ئەبوبەکر جاف : لە پێناوی سلێمانیدا ـ گەرمیانییەك بۆ سلێمانی .

شەڕت دەكەم ، شەڕیشت بۆ دەكەم

 
1

تەنیا لە وشەدا بۆ شەڕو یارو نەیاری مەگەڕێ ، بزانە قسەكەرێك چ جەبرو چ هابیتوس و چ باكگراوندێك دەیهێنیتە قسە . قسەكردن دەیەوێت چی بڵێت ؟ قسەكردن دەركەوتنی بەركەوتن و پەیوەندییەكانی قسەكەر/ قسە لە سەركراو و . واتە دەبێت دوورتر لە ڕستەو وشەیەك بڕوانین بۆ ئەوەی ستراكتۆرو خەیاڵدان و ( گرێیەك ) بدۆزینەوە كە قسەكردن بە زیمنی و بە ئاشكرا باسی دەكات .

2

سلێمانی نەوەی یەكەمی خەیاڵ و خەیاڵكردنی ناسیۆنالیستانەی ئینسان و بەیاغی دەستەجەمعی ئێمەیە . لە كارێكتەری سیاسی و هونەری و ئەدەبی و شاعیرەكانەوە ، بۆ كۆمەڵێك بكەری دیكە گوزارشتن لە ڕۆحی نەتەوەو ئینسانی ئێمە . سلێمانی بە تەنیا بزوتنەوەیەكی سیاسی نییە ، سلێمانی خولقێنەرو داهێنەری خەیاڵی شعری و هونەری و سیاسی بوونێكە ، كە ئەگەر سلێمانی نەبوایە زۆر نوقسانیمان هەبوو . سلێمانی مەولانا خالیدی نەقشەبەندی و نالی و مەحویو سالم و كوردی و شێخ نوری و پیرەمێردو گۆران و بێكەسی باوك و كوڕیش و ….. سلێمانی جوڵەو هەستانەوەكانی سەرای نیوەی یەكەمی سەدەی بیست . سلێمانی ساڵانێك كە بارزانی نەمر وەك پەناگەیەك لەوێ ژیا . سلێمانی یەكەمین تاراوگەی بارزانی باوك . بۆچی ؟

3

دەبێت لە ڕووی سیاسی و سۆسیۆلۆژییەوە لەو برینە تێبگەین ، لەو جێ خەنجەرە تێبگەین كە ، سلێمانی لە ڕۆحی چەپ و كۆمۆنیست و ماركسییەكانی سۆڤیەتگەراو عێراقچێتی دا . ڕۆژگارێك بۆ منەورانی كورد عەیبە بوو ماركسی نەبن . بەڵام سلێمانی تێكشكێنەرو ابراهیمی بتشكێنی ئیدۆلۆژیای عێراقچێتی شیوعییەكان بوو . سلێمانی بە كوردیكردنەوەی خەیاڵ و خەیاڵكردن و بە خەیاڵكردنی خەم و بە تەنگەوە هاتنی نەتەوە بوو . سلێمانی برینێكە لە جەستەی زۆڵەكوردو غەیرە كوردەكاندا تا ئەو ئاستەی دەیان ساڵی دیكەش دەڕوات . ئیشقاق و كەرتبوونی سلێمانییەكان لە حزب و پارتە ئەنتەرناسیۆنالیستەكان تەنیا خەیاڵی ( كوردبوون ) لە پشتیوەیەتی . سلێمانی لە خەیاڵی نالی و سالمەوە بۆ خەیاڵی ڕەهەندییەكان چییە جگە لە بت شكاندن . سلێمانی كە کاری تەنیا بتشكاندن نییە ، بەڵكو ڕیشەیی تر كاری ( بتپەرستی شكاندن و تەقسی بتپەرستییە ، بۆیە بتەكان زۆر نامێننەوە . شیوعییەكانیش ئەو بتە ئاوابوو مردووەن كە بە ئێستاشەوە شوێن خەنجەری سلێمانییان پێوە دیارە . ئەگەر سلێمانی چاوەڕوانی ستایشی شیوعییەكان بێت ، گەمژەیی و گێلێتییە . تەنانەت كۆمەڵەو كوڕانی كۆمەڵەی كوردستانیش كوردبوونەوەو نە كوردیكردنەوەی خەیاڵ و وەهمی ئەنتەرناسیۆنالیزم و برایەتی گەلان بوو . ئەگەر ئەمە ئەكتی سیاسی و خەیاڵكردنی سلێمانی بێت ، هەر دەبێت چاوەڕوانی ڕق و كێنەو بوغز بێن بەرانبەر سلێمانی لە لایەن كەس و گروپێكەوە كە سلێمانی دەستی هەبووبێت لە نەخیفكردن و شكاندنی شكۆو غروری ئەنتەرناسیۆنالیستییاندا .

4
پارتی بە قورسی و بە قورسایی لە ساڵانی شەست و حەفتاو هەشتاكاندا ڕۆحی لە سلێمانی دابووە . خێزانێك نابینیەوە لە سلێمانیدا كەسێكی بە جۆرێك لە جۆرەكان پەیوەندی بە شۆڕشی ئەیلولەوە نەبووبێت . هەرچی ئێستایە ، پەیوەندی ناڕێكی و زیزبوون و زویربوون و نیگەرانی و دڵگرانی ئێسڕای سلێمانییە ، لە سەرەتاوە بۆ كۆتایی پەیوەندی بە دووركەوتنەوەی پارتییەوە هەیە كە ناتوانێت خەیاڵ بكات و خەیاڵی هەبێت . پارتی لە دەیان شوێندا كوڕی سلێمانییەو لە مناڵدان و خەیالدانی كوردییانەی سلێمانییەوە هاتۆتە دەرەوە . بەڵام ئێوەیەك هەر بە خەیاڵی ئەنتەرناسیۆنالیستییەوە لە سلێمانی و خەیالی سلێمانی بڕوانن ، هەر بەو حەسرەت و داخ و برینەوە دەمرن .

5
شەری سلێمانی بە كۆنەقین و كۆنە برین و خەیاڵی پێش كوردبوونەوە ناكرێت . شەری سلێمانی لە نالییەوە بۆ ڕەهەندییەكان بە ئیۆلۆژیاوە ناكرێت . دەبێت چەكی نوێت پێ بێت . دەبێت خاوەنی سەرمایەو كاپیتاڵی جیاواز بیت . دەبێت بزانیت لە كوێداو چۆن و بە چی شەر دەكەیت . دەبێت سلێمانی بناسیت . شەڕی سلێمانی دەبێت بە شەڕێك بێت لە پێناوی سلێمانی . من شەڕی سلێمانی دەكەم بۆ سلێمانی ، بەڵام دەزانم لە كوێدا خۆشم دەوێت و لە كوێشدا نیگەرانم لێی ، نەك ڕق و كینەو بوغز . شەڕ ی سلێمانیی و شەڕ بۆ سلێمانی بە هەژاری و كڵۆلی مەعریفییەوە ناكرێت . بەڵام شەڕی سلێمانی و شەڕیش بۆ سلێمانی دەبێت نییەتی پاك و ئیرادەی پاكی هەبێت . بۆ ئەوەی شەڕی سلێمانی بكەیت دەبێت بەشێك بیت لە سلێمانی بە عیشق و نیگەرانییەكانیشتەوە . واتە عیشق و توڕەیشت هەر بۆ سلێمانی بێت .

بەکلیکێک لەسەر سمبولەکانی خوارەوە ، ئەم بابەتە دەگات بەهاورێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies