Qasimlo

شەریف هەژاریی : بۆ قاسملوو  ـ وێنات ناێتەوە !

شەوی یەڵدای ساڵیادی قاسملوو

هەرکاتێ ، ڕێبەرێکی کورد یا بیانیی ، دوازدە زمانی زیندووی جیهانیی زانی ! ڕەنگە تۆ وێنا بکرێیتەوە !

هەرکاتێ ، ڕێبەرێکی کورد پەنجا ساڵ خەباتی پڕ – هەورازی دی و ، بە هیچ خیانەتێکی نەتەوەییەوە نەگلا ، پێ دەچێ تۆ وێنا بکرێیتەوە !

هەرکاتێ ، ڕێبەرێکی کورد لە نیو سەدە تێکۆشانی پڕ بەریەککەوتن دا ، ووشەی نەشیاوی کۆمەڵایەتی بەکارنەهێنا ، وێنات بەرچاو دەکەوێتەوە !

هەرکاتێ ، ڕێبەرێکی کورد تێزێکی وەک  ‘ سۆسیالیزمی دیموکراتیک ‘ ی بۆ سیستمی دەوڵەتداری لە جیهان دا داهێنا ، لەوانەیە وێنای تۆ بەدی بێتەوە !

هەرکاتێ ، ڕێبەرێکی کورد لەو پەڕی دەسەڵاتی تاقانەیدا ، هەڵواسینی وێنەکانیی و دروشمی بژی سەرۆک  ‘ قاسملوو ‘ ی یاساغ کرد ، لە وێنای تۆ دەبینینەوە !

هەر کاتێ ڕێبەرێکی کورد لە زانابوونیەوە هاتە ناو کۆڕی خەبات و ، توانا مەعریفییەکانی شکۆی بە پۆست و حیزبەکەی و بە جیهانیکردنی نەتەوەکەی بەخشی ، ڕەنگە تۆ وێنا بکرێیتەوە !

هەرکاتێ ، جوانیی و جوامێریی لە کوردستانی ڕەنگین دا بوونی نەما – تۆش بیر دەچیەوە !!

تۆ بێ   هاوتاترین و پاکژترین حەقیقەتی ناو مێژووی کوردیت !

تۆ ! کانییەکی پاکژیت ، کە لە بیابانیی کوردە خۆخۆرەکاندا هەڵقووڵاویت !! ئەندێشەکانت تا  ئەبەد نەمامی شۆڕشی یەکسانیی ، ئاو دەدا .

کردەوەکانی تۆ و سەرکردەکانی کورد دوو دونیای زۆر جیاوازن . دونیای تۆ : هەرگیز خیانەت نەکردن لە نەتەوەکەت – هەرگیز جنێو نەدان – یاساغ کردنی شاباش هەڵدان بەسەر سەرکردەدا و – خولقاندنی گوتاری بە کۆمەڵ !! دونیای سەرکردەکانی کورد : بەئاسانیی تێوەگلان بە خیانەتی نەتەوەیی لە پێناو پۆستا ، جنێوفرۆشیی ، ناوچەخوازی ، خودپەرستیی و کەیف و سەفا کردن بە شاباش هەڵدان بەسەریاندا !

تا ژیان بەردەوام بێ ، ئەندێشەکانت : شۆڕشێکی یەکسانین . شۆڕشن دژ بە : هزری تەنگەتلیەی بە خێڵەکی کردنی ئۆرگان و حیزب – بە ناوچەییکردنی حیزب – بە خوداکردنی مرۆڤی سەرکردە و ، هێنانەدی دادوەریی کۆمەڵایەتیی و شکۆ گەڕاندنەوە بۆ تاکەکانی نەتەوەکەت !

تۆ ! کانییەکی پاکژیت ، کە لە دەیمترین بیابانا هەڵقوڵاویت !! ئەندێشەکانت تا ئەبەد نەمامی شۆڕشی یەکسانیی ، ئاو دەدا .

هەژاریی ئێستا بە ڕامان لە هزر و ئەندێشەکانت ، بە ڕۆچوون لە ناو کردارەکانت ! سەرم لەوە سوڕماوە : کە تۆ کورد بوویت ! کورد گەلێکی خێڵەکیی خۆخۆری بێگانەپەرست ! کورد تۆ ناناسن تا ئەو دەمەی هوشیار ئەبنەوە – بێ گومان سەدەیەکی تر نەوەکانی داهاتوو ئەزانن تۆ کێ بوویت !!

ئەزانی دایکی نیشتیمان لەگەڵ هەر گەلاوێژێکی خۆرهەڵاتن دا بۆت ئەگری  ؟ چوون ئێستاش جەستەی پڕ شکۆت بە باوەشی دایکی نیشتیمان غەریبە ! لە غەریبیش جەستەت هەر سیمبوولی مەزنترینە – چوون مەنزڵگای مرۆڤە مەزنەکانی جیهان تۆی لە باوەش گرتووە !  بەڵام دایکی نیشتیمان تاڕۆژی ئازادی دەگری و داخ ئەخوا ، تا ئەوکاتەی بە ئامێزی شاد ئەبییەوە و لە باوەشی خۆیدا دەتلاوێنێتەوە .

هەژاریی : هەر ئەوەنەی هەبوو بۆ قاسملوو .

 

 بەکلیکێک لەسەر سمبولەکانی خوارەوە ، ئەم بابەتە دەگات بە هاوڕێکانت

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies