ڕەسوڵ بۆسکێنى: گەلى دڵسۆز و سەرکردەى بێخەم.

یەکێک لە تایبەتمەندیەکانى نەتەوەى کورد ئەوەیە، خەڵکى کورد سەرکردەکانى خۆیان خۆش دەوێ، ڕێزیان لێ دەگرن و بەدڵسۆزى و شانازیەوە شوێنیان دەکەون، لەپێناوى سەرۆکى خۆیاندا گیانى خۆیان فیدا دەکەن، هێندە دڵسۆزى سەرۆک و بەرپرسەکانى خۆیانن تاڕادەى مردن خۆى لەپێناوى دا بەخت دەکات، چەندین جار ئەوەمان بیستووە و بینیومانە، سەرەڕاى مەترسى و نەهامەتیەکان، بۆ سەرۆکەکانیان خۆیان بەرەو ڕووى مەرگ کردۆتەوە، لەو بارەیەوە شەرەفخانى بدلیسى دەڵێت: کورد لەچاو دراوسێکانى هەژار و نەدارن، هەرگیز گازەندە لەبەختى خۆیان ناکەن، لەپێناوى سەردار و مەزنى خۆیان دا بەگیان و دڵ گیانبازن و بەتێکڕایى هەموویان لە قارەمانى و ئازایەتى و بەجەرگى دا لەلاى ژوورووى هەموو کەسێکەوەن، کوردەکان ئاکارێکى ناپەسندیان کەهەبێ هەر ئەوەندەیە کەسیان سەر بۆکەس ناچەمێنێ و هەروەک تاکە تاکە بیر لە سەربەرزى خۆى دەکاتەوە، تێکرا بیر لە سەربڵندى تێکڕایى ناکەن و پشتى یەک ناکرن و نابنە یەک.

دەربارەى دڵسۆزى کوردەکان بۆ سەرۆکەکانیان ڕیچ لە گەشتنامەکەى دا دەڵێت: لە ڕاستى دا پابەندى کوردەکان بەسەرۆکەکانیانەوە شتێکى زۆر بەهێزە، لەگەڵ سەرۆکەکانیان لە حاڵێکدا دەبن تەواو دەستبەردارى خۆیان دەبن، تاڵترین ژیان دەبەنەسەر و هەموو نەبوونى و کوێرەوەریەک دەچێژن، بەبێ ئەوەى وەرتەیەک لە دەمیانەوە بێت، ئەمانە بەوە ناسراون لەتەنگانەدا بەکۆڵ هەڵگرى و ئاوکێشى پارە پەیدا دەکەن، و دەیدەن بەسەرۆک و سەردارەکانیان تا پێى بژین، بەڕادەیەک بە سەرۆکەکانیانەوە پابەندن سامى ئاوارەیى و دەربەدەرى نایان ترسێنێ، بەرگەرى هەرچى هەژارى و نەبوونیەک دەگرن، بەبێ ئەوەى ئاخ و ئۆفێک دەرببڕن.
چیرۆک و پەیامى خۆش و بەپێز لاى ڕەفیق حیلمیە بۆ هاتنەوەى شێخ مەحمودى نەمر لە بەندیخانەى ئینگلیزەکان لە هیندستان، مەگەر هەر مامۆستا ڕەفیق حیلمى وێنەى بکێشێ کەچۆن، لەهەموو لایەکى کوردستانەوە پۆل پۆل و دەستە دەستە ئەهالى و عەشایەر بەپێیان و بەسوارى ڕێیان گرتبووەبەر ڕووە و بەغدا دەچوون تا دەورى کفرى و هەندێکیشیان تا نزیک بەغدا ڕۆیشتوون، ڕێگاوبان بەعەشایەرى پڕ چەک و سیلاح ڕازابۆوە، دەگێڕنەوە بیست هەزار سوارى کورد ڕژابوونە ئەو دەشتەوە، وەکو مانگى جەژن بۆ شێخ مەحمودیان دەڕوانى، کاتێک شێخیش گەیشتەوە ناو شارى سلێمانى لەلایەک گریانى خۆشى و هەلهەلەى شۆڕەژنانى مێخەک بەندلەمل و هەیاسە لەپشت، لەلایەکى تر گوڵباران و قریوەى کچۆڵە خنجیلانە و ئێسک سوکەکانى پەنجە خەناوى فرمێسکى شادى بەچاوانا دەهێنایە خوارەوە، هەزاران پیاو و ژن بەچەپڵەڕێزان و دەنگى هەربژى، هەزاران قوتابى کوڕ و کچ سروودى بەخێرهاتنەوەى دەخوێندەوە، ئەو ڕۆژە ڕۆژێک بوو سلێمانى ببوە مەحشەر.
ئەوەشمان بیستووە لەکاتى هاتنى سکۆى شکاک بۆ سلێمانى چۆن و بە چ شکۆ و ڕێزێکەوە پێشوازى لێ کراوە، هەندێکیشمان هێشتا ئاوارەیى خەڵکى کوردمان لەبیرە لەکاتى کۆتایى شۆڕشى ئەیلول دا بۆ ئێران و ئۆردوگاکانى پڕ مەینەت و دەردەسەرى ئاوارە بوون و تووشى چ سەرگەردانیەک بوون، مەگەر هەر لاپەڕەکانى مێژوو بینوسێتەوە، کەچى خەڵک گازندەیان لە سەرۆکەکانیان نەکرد، بەڵکو نەفرەتیان لە سیاسەتى نەگریس و چەپەڵى دوژمنان دەکرد، زۆربەشمان پێشوازى هاتنەوەى تەرمى خوالێ خۆش بووان مەلا مستەفا بارزانى و ئیدریس بارزانیمان لەبیرە کە چ قەرەباڵغى و ئاپۆراى خەڵک ڕاخزى بوو، نەک هەر ئەندام و لایەنگرانى پارتى و بارزانى، بەڵکو لەژێر ڕێنمایى مەکتەبى سیاسى و سەرکردایەتى(ى.ن. ک) و لەژێر گوشار و پێداگرى بەڕێز مام جەلالى حەکیم و ئەندازیارى ئاشتى دا، ئەندام و لایەنگرانى یەکێتى لە دەروازەى پێنجوێنەوە بەزنجیرە وەستا بوون، بەشێوەیەک نە ئەندام و لایەنگرانى پارتى و نەبنەماڵەى بارزانیش بیریان لەوەها پێشهاتێک نەدەکردەوە. دیمەنە تراژیدیەکانى شۆڕشى نوێ (ى.ن.ک)ش چەندان چیرۆکى سەرنج ڕاکێشى تێدایە، ئەمانە و سەدان تابلۆى لەم شێوەیە هەمووى خۆشەویستى جەماوەرى کوردە بۆ سەرۆک و بەرپرسەکانى، لەلایەکى تریش کورد هێندە تینوى دەوڵەت و دەسەڵاتدارى بووە، لەمێژووى کورد دا ڕووى نەداوە لەنێو نەتەوەى کوردا لەهیچ سەردەمێکدا، کورد لە سەرۆک و دەسەڵاتى خۆى ڕاپەڕى بێت، بەسەرکردە ستەمکار و چاوچنۆکەکانیشەوە، کورد ڕەخنە و گازەندەکەى هێندە گەورە بووبێت، میرنشین یا دەسەڵاتى خۆماڵى کوردى ڕووخاندبێت، ئەدى چۆنە ئەمڕۆ خەڵکى کورد ئەوەندە لەسەرۆک و بەرپرسەکانى نیگەرانە و سەرۆک و بەرپرسەکانیش هێندە بێ خەم و نەکاران، گوێ بەنیگەرانیەکانى نەتەوەکەیان نادەن، ئایا ئەم هەموو دڵسۆزى و لەخۆبووردووییەى جەماوەرى کورد بۆ سەرۆک و بەپرسەکان بۆ ئەوە ناشێت بەخشش و پاداشتێکى هەبێت. سەرۆک و بەرپرسەکان دەبێ ئەوە بزانن جەماوەرەکەیان ئەوەندە نیگەرانە هیچ دوورنیە بەردەوامى ئەم دۆخە تووشى کارى هەڵەیان بکات، پێویستە بەدەنگیانەوە بێن و گوێ لەداواکانیان بگرن، واز لەناکۆکى و ململانێ بێنن، سوپاى بێگانە بکەنە دەرەوە و دەستى بێگانە لەم وڵاتە ببڕن، خوێندن گەشە پێ بدەن و وڵات پێش بخەن، موڵک و ماڵى خۆیان بفرۆشن هەتا مووچە و پێداویستى جەماوەر دابین بکەن، هەروەکو ئەو وەزیرە بیانیەى ماوەیەک لەمەوبەر ئەوەى کرد، گەورەترین شەرمەزاریە بۆ سەرۆک و بەپرسەکانى هەرێم و دەسەڵاتى کوردى ئەمڕۆ خۆى بخاتە ئەو بوارەوە، ئەوان یەکەم سەرۆک و بەرپرس بن جەماوەرى کوردستان لەجیاتى پاراستنیان هێندە لێیان نیگەران بن، لەدژیان ڕاپەڕن، یان هەرنەبێت هاوکارى دوژمنەکانیان بکەن بۆ ڕووخاندنیان، ئایا سەرکردەکانى کورد خۆیان شەرمەزارى مێژوو دەکەن؟!.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies