نەوزادى موهەندیس: خەونەکانمان بۆ ساڵى 2021 ى سەدەى 21 چۆن و چى بن؟

ئاشکرایە گوزەرکردن و تێپەڕینى هەر ڕۆژ و مانگ و ساڵێک لە تەمەنى مرۆڤەکان خۆیان کەمدەبێتەوە و هەنگاوێک زیاتر نزیک دەبنەوە لە مردن و بەجێهێشتنى ئەم جیهانەى کە هەموان دڵیان زۆر پێى خۆشە و هەوڵ و ماندوبونى زۆر دەدەن بۆ گەیشتن بە خواست و ئاوات و خەونەکانیان، بەڵام زۆرینەى هەرە زۆریان ناتوانن لانى کەمى خەون و ئاواتەکانیان وەدیبێنن و ئەو کەمینەیەشى کە چانسى سەرکەوتن و مانەوە و دەوڵەمەندبونیان پێبڕاوە بەهۆى بوونى ئەو زۆرینە هەژار و خەمبار و بێئومێدەى لە چواردەوریانن، ناتوانن وەک پێویست خۆشى لەو سەروەت و سامان و خوداپێداویەى خۆیان ببینن، بەتایبەتیش ئەوانەیان کە کەمێک ویژدانیان بە زیندوویى ماوەتەوە یان هەستێکى مرۆڤانەیان لە دەرووندا هەیە. بۆیە بەگشتى هەردوولاى هاوکێشەکە بەئومێد و بێئومێدەکان و بە هەژار و خوداپێداوەکان هیچ کامیان ئەوەى کە دڵخوازى خۆیانە بەخۆشى بیگوزەرێنن بۆیان نایەتە دى.
هەربۆیە ئەم جیهان و بونەى کە تیایداین وەک دەڵێن وێسگەیەکى ڕاگوزەر و کاتی و کورتە و بەشى ئەو هەموو ململانێ و خەم و پەژارە و هەڵپەکردن و شەڕ و جەنگ و کوشت و کوشتار و ناعەدالەتیە ناکات کە مرۆڤەکان بە هۆکار و بەبێ هۆکاریش بەرامبەر یەکدى ئەنجامیدەدەن، بۆیە گەرەکە هەموان تەواوى هەوڵیان بۆ ئەوە بێت کەمێک خۆشى و پشوو و ئارامى دەروونى بەدەستبێنن نەک تەنها هەڵپەى کۆکردنەوەى سەروەت و سامانیان بێت. چونکە تەنها ئەوەى مرۆڤەکان بەبێ جیاوازى دڵخۆش دەکات و هەموانیش بەدوایدا وێڵن بەڕێگا و شێوازى جیاواز تەنها و تەنها بریتیە لە ئارامى دەروون و تەندروستى باش و ساغ و سەلامەتى جەستە و دەروونەکان ،بەتایبەتیش لەم قۆناغ و سەردەم و ساڵانەى پەتاى کرۆنادا کە هەموو جیهان و هەموو وڵات و کۆمەڵگا مرۆڤایەتیەکانى بەگەورەو و بچوکەوە بەهەژار و خوداپێداوەوە گیرۆدە کردوە تائێستا زیاد لە 108ملیۆن کەس توشبوە و نزیکەى 2.5 ملیۆن کەسیشى لەناوبردوە و هەموان تەنها هەناسەیەکى پاک و دەرونێکى ئارام و جەستەیەکى ساغڵەمیان گەرەکە و زۆرێک لە خوداپێداوەکان ئامادەن هەموو سامانەکەیان بدەن لە پێناو ڕزگارکردنى خۆیان یان تەنها لەپێناو هەڵمژینى چەند چرکەیەک لە هەناسەیەکى ئارام و خاوێندا، بەڵام چنگیان ناکەوێت و بەبێ ئومێدى ئەم دونیایە بەجێدێڵن و هەموو سەروەت و سامانەکەیان کە تەواوى ژیانیان بۆ کۆکردنەوەى تەرخانیان کردبوو بە ڕەوایى یان ناڕەوایى دادیان نادات، هەربۆیە گەرەکە پەندێک لەم قۆناغەى مرۆڤایەتى وەربگرین کە زۆر سادەیە و بریتیە لە هەوڵدان بۆ وەدەستهێنانى دەرونێکى ئارام و تەندروستیەکى باش، نەک ژمارە گەورە و قەبەکانى حسابە بانکیەکان و سەروەت سامان کۆکردنەوەکان.
بۆیە ئەم ساڵى 2021 و لەم سەدەى 21مەدا گەر بەڕێکى و جوانى ناوەکەیدا بێت ئەبێت ئومێد بەخش بێت بەتایبەتیش دواى ساڵى 2020 کۆرۆناوى دێت، هەرچەندە زۆربەى جاران مێژوو ڕێکەوت و هەڵکەوتە جوانەکان لەناخ و ناوەڕۆکیاندا کۆمەڵگەلێک کارەساتى دڵتەزێن و بۆنەى ناوخۆش و کارەساتباراویان لەگەڵ خۆیان هەڵگرتوە. بەڵام وەک دەوترێت هەموو کات ئومێد و تێڕوانین و بیرۆکە باشەکان و گەشاوەکان بەختى باش دێنن، هەربۆیە ئاوات دەخوازین کە ساڵى 2021 ساڵێکى پڕ خێر و بەرەکەت و تەندروستى باش و ساڵى ئارامى دڵ ودەرونەکان بێت و دوور بێت لە برسێتى و قاتوقڕى و ناعەدالەتى لە جیهاندا و ساڵى گۆڕان و وەرچەرخانى باشیش بێت بۆ کوردو و کوردستان.
کە هەمیشە لەم وەرزى بەهار و سەرەتاى ساڵى نوێى کوردى 2721دا وێکدێتەوە، بەهیواى ئەوەى کە 21 ئازار کەسەرەتاى ساڵى نوێى کوردیشە و ئاگر و مەشخەڵى نەورۆزى کوردانى تیادا دادەگیرسێت، ساڵى 2021ى سەدەى 21 بۆ کوردان ساڵ و قۆناغ و سەردەمى نوێگەرایى بێت لەسەرجەم بوارەکاندا و هەرێم و وڵات و کۆمەڵگایەکى خۆشگوزەران پێکەوەبنێین لەسایەى سەروەرى یاسا و دادگەرى و یەکسانى و ئازادى کامڵبوودا و دووربکەوینەوە لە جوانکردن و نمایشکردنى ساختەکارانەى دەسەڵات و حوکمڕانیەکەمان و بەزۆر سەپاندنى مەیل و خواستى کەمینەى دەسەڵاتدار بۆ ئەوەى ئەزمونى حوکمڕانى 30 ساڵەمان بەهەدەر نەدەین و خوێن و فرمێسکە بێنازو ڕژاوەکانیش ڕسواى مێژوونەکەین و نەوەکانى ئایندەش بێ ئومێد ڕێگەیان پیشان نەدەین.
ڕەنگە هەموو ئەم خواست و ئاواتانە تەنها لەچوارچێوەى خەونێکى وەدینەهاتوودا بمێننەوە گەر دەسەڵاتدارانى ئەم هەرێمە لەگەڵ ڕەوتى سروشتى گەشەکردنى کۆمەڵگا و گۆڕانکاریەکانى سەردەمدا هەنگاو نەنێن و نەتوانن خۆیان بگونجێنن و بەتەواوى قەناعەتیشیانەوە بڕوا بە دابینکردن و فەراهەمکردنى ئازادى و نان و خۆشگوزەرانى تاک و کۆمەڵگا نەهێنن و دوورنەکەونەوە لە پەرستنى کورسى دەسەڵات و دەستهەڵنەگرن لە بەرژەوەندى خۆیان و پشتکردنە زۆرینەى جەماوەرى گەلەکەمان.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies