته‌وه‌یه‌کی تر ئه‌نجام بدرێت ؛ نه‌ته‌وه‌په‌رستان به‌چاوی ره‌خنه‌ی قوڵ سه‌یری ده‌که‌ن .

هه‌ڵسه‌نگاندن و تاقیکردنه‌وه‌ی به‌رپرسیاریه‌تی خاڵی گرنگ و سه‌ره‌کی و بنه‌ڕه‌تییه‌ بۆ جیاکردنه‌وه ‌له‌نێوان ئه‌م دوو ڕه‌وته . له‌کاتیكدا نیشتمانپه‌روه‌ر هه‌ست به ‌به‌رپرسیاره‌تی ده‌کات و هه‌میشه ‌ڕه‌خنه‌ له ‌سیاسه‌تی چه‌وتی نیشتمان و نه‌ته‌وه ‌و سه‌رکرده‌ ده‌گرێت، نه‌ته‌وه‌په‌رستان ئه‌م کاره‌ به‌ نادڵسۆزی و خیانه‌ت له‌ قه‌ڵه‌م ده‌دان .

نه‌ته‌وه‌په‌رسته‌کان هه‌میشه‌ هه‌مان پرسیار روبه‌ڕوی که‌سانی نیشتمانپه‌روه‌ر ده‌که‌نه‌وه‌ . له‌به‌رچی نیشتمان و نه‌ته‌وه‌که‌ی خۆت ده‌شکێنیت و ڕیسوای ده‌که‌یت ؟ . له‌به‌رچی باسی نه‌ته‌وه ‌و وڵاته‌کانی تر ناکه‌یت ، که‌ هه‌مان که‌موکوڕیان هه‌یه ‌و هه‌مان سیاسه‌ت پیاده ‌ده‌که‌ن؟ .

دڵنیام که‌ چه‌نده‌ها جار؛ هەر هەمومان ، ڕوبه‌ڕوی پرسیاری له‌م چه‌شنه‌ بوینه‌ته‌وه . وه‌ڵامی نیشتمانپه‌روه‌ر ئه‌وه‌یه‌ که‌ من به‌رپرس نیم به‌رامبه‌ر به‌هه‌ڵه‌ و سیاسه‌تی چه‌وتی نه‌ته‌وه‌ و وڵاتانی تر، من ته‌نها به‌رپرسم له‌نیشتمان و گه‌لی خۆم . نه‌ته‌وه‌په‌رستان ئه‌مه ‌تێناگه‌ن و نایانه‌وێت تێبگه‌ن .

بانگەشه‌کردنی ئه‌وه‌ی که‌ نه‌ته‌وه‌که‌ی تۆ له‌سه‌ره‌وه‌ی نه‌ته‌وه‌کانی تره‌و شکۆدارتره ، ‌یاخود رێبازی ژیان و که‌لتوری کۆمه‌ڵایه‌تی نه‌ته‌وه‌که‌ت به‌رزتره ‌له‌ نه‌ته‌وه‌کانی تر، بێ ئه‌وه‌ی هه‌ست بکه‌یت و ئەوە لە بەرچاو بگریت که‌ هه‌مومان مرۆڤین له‌گه‌ڵ جیاوازیمان له‌ڕوی نه‌ژاد و نه‌ته‌وه‌و زمان و مه‌زهه‌ب و که‌لتور، نەتەوە پەرست مافی ڕەها وبێ ئه‌ملاوئه‌ولا به‌خۆی ده‌دات کە رق و قینه‌ یەکی زۆر بەرامبەر بە نەتەوەکانی تر بنوێنێت و وە تەنانەت پیادەی سیاسەتی پاکتاوکردنی نه‌ته‌وه‌کانی تربکات . مێژووی مرۆڤایه‌تی پڕیه‌تی له‌ کاره‌ساتی له‌م چه‌شنه ، که ‌نه‌ته‌وه‌په‌رستی بۆته‌هۆی هه‌ڵگیرسانی شه‌ڕ و جه‌نگ و ‌بازنه‌یه‌کی بێ کۆتای له‌ڕق و کینه‌ و شه‌ڕ و کوشتار و جینۆساید هێناوەتە ئاراوە .

که‌سێك ناتوانێت خاوەن ڕێزبێت و ڕێز له ‌که‌سانی تر بگرێت گه‌ر وا هه‌ست بکات که‌ به‌شێوه‌یه‌کی خۆرسکی و زگماکی نەتەوەکەی لە نەتەوەکانی ترباشتره ‌وە یا خودی خۆی له ‌که‌سانێکی ترباشترە که‌ به‌ڕێگای رێکه‌وت له‌دایك و باوکێك هاتۆنەته‌ دنیاوه‌ که ‌سه‌ر به ‌ره‌گه‌ز و نه‌ژاد و نه‌ته‌وه‌یه کی تربن . شانازی کردن به‌خۆت ، به ‌نه‌ته‌وه‌ت ، به‌نیشتمانت ، به‌وه‌ی که ‌تۆ کێیت و بڕوات به‌چی هه‌یه ‌تیڕوانینێکی ره‌وایه ‌و مافێکی بێ ئه‌ملاوئه‌ولای مرۆڤه‌کانه . به‌ڵام بڕوابون به‌وه‌ی که ‌بیرکردنه‌وه ‌و که‌لتوری نه‌ته‌وه‌ییت و نیشتمانت له‌سه‌روی هه‌مو نه‌ته‌وه‌کان و نه‌ژاده‌کانی تره‌ شتێکی زۆر ناڕەوا و نا گونجاو وتاسەر ئێسقان کۆنەپەرستانەیە ولە هەمان کات داناتوانیت کۆمه‌ڵگا به‌ریته ‌پێشه‌وه . ئه‌م تیڕوانینه ‌ناجێگیری و شه‌ڕو جینۆساید ده‌خولقێنیت ، کوشت و کوشتار و جینۆسایدی که‌سانێك ته‌نها له‌به‌رئه‌وه‌ی وه‌کو ئێمه‌نین”.”

جۆرج ئۆریل ده‌ڵێت : ” نه‌ته‌وه‌په‌رستی یه‌کێك بوه‌ له‌ گه‌وره‌ترین دوژمنه‌کانی ئاشتی له‌جیهاندا .”

تیڕوانینی نه‌ته‌وه‌په‌رستی وا له‌تاکه‌کان ده‌کات که‌ مۆڕاڵیتی خۆیان به‌هه‌ر شێوه‌یه‌ك بێت به‌سه‌ر نه‌ته‌وه‌کانی تر و که‌سانی تر بسه‌پێنن . کاتێك ناتوانن له‌ڕوی پراتیکه‌وه ‌ئه‌م کاره‌ بکه‌ن ، ده‌ست ده‌به‌ن بۆ سیاسه‌تی ترساندن و تۆقاندن ، کوشت و کوشتار، شه‌ڕ و جه‌نگ ، جینۆساید و پاکتاوی نه‌ژادی و نه‌ته‌وه‌یی . له‌کاتێكدا نه‌ته‌وه‌په‌رست تینوی شه‌ڕ و ئاژاوه‌ و کوشتاره‌، نیشتمانپه‌روه‌ر هۆگری ئاشتی و رێزلێگرتنه .

له‌سه‌روبه‌ندی ساڵه‌کانی پێش جه‌نگی جیهانی دووهه‌م نه‌ته‌وه‌په‌رستی به‌شێوازی جیاجیا گه‌یشته ‌لوتکه‌ی به‌هێزی و توانایی. ئه‌وه‌بوو نازیزمی هیتله‌ر و فاشیزمی مۆسۆلینی، کاره‌ساتێکی مرۆیی گه‌وره‌یان له‌ئاستی جیهاندا خولقاند . له‌دوای جه‌نگی جیهانیدووهەم شه‌پۆلێکی به‌رفراوانی نه‌ته‌وه‌په‌رستی و ‌بزوتنه‌وه‌ی رزگاریخوازی میللی باڵی به‌سه‌ر جیهاندا کێشا . ئه‌وه‌بوو زۆرێك له ‌نه‌ته‌وه‌کان ، بە سه‌ربه‌خۆیی خۆیان گەیشتن و وڵاتی نەتەوەییان پێكهێنا و له ‌کۆنۆڵیالیزم رزگاریان بوو. وڵاتانی ئاسیا و ئه‌فریقا و خۆرهه‌ڵاتی ناوه‌ڕاست به‌جۆرێك له‌ده‌ست کۆنۆڵیالیزم رزگاریان بوو که ‌بارودۆخێکی نوێی له‌ توندکردنه‌وه‌ی رق و قینه‌ی نه‌ته‌وه‌په‌رستی هێنایه‌کایه‌وه ، چه‌وساندنه‌وه‌ی که‌مه ‌نه‌ته‌وایه‌تیه‌کان له‌لایه‌ن نه‌ته‌وه‌ی باڵاده‌ست . له‌هه‌ندێك وڵاتدا ، وڵاتانی کۆنۆڵیالستی سیاسه‌تێکیان په‌یڕه‌وکرد به‌شێوه‌یه‌ك که‌ هه‌ر کاتێك بیانه‌وێت بتوانن دژایه‌تی نه‌ته‌وه‌یی و رقی نه‌ته‌وه‌په‌رستی له‌نێوان نه‌ته‌وه‌و نه‌ژاده‌کانی ناو خودی هه‌مان وڵات وه‌ك کارتی ملکه‌چ کردن و ته‌سلیم بون بۆ سیاسه‌ت و به‌رژه‌وه‌ندییه‌کانیان به‌کاربهێنن . وێرای ئەمەش ئەم چەمکەیان تێکەڵ بە دین و مەزهەب کرد . وەک شلەیەکی ژەهراوی دەرخواردی دەرخواردی تاکەکەنی کۆمەڵیان دا هەرەک دەبینین لە وڵاتانی ئاسیا و ئەفریقیا و خۆرهەڵاتی ناوەراست .

لە ووڵاتانیك که‌ خه‌ڵکانی فره‌دین و فرە مه‌زهه‌ب ، فره‌نه‌ژاد و فرە نه‌ته‌وه‌ی تیا ده‌ژین ، دەسەڵاتەکان کۆمەڵگایان بە مەبەستەوە بەسەر زۆرینە و کەمینە ( نەتەوەی زۆرینە و دینی زۆرینە وه نەتەوەی کەمینە و دینی کەمینە ) دابەش کرد دەسەڵاتی سیاسی کە لە زۆربەی کاتەکان دەسەڵاتێکی سەرکوتکەر و دیکتاتۆری بووە لەو وولاتانەدا ، بۆبەدەست هێنانی شەرعیەتی سیاسی بۆ دەسەڵاتەکەی هەمیشە بارودۆخێکی ناوخۆیی هێناوەتە ئاراوە کە کۆمەڵگا دابەش بکات بە شیوەیەک ، وە بە سود وەرگرتن لە فرە نەتەوەیی و فرە دینی کۆمەڵگا ، و کە بەردەوامی بە دەسەڵاتەکەی بدات ، ئەڵبەتە ئەمەش لە ڕێگای کردنی نەتەوەیەک بە نەتەوەی سەردەست و دینێک بە دینی فەرمی وڵات وە کردنی ئەوانی تر بە کەمینە و هاولاتی پلە خوارتر . که‌ زۆرجار وابوە ‌خودی ئه‌م سیاسه‌ته ‌بۆتە هۆی هه‌ڵگیرسانی شه‌ڕ و ئاژاوه‌و تەنانەت جینۆساید و پاکتاوی نەژادی ئەوانەی کە پێیان دەوترێت کەمە نەتەوە و کەمە دینیەکان وە تەنانەت بۆتە هۆی ده‌رچونی بارودۆخه‌که‌ لە دەستی حکومەت و دەولەت و ناجێگیری سیاسی ناوچەکە. کاتێک ولات و کۆمەڵگا بەم شیوەیە و لەسەر بنەمای نەژادی و نەتەوەیی و دینی دابەش بوو نەک لەسەر بنەمای هاولاتی بون و نیشتمانی بون ، ئەوکات زۆرینە ( دین بێت یان نەتەوە ) وەک خێر و چاکە هەندێک ماف بە نەتەوە و نەژاد و دینەکانی تر دەدات ، ناکرێت نەتەوەیەک لەسەر خاکی نیشتمانەکەی و شوێنی باوک و باپیرانی بە کەمایەتی دابنرێت . من دڵنیام لەوەی گەر مرۆڤەکانی سەردەم و وڵاتانی جیهانی سێهەم بە ئەقلیەتێکی نیشتمانی بون بیریان بکردایەوە نا ئانفالی کورد و نە جینۆسایدی ڕوانداو نە پاکتاوی نەژادی لە بۆسنیا و هەرسەگۆڤنیا دەهاتە ئاراوە .

سیاسه‌ت و ئایدۆلۆژیای نه‌ته‌وه‌په‌رستی سیاسه‌ت و ئایدۆلۆژیایه‌که‌ که‌ هێزی سیاسی و که‌لتوری هاوچه‌شنه و هاوتەریبە ‌له‌گه‌ڵ هێزی سیاسی و که‌لتوری مه‌زهه‌ب و ئاینه‌کان ، هه‌روه‌ها چه‌نده‌ها لێکچونی ئایدیۆلۆژی و سۆسیۆلۆژی له‌گه‌ڵ مه‌زهه‌ب و ئاینه‌کان هه‌یه .

هه‌رچه‌نده زۆرێک لە ‌بزوتنه‌وه‌ و حیزبە نه‌ته‌وه‌په‌رسته‌کان هه‌میشه‌ هه‌وڵیان داوه‌و هه‌وڵ ده‌ده‌ن ، کە لە ڕوی هێز وپێکهاتە و سومبول و مەرجەعیەتەوە ، ‌شوێنی ئاینه‌ ئاسمانیه‌کان بگرنه‌وه‌ ، بەلام له‌گه‌ڵ ئه‌وه‌ش دا هەندێکیان شکستیان هێناوە لەبەر ئەوەی فاکته‌ر و ماتیریالی خودایی و رۆحییان نییه ( دیارە رەفزکردن و قبوڵ کردنی ئەمەش پەیوەندی بە ڕادەی وشیاری کۆمەڵگا هەیە ) . وە زۆرێك له‌ڕه‌وت و حیزبە نه‌ته‌وه‌په‌رسته‌کان هه‌وڵیان داوه‌ که‌ سه‌رکرده‌یه‌کی نه‌مری رۆحی وه‌ك سومبلی نه‌ته‌وه‌یی بۆ نه‌ته‌وه‌که‌یان دروست بکه‌ن بۆ بەردەوامی دان بە شەرعیەتی سیاسیان ، بەلام لەگەل هەمۆ ئەمانەشدا هه‌رگیز ناتوانن به‌ بۆ هەمیشە ئەو کارە بکەن . سەرۆکی رۆحیان کردوە بە خودا ، سەرۆکیان کردوە بە پێغەمبەر ، ڕیبازەکەیان کردوە بە کتابی پیرۆز و شوێنی ناشتنی سەرکردەی رۆحیشیان کردوە بە قودس و کەعبە .

سرودی نه‌ته‌وه‌یی ، ئاڵای نه‌ته‌وه‌یی ، سه‌رۆکی رۆحی …هتد ، به‌پیرۆزترین سومبول و ناسنامه‌ی نه‌ته‌وه‌یی داده‌نێن ، وه‌ك ئه‌وه‌ی پیرۆزیەکانی دینیکی خودایی بن نه‌ك ره‌مزی ئایدۆلۆژیا و رێبازیکی سیاسی دیاریکراو .

لە ڕوانگەی نەتەوەپەرستێکەوە ،هه‌رچییه‌ك له‌مێژوی کۆن و نوێی نه‌ته‌وه‌که‌ی ڕویدا بێت ، به ‌باش و بەخراپ ، به‌سه‌رکه‌وتن و بە شکستانەوە ، نه‌ته‌وه‌په‌رست به‌شکۆمه‌ندی و سه‌رکه‌وتنی داده‌نێت ، ‌یان له‌خراپترین حاڵه‌تدا یا نکۆلی لە خراپی و شکسته‌کان دەکات وە ‌یان پاساوی بۆ ده‌هێنێتەوە ، یاخود به‌پیلانی دوژمنانی له ‌قه‌ڵه‌م ده‌دات .

نه‌ته‌وه‌په‌رستی تینوی ده‌سه‌ڵاته‌ ‌بۆ گه‌یشتنی بە دەسەلات و هێز هه‌مو رێگایه‌ك ده‌گرێته‌به‌ر؛ له‌ترساندن ، تۆقاندن ، له‌خشته‌بردن ، گه‌وجاندن ، شه‌ڕ و پاکتاوکردن .

نه‌ته‌وه‌په‌رسته‌کان له‌هه‌ر کوێیه‌ك بن و سه‌ر به‌هه‌ر نه‌ته‌وه‌یه‌ك بن توانایەکی رادەبەدەریان هەیە لە نه‌بینینی راستی و فاکته ‌له‌یه‌کچوه‌کانیان . زۆربەی کاتەکان بڕیار لەسەرکار و کرده‌وه‌کان ده‌دەن وه‌ك خراپ یان باش ، له‌سه‌ربنه‌مای ئه‌وه‌ی که‌ کێ و کام نه‌ته‌وه‌و کام رابه‌ری سیاسی ئه‌م کارانه ‌ئه‌نجام داوە ، نه‌ته‌وه‌که‌ی خۆی یان نه‌ته‌وه‌کانی تر ، ڕابەرەکەی خۆی یان سەرکردەیەکی تر ئەنجامیانی داوە .

له‌زۆربه‌ی کاته‌کاندا ئاماده‌نییه‌ ره‌خنه‌ له‌ نه‌ته‌وه‌ و سه‌رکرده‌کانی خۆی بگرێت ، وە کاتێك حیزب و سەرکردەکەی توندوتیژی و نادادپه‌روه‌ری و سیاسه‌تی چه‌وت ئه‌نجام ده‌ده‌ن . قسه‌ی سه‌روبنی زمانیان ” بژی سه‌رۆك و نه‌ته‌وه ‌و نیشتمان” ـه .

له‌کۆتاییدا نه‌ته‌وه‌په‌رستان توانایه‌کی ڕاده‌به‌ده‌ریان هه‌یه‌ نه‌ك هه‌ر بۆ چه‌ند باره‌کردنه‌وه‌ی دروشمی ” بژی سه‌رۆک و نه‌ته‌وه ” ، به‌ڵکو نه‌بیستنی ئه‌و ره‌خنانه‌ش که ‌له‌لایه‌ن نیشتمانپه‌روه‌رانەوە لە ڕوانگەی دڵسۆزیانەوە بۆ نەتەوە و نیشتمان ئاڕاسته‌یان ده‌کرێت .

1,953 جار بینــراوە لەڕەهێڵپۆست

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies