عەبدولڕەحمان عەلی ڕەزا: یەک ڕیزی و گشت زیزی کوجامەرحەبا.

یەکڕیزی ئەو وشەی کەلەزۆر کات و ساتێکدا بەکاردەهێنرێت و خەریکە دەبێتە چەمکێکی باو، ناشرین و سواوی ڕۆژ، وتەنانەت ڕەزاقورسی نێوکۆمەڵگەش، وشەکە هێندە بەکاردەهێنرێت خەریکە دەبێتە گاڵتەجاڕی ئاوایی و مەملەکەتیش، بەتایبەت لای هەندێ کەس و حیزبی سیاسی کەهەرگیز لەگەڵ واتای وشەکەشدا نەدەگونجێ و نەیەکانگیریشدەبێتەوە، و ئەسڵەن لە وشەکەش نەگەیشتوە.
ئاخەر دەبێت خەڵکانێک باسی یەک ڕیزی بکەن کەلانی کەم خۆیان ماوەیەک لەڕیزێکی ڕێکدا بوبێتن و ڕۆڵێکیان لەیەکڕیزی و کۆدەنگیدا هەبوبێت نەک هەمیشە پێیەکیان لەمڕیزو پێیەکی دیکەشیان لەڕیزێکی تردا بێت، تەنانەت هەندێ کەس هێندە بەوشەی (ڕیز)ەکەش قەڵس و پەستن حەزناکەن سەیری یاری سێ ڕیزکێنەیش بکەن، دیارە نەک لەبەر نەزانینی یارییەکە بەڵکو لەبەربونی وشەی ڕیز لەناوی یاریەکە، لەو لاشەوە دێت و لاف و گەزافی یەکڕیزی و یەکگرتوویی بەسەرماندا لێدەدات.
باشە حیزبێکی سیاسی گشت حیزبەکانی تری زیزکردبێت و هەرخۆی بەچۆپی کێشی ڕیزی پێشەوەی هەڵپەڕکێکەبزانێ و زۆرجاریش گاوانیش بەوانیتر ڕەوا نەبینێ، ئەی بەچ پێوەرو پێودانگێک داوای یەکڕیزی وتەبایی دەکات.
حیزبێکی تری سیاسی خۆی نەتوانێت نیمچە یەکڕیزیش لەنێو خۆیدا بەرجەستە بکات و هەرجارەو ڕیزێک لێی دەبێتەوەوجێی دەهێڵێ چەند ڕوویەکی پتەووپۆڵاینی دەوێ باسی یەکڕیزی و کۆکردنەوە هەموان بکات لەژێرچەترێکدا.
کێشەی هەرەگەورەی ئەم هەرێمە ئەوەیە هەرکاتێک وشەیەک زۆرباسکراو بەکارهێنرا ئەوکات دەزانیت و بۆت دەردەکەوێت کە جگەلە سوککردن و بێ بەهاکردنی واتا ڕاستەقینەکەی هیچی دیکەنیە، بۆنمونە چەندین ساڵە باس لەچاکسازی دەکرێت کەچی باڵانسی گەندەڵی لەفول نزیکبۆتەوە، باسی شەفافیەت دەکرێت پێچەوانەکەی دەبینرێت، باسی سەروەری یاساو مافی مرۆڤ دەکرێت سەیردەکەی نەک هەریاسا پێشێلدەکرێ بەڵکو شوێنی دەرچونی یاساکەش دەرگاکەی بەساڵان کڵۆم دەدرێ و، مرۆڤەکانی ناویشی کەرامەتیان تێکدەشکێنرێت، کەچی لەوەڵامی ڕاپۆرتەنێودەوڵەتیەکانیشدا بێشەرمانە بێیتەدەنگ و بڵێی یاساسەروەرەو مافی مرۆڤیش لەمەملەکەت و هەرێمە گشتگیرو بەرقەرارترە لەدونیای دەرەوە .
27 ساڵە لەم هەرێمەدا کە تەنها دووبست و قولانجێکەو هێندەی شارەدێیەکی وڵاتێکی وەک چین خەڵکی تێدا دەژی. سەیر دەکەم و دیقەتم داوە بۆ یەکجاریش نەمبینیوە ئەم دەسەڵاتدارانەی کورد لەکارێکی گشتی و قازانج نەویستدا کەبەرژەوەندی باڵای میللەتی تێدا بێت یەک ڕیزوتەبابوبێتن، بەپێچەوانەوە هەمیشە لەژێرفشاری وڵاتانی هەرێمی و نێودەوڵەتی و زلهێزەکاندا سازشیان کردوەو یاخودپێیانکراوە .
بەفشار شەڕیان وەستاند، بەفشار ئاشتییانکرد، بەفشار هەڵبژاردنیانکردوبەفشار و…. هتد.
دەزانیت چارەکە سەدەیەک پێش ئێستا خەڵکی ئەم مەملەکەتەی خۆمان لەگەڵ ئەوەی ژێردەستەش بوە بەڵام تەباتر، تۆکمەتر، یەکگرتووتر، یەکڕیزترو دەست لەملانترو چەندین (تر)ی تێدازیاتر بەرجەستە بوو، بەڵام ئێستا لەسایەی دەسەڵاتی کوردی و حوکمی خۆماڵیدا ئەمانەو چەندین چەمکی تریش بەرەوماڵئاوایی یەکجاری دەچن.
جاری جاران لەبۆنەو شایی و لۆغانەکاندا زۆرجار یەکڕیزیمان لەڕیزی هەڵپەڕکێیەکدا بەدیدەکرد، بەڵام لەئێستادا ئەوانەشیان نەهێشتوەو گەر (25)کەس لەبۆنەیەکدا هەڵپەڕن بەپێنج ڕیزو ریتمی جیاواز شایی و لۆغانی خۆیان دەکەن هەریەک بەئاڕاستەیەکی جوداو ئاوازێکی تێکدراویش.
یەک ڕیزی بەقسەی زل و بریقەدارنابێت، بەدروشم و دروشمبازی نایەتەدی، بەمەرجیش ناسەپێنرێت، هەڕەشەو گوڕەشەش ماڵی کورد لاوازو پەرتەوازەتر دەکات. بەڵکو یەکڕیزی پێویستی بەیاسا سەروەری، ئیرادە، پلان، لەخۆبوردەیی، و متمانەوڕێزلێگرتنە.
ئاخەر لەکوێی دونیا هەبوە تۆ مافی بخۆیت، ڕێگری لێ بکەیت، هێڵی سوری بۆدیاری بکەی، قوتی ببڕیت، بیخنکێنی، بیکوژی، بێ دەنگی کەی، دەنگی ببەی، پەلاماریشیدەی کەچی بڵێی بۆ یەکڕیزنیت لەگەڵمدا.
کەی ڕەوایە لەناوەوە ئێسکت بهاڕێت کەچی داوای تەبایی و یەکڕیزی دەرەوەت لێ بکات، لەدەرگاوە دەرتکردوە بشتەوێت لەپەنجەرەو کڵاوڕۆژنەوە بێتەوەخزمەتت، ئومێدت تێدا نەهێشتوە کەچی پێی بڵێ ژیان بەهیواوە جوانە، هەرچی دەرگایە لێت قەپاتکردوە بێیت و باسی کۆبونەوەو کردنەوەی دەلاقەی پەیوەندی نوێی لێبکەی، یان تۆبچیت دەست ودەم وشان و ملی جبەو عەبابەسەرەکان تێر تێر ماچکەیت و بیکڕێنیتەوە لەو بەغدایەی خۆتان وتەنی دەتانویست تەڵاقی بدەن، بەڵام بەلوتبەرزی و شەرمەوە بچیتە لای هاوزمان و هاوشاری و هاونەتەوەکانی خۆت لەهەرێمدا، کەئایندەتان بەباش و خراپەوە هەریەک دەبێت.
بۆیە هەتا عەقڵیەتی حیزبی کوردی و بەرپرسە نابەرپرسەکانی بەوشێوەبێت، و هەتا مرۆڤگەلێکیش لەبنەڕەتەوە بڕیاریاندابێت و خۆیان ساخکردبێتەوە کەژیان بەکۆیلەیەتی و خۆچەماوەیی بەسەربەرن و بیگوزەرێنن، وەهەندێکیش حەساسیەتیان بەیەکڕیزی هەبێت و قازانجیان لەپەرتەوازەیی و ماڵی شێواوی کوردا بێت، ئیتر یەکڕیزی جگە لە باڵۆنێکی پڕ درۆی ڕەنگاو ڕەنگ و کریستاڵی هیچی دیکەنیەونابێت.
تۆ گشت خەڵک، گشت حیزب، گشت ڕێکخراو، گشت چین و توێژێک، گشت و دەیان گشتی تریشت بەسەروبەرەوە عاجزو زیزکردوە، ئیتر پێم ناڵێیت بەچ ڕوویەکی قایمەوە داوای یەکڕیزی تەبایی دەکەیت.
کەواتە ئەو هەموو خاڵەناکۆک و ئاڵۆزییە هەمەچەشنانەی لەنێوحیزب و خەڵکیداهەن و بەرەو زیدەتریش هەڵدەکشێن دەمانگەیەنێتە ئەو بڕوایەی متمانە بەتەڵاقەکەی بارام بەگ بکەین کەچەندین ساڵ لەمەوبەر وتویەتی ( کورد بخەرە نێو سندوقی ساردییەوه لەوێش نازانێت و ناتوانێت بەڕیزبوەستێت )و یەکڕیزبێت.
بۆیەلەم دۆخەی ئێستای هەرێم کەپڕیەتی لە غەوغاوفەوزاو بێ متمانەیی و بێ هەستکردن بەبەرپرسیارێتی و ئێسک شکاندنی یەکدی، وە دەرنەکەوتن و هەڵنەهاتنی ئاسۆیەکی ڕوون و گەش لەئایندەیەکی نزیکدا هێندە بەسە کەبڵێین یەک ڕیزی و گشت زیزی لەئێستادا و لەم هەرێمە جەنجاڵەدا کوجا مەرحەبا، وەچەمکەکانی یەکڕیزی و یەکگرتویی و تەبایی و کۆدەنگیش لەئێستای هەرێم و پارتەسیاسیەکانی ناوی هیچ محەلێکیان لەئیعرابدا نیە.

ببن بە هاوڕێمان لە نوێترین بەشماندا لە فەیسبوک

وتاری کورد، ڕۆژنامەیەکی ئەلکترۆنی ئەهلی سەربەخۆ و ئازادە


This will close in 30 seconds