Mamosta-Osman

عوسمان عومەر : شەرەکانى شوباتى 1988 ى دۆڵى جافەتى و کشانەوەو دواتر ناونانى بە ئەنفال .

سمبولی تۆڕەکۆمەڵایەتیەکان کلیک بکەو، ئەم بابەتە بنێرە بۆسەر بەشی خۆت یان هاوڕێکانت

بەشى سێیەم 

گیرانی هەردوو واز قیادەکەی هەردو فەرماندە سەربازیەکەو نەخشەو پلانی هێرشەکانیان گیراو هێنرا بۆ لای بەرێز کاک نەوشیروان گەر ئەو خائینە نەبوایە هەردوکیان دەگیران چونکە بۆسەکە هێندە مەحکەم دانرابوو ، بەمەش زیاتر مەبەست و مەرامی هێرشەکانیان رونبۆوە لای سەرکردایەتی و بەتایبەت کاک نەوشیروان چونکە لە غیابی جەنابی مامجەلال ئەو فەرماندەی گشتی هێزی پێشمەرگە بوو، لەگەڵ رونبونەوەی ئامانجی هێرشەکانی دوژمن بانگی خەڵکی ناوچەکە کرا ، بەهۆی ئەوەی ناوچەکە هەموی بەفر گرتبوی بەهاوکاری پێشمەرگە و خەلکی ناوچەکە و ئێرانیەکان رێگایەک لە شاخی کەرکەر بە گۆمەزەل و دۆلی شێ محمەدو گەلالە تاسەفرە لە هێرشێکی پێشویاندا ئێرانیەکان گرتبویان لە گەڵالە خەیمەیەکی پەیوەندیەکان دانرابوو لەگەڵ بێتەلێک کە کاک باست کاری لەسەردەکرد و شێخ محمەد سەرگەلویی سەرپەشتی دەکرد بۆ گەیاندنی هەرهاوکاریەک بۆ هێزی پێشمەرگە لەوێوە لەهەمان کات ڕێگەیەکیش بوو بۆ کشانەوەی هێزی پێشمەرگە چونکە شاخی گۆجار کەوتبوە دەست ئێرانەکان و تەنها چەند کیلۆمەترێ لە نێوان سەرکردایەتی و هێزی ئێرانیەکان لە نێوان دا مابوو ئەوە ترسەکەیانی زیاتر کردبوو ….. بەپێی زانیاریە نوێکانی وەرمان دەگرت فیرقەی پیادەی 36 و 38 هێنرابووە ناوچەکە ژمارەی هێزەکان لە زیاد بوون بوو بە مەزەندە هێزەکانی ی ن ک خۆیان لە 2500 تا 3000 پێشمەرگە دەدا جگە لەو هێزانەی لە هەندێ شوێن وەک یەدەگ لە دەوروبەری سەرکردایەتی بوون لە بەرامبەردا هێزەکانی دوژمن خۆیان لە 150 هەزار دەدا .
رۆژی 21 ی شوبات بروسکەیەکی زانیاریم وەرگرت بەهۆی هێڵی تایبەتەوە کە تێیدا هاتبوو ئەمرۆ رژێم 10 کاتیوشای چل لولەیی هێناوەتە کارێزە و 5 دانەیان گولـلەی ئاساییە و 5 یان هەڵگری کیمیاوی بەپەلە ئەو بروسکەیەم گەیاندە بێتەلەکەی کاک نەوشیروان کە کاک سەرکەوتە عەینەک چەند رۆژێک بوو لەلایەن کاک بەختیاری بەرپرسمان بانگ کرابوو لەهەمان کاتدا کاک خالید رەزا ماوەیەکی کەم بوو راهێنرا بوو لە سەر کاری بێتەلی هێشتا باش ئەزمونی وەرنەگرتبوو دەبوایە هاوکاری بین لە وەرگرتنی بروسکەکاندا لەگەل ئەوەش زۆر باش بوو چونکە بروسکەو هەواڵەکان ئەوەندە زۆر بوو بە 3-4 کەس ئینجا فریا دەکەوتین چونکە زۆربەیان بە شیفرە بوو دواتر منیش ئاگادارکرام کە بچمەلایان و یاخسەمەر جێ بهێلم بۆ کاک سەربەستی هاوکارم و لەکاتی رۆیشتنم بچێتە لای بێتەلەکەمان چونکە ئەو خێزان و منالی لەگەڵ بوو زۆر جەختم لێکردەوە کە شەو لەوێ بێ و زانیاریەکەم بە ویش ووت هەموو شتێکمان هەیە پێویستت بە هیچ نابێ لەگەل خۆت بیبەی تەنها مەهاباد خان و زریانی کورت هەلگرەو بچنە ئەوێ ، ژووری بێتەلەکەمان پەناگەی هەیە و ئەمینترە و ئەوەشم پێ ووت رەنگبێ ئەمشەو کیمیا بارانی سەرتاسەری ناوچەکە بکرێ و هێرشەکان دەست پێ بکەن و بەرێکەوتم بۆ بەرگەل و بۆ بارەگاکەی کاک نەوشیروان و لەوێ کاربکەم ، دوای گەیشتنم چەند جارێ بانگی سەربەستی هاوڕێم کرد هەر دەنگی نەبوو ..
شەوی 22 / 23 ی شوباتی ساڵی 1988 نزیکەی کاتژمێر 1.30 خولەک تا کاتژمێر 2.00 ی شەو لە هەموو لایەکەوە بوو بەگرمە گرم و راجیمەباران بە سەختی دەستی پێکرد یاخسەمەر ، گویزیلە ، هەلەدن ، چاڵاوا و بەرگەلو و هەرچی سەر شاخ و تەنانەت بزنە رێگاکانیشی کیمیا باران کرد بۆ ئەوەی پێشمەرگە سودی لێ نەبینێ و بەکاری نەهێنێ بۆ کشانەوە ، دوای زانیاری وەرگرتن بۆمان دەرکەوت کە سەربەستی هاورێم هەر لە یاخسەمەر ماوەتەوە تارادەیەک ئیهمالی کردوە لە چونە سەرەوە بۆیە بەر گازە کیمیاویەکە کەوت و بەبێ هۆشی هێنرایە نەخۆشخانەی بەرگەلوو بۆ چارەسەری سەرەتایی و دواتر لەگەل چەند بریندارێکی تردا بۆ رۆژی دواتر بە کۆپتەر رەوانەی نەخۆشخانەکانی تەورێز و ئەصفەهان کران بۆ چارەسەر وەرگرتن و چەند پێشمەرگەیەک هەر لە یاخسەمەر شەهید بون و ئەوگازەی بەکار هێنرابوو گازی دەمار ( اعصاب ) بوو کە خەلکی توشی هەلوەسە و ورێنەو کوێربونی کاتی دەکرد .
لەراستی دا ماوەیەک بوو کۆپتەرە ئێرانیەکان کەلوپەل پێداویستیان بۆ هێزەکانی خۆیان دەهێنا جارجاریش بۆ ئێمە بەڵام زیاتر بۆ ترساندنی هێزەکانی عیراق بوو بۆ ئەوەی زیاتر هێرشەکانیان چربکەنەوە بۆ ناوچەکە و ی ن ک لەوێ نەمێنێ و ببێتە گۆرەپانی جەنگی عیراق و ئێران وەک پلانێک بوو دژی ی ن ک ، لە پێش شەرەکان دەنگۆیەک هەبوو گوایە رژێمی عیراق داوای گفتوگۆی لە لایەنەکانی بەرەی کوردستانی کردووە بەڵام ئەو نامەیە نەهێنرا و نەگەیشتە سەرکردایەتی ی ن ک ئەوەش پلان و دەستی هەندێ لایەنی ناوخۆی تێدا بوو بۆ زیان گەیاندن بە ی ن ک بە لەدەستدانی ئەو ناوچەفراوانە ئازادکراوانەو جەماوەرەکەی چونکە لایەنەکانی تر ئەو جەماوەرەیان نەبوو لە ناوخۆی کوردستان .. شەرەکان تاکۆتایی شوبات تا دەهات سەختتر و قورستر دەبوون و هێرشەکان چڕتر دەبونەوە و بەرەنگاری و گیانفیدایی و لەخۆبوردوویی پێشمەرگە نمونەیەکی کەم وێنە بوو تەنانەت لە سەرکردایەتی بریاری ئەوە درابوو شەری بست بەبست لەگەڵ دوژمن بکرێ تا هەموان شەهید دەکرێین ئینجا دوژمن بێتە ناوچەکە بەڵام دواتر بریارێک درا بە تەکتیک کشانەوە سەری دوژمن بسورمێ .
لەسەرەتای مانگی ئادار تا دەهات هێرشەکانی دوژمن توندترو چرتر دەبوون و پێشمەرگەش بەو پەری وورەبەرزی و لەخۆبوردوویی و قارەمانیەتی بەرگرییان دەکرد بەراستی دەتوانم بڵێم هیچ پێنوسێک نییەو ناتوانێ وەسفی ئەو شەڕانەبکات نەک لەبەر ئەوەی خۆم پێشمەرگە بوم و لەناو واقیعەکەدابووم بەڵکو درۆ نییە گەر بە داستان ( مەلحمە) ناوی ببەم وەک گلگامش لێرەدا نمونەیەک لەو فیداکاریانە لە یەکێ لە بەرەکانی شەڕ بخەمە روو کە بە زانیاری لە ناو رێکخستنەکانمانەوە بۆمان هاتبوو لەناو سوپا دەلێت ( یەکێ لە فەرماندەی فیرقەکانی سوپای عیراق بە ئامادەبونی عبدالجبار شەنشەل کە ئەوکات وەزیری بەرگری عیراق بوو تۆپببارانی شاخێکیان کردووە ووتویانە ئەگەر عورفی عەسکەری هەبێ نابێ ئەو شاخە کەسی پێوەمابێ هەموی یا کوژراون یا برینداربون چونکە بەرد بەبەرد ئەمدیو ئەودیو بست بە بست نەماوە تۆپی بەرنەکەوێ ئێستا فەرمون فەرمان بدەن .

بە کلیکێک لەسەر مسبولەکانی خوارەوە ، ئەم بابەتە دەگات بەهاوڕێکانت