Refiq-Sabir

دکتۆر رەفیق سابیر : کوشتاری بەکۆمەڵی ئێزدییەکان و بەرپرسیاریی دەسەڵاتی هەرێمی کوردستان .

* مالیکی بەرپرسیاری چوڵکرنی موسڵ خەڵکەکەیەتی ، ئەی کێ بەرپرسی تەسلیمکردنی ناوچە ئێزدینشینەکان و کوشتاری خەڵکی ئێزدییە ؟

* شکست و هەڵاتنی لەشکری پارتی لە رەبیعە و زوممار و شەنگال ، تەواو لە شکست و هەڵاتنی سوپای عێراق دەچێت لە موسڵ . هەردوو لەشکر خیانەتیان لە خەڵک و شەرەفی نەتەوەیی و سەربازیی خۆیان کرد و خەڵکیان بۆ شمشێری پیاوکوژانی داعش بەجێ هێشت .

1

لەشکری تیرۆریستیی داعش هەر لە سەرەتای دەرکەوتنییەوە لە سوریا ، پەلاماری گەلی رۆژئاوای کوردستانی دا و کۆمەڵکوژیی گەلی کوردی حەڵال کرد . هەندێک لایەنی سیاسیی کورد ، لە رۆژئاوا و باکووری کوردستان، لە سەرەتاوە پێێان وابوو کە داعش بە هاندانی تورکیا و لەجیاتی ئەو شەڕی کورد دەکات ، چونکە داعشییەکان لە رێی تورکیاوە و بە ئاگاداریی دەزگای موخابەراتی تورک هاتوچۆ دەکەن و لەلایەن تورکیاوە کۆمەک دەکرێن . بەپێی هەندێک سەرچاوەش لەسەدا دەی چەکدارانی داعش تورکن . ئەو لایەنە سیاسییانەی رۆژئاوا و باکووری کوردستان هەر زوو گەیشتنە ئەو باوەڕەی کە لەشکری تیرۆریستیی داعش، دوای کوشتاری کوردی سوریا ، پەلاماری باشووری کوردستان دەدات. بۆیە ئەوان داوای هاریکاری و هاوکارییان لە حکومەتی هەرێم کرد تا ئەو مەترسییە لە خۆیان و لە هەرێمی کوردستان دوور بخەنەوە . بەڵام حکومەتی هەرێم و پارتی دیموکراتی کوردستان، لە جیاتی ئەوەی هاریکاریی گەلی کوردی رۆژاوا بکەن لە شەڕی دژ بە تیرۆریستاندا، سنووری هەرێمی کوردستانیان بە رووی کوردی رۆژئاوا داخست و بە چاولێکەریی تورکیا، جەستەی کوردستانیان بە خەندەق لەت کرد .

ئێستا ئاگرەکەی داعش ، کە دەکرا لە رۆژئاوای کوردستان کز و سنووردار بکرێت ، گەیشتۆتە باشووری کوردستان و لە رۆژی دوو ئابەوە ، تیرۆریستە ئیسلامییەکانی داعش دەستیان بە کۆمەڵکوژی و راونانی ئیزدییەکان کردووە .

ئایا ئەم کوشتار و ئاوارەکردنەی ئێزدییەکان کارێکی حەتمی بوو کە هەر دەبوو روو بدات ، یان لە ئەنجامی کەمتەرخەمی حکومەتی هەریمی کوردستانەوە بوو ؟

دوای داگیرکردنی موسل و پەلاماردان و دەرپەڕاندنی مەسیحییەکان لەلایەن داعشەوە ، بە ئاشکرا دیار بوو کە دوای ئەوان نۆرەی کوشتاری بەکۆمەڵی ئێزیدی و شەبەک دێت . کەواتا دەبێت بپرسین بۆچی حکومەت ، بە تایبەتی پارتی دیموکراتی کوردستان ، کە کۆنترۆڵی شەنگار و ناوچە ئێزدینشینەکانی دەکرد ، رێوشوێنی پێویستیان نەگرتە بەر بۆ ئەوەی نەهێڵن ئێزدیەکان کۆمەڵکوژ بکرێن ؟ بۆچی پێشمەرگەکانی پارتی ، وەکو هێزی پێشمەرگەی کوردستان لە جەلەولا و خانەقین و ناوچەکانی کەرکووک ، داکۆکییان لە خەڵک و خاکەکەیان نەکرد ، لە جیاتییان سووک و ئاسان ناوچەکانیان رادەستی پیاوکوژانی داعش کرد؟!

رۆژی سێی ئاب خه‌یری‌ شنگالی‌ ، كارگێڕی مه‌ڵبه‌ندی‌ موسڵی‌ یه‌كێتی‌ نیشتیمانی‌ كوردستان له‌لێدوانێكدا بۆ رادیۆی نەوا دەڵێت : ( له‌كاتژمێر 10ی‌ سه‌رله‌به‌یانی‌ دوێنێوه‌ شه‌ڕ ده‌ستێپێكردووه‌ ، له‌چه‌ندین میحوه‌ری‌ سنوری‌ (به‌عاش) و (ناحیه‌ی‌ قه‌یره‌وان) و سنوری‌ سوریاوه ‌، شه‌ڕو پێكدادان بووه‌ ، ته‌نها هاوڵاتیانی‌ ناوچه‌كه‌ مابوونه‌وه‌ به‌رگرییان له‌خۆیان ده‌كرد ، پێشمه‌رگه‌ هیچ موقاوه‌مه‌یه‌كی‌ نه‌كرد و كشانه‌وه‌ به‌شێوه‌یه‌كی‌ ناڕێكوپێك ، (5) لیوای‌ پێشمه‌رگه‌ و زێڕه‌ڤانی‌ بوون كشانه‌وه‌، ته‌نها خه‌ڵك مایه‌وه‌ خه‌ڵكه‌كه‌ش تا كاتژمێر 6 ی‌ سه‌رله‌به‌یانی‌ ئه‌مڕۆ شه‌ڕیان كرد له‌دژی‌ گروپه‌ چه‌كداره‌كانی‌ داعش ، دوای‌ ئه‌وه‌ی‌ كه‌ عه‌تاد و فیشه‌ك به‌و خه‌ڵكه‌ نه‌ما له‌شه‌ڕه‌كه‌ كشانه‌وه‌ و به‌هه‌زاران خێزان و خه‌ڵكه‌كه‌ روویان كرده‌ شاخی‌ شەنگال و به‌بێ‌ ئه‌وه‌ی‌ ئاوی‌ خورادنه‌وه‌ و خواردنیان هه‌بێت بێخۆن و بیخۆنه‌وه‌، بارودۆخیان زۆر خراپه ‌، داعشیش به‌ناو هه‌موو گونده‌كاندا كه‌وتوه‌ و خه‌ڵكی‌ بێتاوانیان كوشتووه‌ و تا ئێستا كه‌ من قسه‌ بۆ رادیۆ نه‌وا ده‌كه‌م 20 هاوڵاتی‌ ئێزدی‌ رفێنراوه‌ و 25 یش كوژراون ).

بۆ خوێندنەوەی تەواوی بابەتەکە کلیک بکەرە سەر ـــ کوشتاری بەکۆمەڵی ئێزدییەکان و بەرپرسیاریی دەسەڵاتی هەرێمی کوردستان

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies