نەوزادى موهەندیس: حکومەتى هەرێم لە دووڕییانێکى چارەنوسسازدایە!

بەداخەوە حکومەتى هەرێمى کوردستان و بەتایبەتیش ئەم کابینەی نۆهەمە،لە دۆخێکى سیاسى و ئابورى و ئەمنى و تەندروستى و… هتد. زۆر خراپدایە لە ئەنجامى کەڵەکەبوونى کێشە و گرفتەکانى 17 ساڵى ڕابووردووى لەگەڵ دەوڵەتى عێراق و لەلایەکى تریشەوە بەهۆى ململانێ سیاسى و حیزبیە تەسک و بێزراوەکانى ناو هەرێمى کوردستان و بەتایبەتیش لە نێوان هەر سێ لایەنى پێکهێنەرى ئەم کابینەیەدا کە بریتین لەهەریەکە لە (پارتى و یەکێتى و گۆڕان). بۆیە ئەم هۆکارانە کاریگەریەکى توند و خرپیان کردۆتە سەر ئەدا و کارنامە و ئیشوکارەکانى حکومەت و هێندەى تر لاواز و بێزراویشى کردوە لەبەردەم حکومەتى بەغداد و شەقامى کوردیشدا کە چارەنوسەکەى وەک دەڵێن کەوتۆتە سەر دەستى عفریت.و لە ئان و ساتدایە بۆ هەڵوەشاندنەوە و ڕووخان و پێشبینى دەکرێت کە نەتوانێت تەمەنى ئاسایى خۆى کە 4 ساڵە تەواو بکات بەهۆى:
* نەبوونى متمانەى تەواو لە نێوان هەرسێ لایەنەکەدا بەیەکترى.
* جێبەجێنەکردنى ڕێکەوتنە سیاسیەکانى نێوانیان وەکو خۆى.
* جیاوازى لە بیروبۆچوون و بەرنامەیاندا بۆ ئیدارەدانى حکومەت و چۆنێتى حوکمڕانى و چارەسەرى قەیرانەکان.
* هەستکردن بۆ خۆسەپاندنى بڕیار و هەژموونى لایەنێکى سەرەکى حکومەت بەسەر ڕێڕەو و سیاسەتى گشتى حکومەتدا.
* بۆیە لە ئێستادا حکومەتى هەرێم کەوتۆتە سەر دوو ڕییانێکى چارەنوسساز،بەوەى یان دەبێت دەسبکاتە پڕۆسەیەکى چاکسازى بێکەموکوڕى و چاوپۆشى نەکات لەهیچ کەس و لایەنێکى گەندەڵکار و بکەوێتە خۆ بۆ کۆکردنەوەى تەواوى داهاتەکانى لە گەنجینەى حکومەت و بە شەفافانە مامەڵەى لەگەڵدا بکات و خەرجیەکانیش ڕوون و ئاشکرا بێت. و هەرچى کردوە سەرچاوەى داهاتەکانى حکومەت کە بریتین لە نەوت و گومرگ و باج و ڕسوماتە ناوخۆییەکان کۆنتڕۆڵى تەواویان بکات و چاکسازیش لە ئۆرگانەکانیدا بکات. بۆئەوەى بتوانێت مانگانە مووچەى فەرمانبەران بدات و پڕۆژە خزمەتگوزاریەکان پێشکەش بکات و وڵاتیش ئاوەدان بکاتەوە و بازاڕ و ئابوریش ببوژێنێتەوە.
یان دەبێت حکومەتى هەرێم نەتوانین و بێتوانایى خۆى ڕابگەیەنێت لە چارەسەرى قەیرانەکە و حکومەت هەڵبوەشێتەوە و کاربکرێت بۆ هەڵبژاردنى پێشوەختە.
کە هەردوو بژاردەکە ئاسان نین، بەڵام دەکرێت هەنگاویان بۆ بنرێت بەتایبەتى لە بوارى چاکسازى و شەفافیەتى داهات و خەرجیەکان و ڕێکخستنەوەى مووچە و بودجەى ساڵانە ئەویش بە ڕێکەوتن دەبێت لەگەڵ بەغدادا، ( دوور لە موزایەدەى سیاسى بەسەر یەکتردا و فرۆشتنەوەى کوردایەتیش بە یەکترى)، چونکە تا ئەوکاتەى هەرێم بەشێک بێت لە دەوڵەتى عێراقى فیدڕاڵ، هەم ئەرکى لە ئەستۆدایە و هەم مافیشى هەیە، بۆیە دەبێت لەلایەک ئەرکە یاسایى و دەستوریەکانى جێبەجێبکات و لەولاشەوە مکوڕبێت لەسەر داواکارى و ماف و شایستە دارایی و سیاسى و ئەمنى و خاکەکەیدا لەبەرامبەر دەوڵەتى عێراقدا. چونکە هەر بەغداد قوڵایى پەیوەندى و ڕێکەوتنەکانى هەرێمە نەک ئەنقەرە و تاران و دیمەشق و پایتەختەکانى تر.بۆیە گەرەکە حکومەتى هەرێم بۆ بەردەوامبوونى تەمەن و مانى ئەم قەوارە سیاسیە دەستوریەى هەرێم هەرچى دەکرێت و دەتوانرێت بەدەستبهێنرێت هەنگاوى جدى بۆ بنێت و خەمسارد و بێ خەم نەبێت، چونکە شەقامى کوردى لە ئێستادا زۆر توڕە و زویر و ناڕازیە لەم حکومەتە بەتایبەتیش کاتێک هەنگاوەکانى مستەفا کازمى دەبینێت لە عێراقدا بە ئاڕاستەى خزمەتکردنى هاوڵاتیان و نەهێشتنى گەندەڵى و بچووکردنەوەى ڕۆڵى سەرکردە و حیزب و میلیشیا چەکدارەکان و قۆرخکارى و ..هتد. بۆیە حکومەتى هەرێمى کوردستان و ئەم کابینەیە تەنها و تەنها بە گرتنە بەرى سیاسەتى شەفافیەت لەهەموو کەرت و بوارەکاندا و بە ڕۆنانەوە و بوژانەوەى متمانەى جەماوەر بەکار و کردەوەکانى دەتوانێت خۆى دەرباز بکات لە توڕەیى شەقام و هاوڵاتیان، جا ئەو وتە عەرەبیە کە دەڵێت ( اژا ێلح القائد،فلن یجرا احد على الفساد) زۆر پڕ مانایە بۆ ئەم دۆخ و ساتە هەستیار و مەترسیدارەى حکومەتى هەرێمى کوردستان.

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies