نەبەز گۆران: گروپی دەوڵەتەكە لە بەغداد بوون!

سمبولی تۆڕە کۆمەڵایەتیەکان کلیک بکەو، ئەم بابەتە بنێرە بۆ بەشی خۆت یان هاوڕێکانت

پڕۆژەی ئابووریی سەربەخۆ بانگی تێكشكانی خۆی دا. ( ئەگەرچی ئەشێت لەبنەرەتدا پرۆژەیەك نەبووبێت ناوی ئابووریی سەربەخۆبێت، بەڵكو پرۆژەیەك بووبێت بۆ پڕكردنی گیرفانی دەستەیەك. و هاوردەكردنی كاپیتالیزمێكی ژیان كوژ .)

گەڕانەوە بۆ (بەغداد) بەم شێوەیەی ئێستا، هیچ بەهێزییەكی كوردیی تێدانەبوو. یەكێك لە كێشە گەورەكانی دەستەی ڕامیاریی كورد ئەوەیە، وەك چاودێرەكان دەڵێن: كوردەكان هەمیشە لەكاتی لاوازییاندا دانوستان دەكەن لەگەڵ نەیارەكانیاندا. ئەم رستەیە بۆ رامیارییەكان زۆر راستە. كەمجار روودەدات لەكاتی بەهێزیدا دانوستانبكرێت. چوونەكەی ئەمجارەی ئەو گروپەش بۆ ناوەند، چوونێكی بەهێز نەبوو.
ئەو پڕۆژەیەی باسی ئابووریی سەربەخۆ، خۆ بەڕێوەبردنی سەربەخۆ، گوتاری دەوڵەتی دەكرد، دوای سەفەرەكەی وڵاتی (فەرەنسا) بەتەواوەتی تێكشكانی ئەو پرۆژەیە درا بە گوێی دەستەی رامیاریی كورددا و، ناچار بۆ داپۆشینی ئەو بانگە روونە، خەریكی ئاوەژوكردنەوەن.
ئەوەی لە ئێستادا چاودێرە ڕامیاریی و سەربازییەكان باسیدەكەن، ئەمەیە. پێویستە ئەمریكا هێزەكانی خۆی بۆ گرتنەوەی شاری موسڵ بەكار نەهێنێت، چونكە ئەو بڕە پارەیەی دەدرێت بە هێزەكانی كورد، بۆ بەژداریكردنیانە لەو پرۆسەیەدا لەبری هێزەكانی ئەمریكا. پاش ئازادكردنی ئەو شارەش، حوكومەتی عێراقی بگەرێتەوە بۆ شوێنەكانی پێش هاتنی (داعش) واتە بۆ كەركوك و ناوچە كێشە لەسەرەكان و، كوردەكان بگەرێنەوە شوێنەكانی خۆیان. واتە: بۆ ناوچەی دژەفرین.
ئەمە دیدی ئەمریكاییەكان و ئەوروپاییەكان و، توركەكان و، ئێرانییەكانە. هەموویان كۆكن لەسەر ئەوەی ئێمەی كورد زیادە رەویمانكردوە! زیادە رەوییەكەشمان پەیوەندی بەهەڵەی خەڵكەكەمانەوە نییە، پەیوەندی بەو دەستەیەوە هەیە بە خۆیان دەڵێن: ( رامیاریی _ سیاسیی) و بەردەوام كێشەكان لەبری چارەسەركردن گەورەتر دەكەن و، بەردەوام دەمانخەنە بەردەم شكست.
شكستی پرۆژەكانی كورد لەم هەرێمە، ئەشێت بە دیدی هەندێك كەس شكستی كۆمەڵگەیەك بێت. بەڵام راستییەكەی ئەوەیە شكستی گروپێكە، ئیدی ئەو گروپە بەخۆیان بزانن یان نا، ئەستێرەی رامیاریی ئەوان كۆتایی هاتووە و، ئەوەی ئێستا دەیبینین بەرهەمی هەڵە و ( گەندەڵی _ پیسخۆریی ) ئەوانە كۆمەڵگەیەكی تووشی ئەم هەموو كێشە گەورانە كردووە.
ئێمە جگە لە دیووە رامیاریی و سەربازییەكە، بەكاپیتالزیم گەمارۆ دراوین و خەریكە دەخنكێین. ئەوەشی ئەم كاپیتالیزمە بێرەحمەی هێنا و كردی بە پاڵەوانی ژیانمان، ئەو دەستە رامیارییە خۆپەرستانەبوون لە پێناو كەمێك ژیانی خۆیان ژیانی كۆمەڵگەیەكیان خستە بەردەم ئەم كێشانەوە. راستییەكەی دەتوانرێت بوترێت، ئەوەی لە ئێستادا ئێمە بەڕێوە دەبات، كۆمپانییا زەبەلاحەكانی سەردەمی كاپیتالیزمە، نەك دەستەیەك رامیاریی حیزبی، كە هیچ زانیارییەكیان لەسەر ئەو جیهانە مەترسیدارە نییە لە رێگەی ئەو كۆمپانیانەوە دێتە بەردەمان و بەناوی ئاوەدانییەوە ژیانیان ئاوەژوكرد بۆ ژیانێك ئومێدی تێدا نەبێت.
گەڕانەوەی ئەم شكستخواردوانە بۆ ( بەغداد) لە پاڵیدا گەڕانەوەی خەونی كۆمەڵگەیەكە بۆ دواوە و، یاریكردنە بەو گوتارانەی دەیانجار مامەڵەیان پێوەكراوە بۆ باشكردنی ژیانی گروپێك و وێرانكردنی ژیانی زۆریینە.
لە هەموو حاڵەتێكدا، جێگای دڵخۆشیی نییە، ئەگەر بوددجەی ساڵی (2017) بە نیوەیی بگەرێتەوە. چونكە ئەوەی ئەم بوددجەیە ئاراستە دەكات هەر ئەوانەن كە بوونە هۆی شكستە یەك لە دوای یەكەكان. ئەوەی جێگای دڵخۆشییە ئەوەیە، ئیدی ئەم دەستەیە كۆتایی بە كارەكانیان بهێنن و ددانی پێدابنێن، عەقڵی ئەوان بۆ ئەم قۆناغە ناشێت و شكستیانهێنا لە بەڕێوەبردنی هەرێمێك و، بەرهەمی ماندووبوونەكەیان هێندە دارزیووە شایەنی شانازیكردن نییە. ئەو گوتارانەش بەرزیانكردبوونەوە، گوتاری فریودەرانەبوون و ئەوەی راستەقینەیە ئەوەیە كە ئێستا دەیانبینین لە (بەغداد) خەریكی مامەڵەی دیكەن. بەڵام كێشەكە ئەوەیە وەك (لوقمانی حەكیم) دەڵێت : ئەمڕۆ زۆر خەمبارم، چونكە كۆمەڵێك گەمژەم بینی ستایشیان دەكردم. ستایشكردنی گەمژەیەك ئازاری زۆرترە لە تانەی هوشیارێك.
لێ‌، پێدەچێت ئەم دەستەیەی دەوڵەتەكە، هێشتا نەگەیشتبنە ئەو تێگەیشتنەی كە بزانن ئەو لەشكرەی ستایشیان دەكات، لە چ چینێكن و، ئەشێت لەبری خەمبار بوونیان دلخۆشیان بكات! چونكە هێشتا پێویستیان بەو ستاییشەیە كە هەرگیز لەزمانی كەسە هوشیارەكانەوە نایەتە دەر.

– خوێنەری بەرێز/ كۆمیدیترین شت لەم سەردانە لەوەدابوو، هەموو ئەوانەی چووبوونە (بەغداد) ئەوانەبوون زۆر باسی دەوڵەت و سەربەخۆیی دەكەن!