نەوزادی موهەندیس : ڕێكەوتنەكەی یەكێتی وگۆڕان لەنێوان تاكتیك و ستراتیژی سیاسیدا .

ڕۆژی 17/5/2016 ڕۆژی واژۆكردنی ڕێكەوتنامەكە ڕێك 6 ساڵ و 8 مانگ تێپەڕدەبێت بەسەر جیابونەوەی بزوتنەوەی گۆڕان لە یەكێتی نیشتیمانی كوردستان لە 25/7/2009 دا . لەو ماوەیەدا گرژی و ئاڵۆزیەكی توند و گەرم كەوتە نێوان ئەو دوو هێزەوە كە هەردووكیان سەر بە یەك قوتابخانەی سیاسی و فكری و ئایدۆلۆژین و یەك ناوچە و پێگەی جەماوەری و یەك تێڕوانین و تاكتیك و ستراتیژی سیاسیان هەیە و مێژوویەكی 36 ساڵەی خەباتی شاخ و شاریان پێكەوە هەیە ، سەرەڕای جیاوازی لە بیروبۆچون و نەخشە ڕێگا و كارەكتەرە سیاسیەكانیان . هەرئەم خاڵە كۆك و هاوبەشانە بونەهۆی ئەوەی كە جارێكی تر و لەم ماوە كورتەی دابڕانەدا هەست بە پێویستبونی كاری هاوبەش و لێكنزیكبونەوە و تەنانەت لە ئایندەشدا یەكگرتنەوە و تێكەڵاوبونەوەش بكەن . و بەهەردوولایان بتوانن كە ئەم قۆناغە سەخت و دژوارەی كە بەسەر مەسەلەی كوردا هاتوە و بەتایبەتیش لە باشووری كوردستاندا تێبپەڕینن .
ئاشكرایە ئەم دۆخە سیاسیەی ئێستای باشووری كوردستانی پیادا گوزەر دەكات هیچ مایەی دڵخۆشی نیە ، بەڵكو گەر بەراوورد بكرێت بە گەورەیی و مەترسی تەحەدا سیاسی و ئابوری و كۆمەڵایەتی و سەربازیەكان ئەوا زۆر مەترسیدار و تاریك دەبینرێت ، هەربۆیە وەك وەڵامدانەوەیەكی ووردبینانە و دووربینانە بۆ ئێستا و ئایندەی مەسەلەی كورد لەم بەشەدا دەبوو كاردانەوەیەكی بەهێز و ستراتیژی بنوێنرێت كە وەڵامدەرەوەیەكی ڕاستەقینە و بەهێز بێت بۆ هەموو ئەو تەحەدایانە . كورد لە ڕووی سیاسیەوە ماڵێكی لێكترازاو و دوور لەیەك و دڕدۆنگی سیاسیدایە و هیچ لێكتێگەیشتنێكی سیاسی و هیچ ئیجماعێكی سیاسی نیە لە نێوان سەركردە و پارتە سیاسیەكاندا لەسەر مەسەلە نیشتیمانی و نەتەوایەتیەكان ، لەڕووی ئابوریەوە هەرێم لە دۆخێكی زۆر دژواری دارایی و ئابوری و بێ‌ بازاڕی و بازرگانیدایە . زۆر گەڕاوەتەوە بۆ دواوە و بێكاری و هەژاریەكی توند بەرۆكی تاك بەتاك و خێزان بەخێزانی میلەتەكەمانی گرتوە، هەرئەم هۆكارەش بۆتە هۆی تێكچوونی باری كۆمەڵایەتی و ئاشتی كۆمەڵایەتی خستۆتە مەترسیەوە، ئەمە سەرەڕای مەترسیە گەورەكەی شەڕی تیرۆریستانی داعش و كاریگەریە خراپەكانی لەسەر كۆی ژیان و گوزەرانی میلەتەكەمان . و تێكچوونی پەیوەندیەكانی نێوان هەرێم و بەغداد لەلایەك و لەگەڵ دەرودراوسێكانیشدا لەلایەكی ترەوە و كاریگەری هەموو ئەم دۆخە ئاڵۆزانە و تێڕوانینی زلهێزەكانیش بۆ چارەنوس و ئایندەی هەرێمەكەمان لێڵ و تاریك ببون. ئەم ڕێكەوتنە بۆ خۆی هۆكاری خۆیی و بابەتی هەبوە و هەردوولا لە پلەی یەكەمدا پێویستیان بەم ڕێكەوتنە هەبوە چونكە هەردوولایان لەناوخۆی خۆیاندا لەدۆخێكی سیاسی و ئابوری باشدا نەبون و گیردۆدەی ململانێی سیاسی و باڵباڵێنە ببون وتاڕادەیەك نەیاندەتوانی درێژە بەو دۆخەی خۆیان بدەن هەربۆیە هەردوو لا بە تێگەیشتن و تێڕوانینێكی ستراتیژیانە هاتونەتە پێشەوە نەك وەك تاكتیكێكی سیاسی و یەكتر فریودان و بەدەستهێنانی دەسكەوتی بچوكی حیزبی لەسەر حسابی لایەنەكەی تر .
بۆیە ئەم ڕێكەوتن و نزیكبونەوەیەی ئەم دوو هێزە سیاسیە گەورە و كاریگەرەی هەرێم و عێراق و ناوچەكەش هۆكارێكی باش بوو بۆ تێپەڕاندنی قۆناغەكە و شڵەقاندنی گۆمی مەنگ و چەقبەستوی هەموو دۆخەكان . هەربۆیە ئەم ڕێكەوتنە كاریگەری باشی دەبێت لە ئایندەدا لەسەر هەمو ئاستەكان لەناوخۆی هەرێم و عێراق و ناوچەكە و تێڕوانینی زلهێزەكانیش ، چونكە دابەشبوونی گوتار و كرداری كورد و نەبوونی یەكهەڵوێستی پتەو و بەهێزی ناوخۆیی لەبەرامبەر بەغداد و دەوروجیرانیش پێگەو و گوتاری كوردی لاواز كردبوو ، ئەم ڕێكەوتنە بەدڵنیایی دۆخی سیاسی و ئابوری و كۆمەڵایەتی و سەربازی كوردستان دەگۆڕێت و دەیباتە قۆناغێكی هەڵكشاوترەوە و نزیك لە چارەسەریەكان .
ئایندەی ئەم ڕێكەوتنامەیە و سەركەوتنیشی بەندە بە نیەتی ڕاستەقینەی هەردوولاوە بۆ سەرخستنی و ئەمەش پەیوەستە بە متمانە بەیەكتر كردن و هەوڵدانێكی لێبڕوانە و خەمخۆرانە بۆ گەیشتن بەمەبەستە ڕایستەقینەكانی كە هەموو خاڵەكانی ناو ڕێكەوتنەكە لە خزمەتی بەهێزكردنی حكومەت و دەسەڵاتی كوردیدایە لەم هەرێمەدا ، كە حیزب و لایەن و سەركردە سیاسیەكان ئەركیانە كە ئەم دەسەڵاتە تۆكمەتر و بەهێزتر بكەن و درێژە بەمانەوەشی بدەن . ئەم ڕێكەوتنامەیە و ئاینەدەكەشی لە دوو ڕیانێكدایە لەنێوان دژەكان و لایەنگرانیدا، لەناوخۆی دوو حیزبەكە و لەسەر ئاستی هەرێم و ناوچەكەش كە هەریەكەیان بە هۆكارێكەوە نایەنەوێت ئەم ڕێكەوتنامەیە سەركەوتووبێت . هەربۆیە ئەركی هەردوو حیزبە كە هەوڵی جدی و گەرموگوڕ بدەن بۆ تێگەیاندن و ڕوونكردنەوەی مەبەست و نیەتەكانی پشت ڕێكەوتنەكە و بۆئەوەی متمانەی هەموان بەدەستبێنن و لەبەرەی دژەوە بیانكەنە بەرەی لایەنگر و پشتیوانی ڕێكەوتنامەكە و تێیان بگەیەنن كە ئەم ڕێكەوتنامەیە دژی هیچ حیزب و سەركردەیەك نیە و تەنهاوتەنها لە پێناو بەرژەوەندی باڵای میلەت و نیشتیمان و نەتەوەدایە و بریتیە لەستراتیژێكی دووربینانەو كوردانەی ڕاستەقینە نەك تاكتیكێكی ڕۆژانەی سیاسی .

کلیک بکەرە سەر سمبولەکانی خوارەوەو ، ئەم بابەتە ئاشنا بکە بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies