دکتۆر کەمال میراودەلی : حەز .

 

حەزم دەکرد ئەو قەندە بم
چا تاڵەکەت شیرین دەکات
کڵۆ کلۆ
لە ناو دەمتا بتوێتەوە

حەزم دەکرد
ئەو قاوە بم
لە سەر لوتکەی خەمبارییتا
لە هاودەمیی تەنیاییتا
قوم لە دوای قوم
بیخۆیتەوە

حەزم دەکرد
ئەو بایە بم
قژی خاوت شانە دەکات
لە باوەشتا
بشنێتەوە

حەزم دەکرد
ئەو دەفتەرە بم
هۆنراوەکانتی تیا دەنووسی
بە درێژایی تەمەنت
لە بەر دەستتا
بـمێنێتەوە

حەزم دەکرد
ئەو خەونە بم
کە هەموو شەوێ دەیبینی
هەموو شەو
بتبینێتەوە

حەزم دەکرد
هەناسەت بم
تا دوا خورپە لەگەلتابێت
لە دڵتا سەر بنێتەوە

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies