كەمال محەمەد: یەكێتی و نوێبونەوە لەچیدا ؟

ئەو ریفۆرمە سیاسی و كۆمەڵایەتی و ئیدارییەی كە یەكێتی لە كۆنگرە جەختی لەسەر ئەكردەوە و مەبەستیان بوو پرەنسیبی سودگەرایی وەك پێوەرێك بۆ بەهای گشتی جێگیر بكەن و زۆرترین بڕی بەختەوەری بۆ زۆرترین كەس دەستەبەر بكەن و بەرژەوەندی گشتی لەبەرچاو بگرن و كار بۆ بەرژەوەندی تایبەتی هەندێك لە هەڤاڵانی خۆیان نەكەن لێرەو لەوێ وادەرنەچوو، یەكێتی ئەو هێزەی كە ڕای وابو جیاوازی نێوان ئەندامانی كۆمەڵگا نەهێڵێت یاخود كەمی بكاتەوە و بەپێچەوانەی ئەو حیزبەوە بێت كە خۆیان ئاماژەیان پێ داوەو كە گەندەڵی و جیاوازی گەورەی سامان و موڵكایەتی لەنێوان خودی ئەندامەكانیشیان هەیە.
یەكێتی ئەو هێزەی كەكۆنگرەی كۆتایی بە تەبەنیكردنی بیروبۆچونی نوێ و كارپێكردنی لەسیاسەت و ئابوری و كۆمەڵایەتی و ئیدارەدان كردبوە چارەسەری كێشەكانی لەنێوخۆو دەرەوەی حیزبەكەش، ئەم ریفۆرمە لەشێوەدا وایكردبو كە ئەم هێزە پەلە لە چاكسازی كردنی سیستەمە سیاسییەكەی بكرێت، ئەم بیرە لە نوێبونەوەدا وای لە هەموان كردبو چ لەنێوخۆ و چ لە دەرەوش یەكێتییەك ببینن كە تەواو جیاوازی هەبێت لەوەی كە لە رابردوەوە نەیتوانیوە ئەوەی كە لە پرەنسیبەكانی دەیخواست كە چەمكی حەقیقەتی سیاسی و كۆمەڵایەتی و ئیداریی گۆڕانی بەسەردا بێت بەپێی سەردەم.
یەكێك لەو پرانسیبە سەرەكییانەی كە كۆمەڵگایەكی تەندروست بنیاد ئەنێت ئاشتی و ئازادییە، چونكە هەر ئازادییە كە سەرچاوەی سەرەكییە كە مرۆڤ ئەگەیەنێتە مەعریفەیەك كە هەست بە رێز و شكۆی خۆی بكات و لەوروەشەوەیە كە ئەڵێن كۆمەڵگا لێرەوە ئەگاتە بەختەوەری، بۆیە ئەگەر ئاشتی و ئازادی بەدیكرا ئەوا كۆمەڵگایەكی لیبڕاڵی بنیاد ئەنرێت و بەدواشیدا دامودەزگاكانی حكومەت بەجۆرێك پێكدێن كە دەستەبەرو پارێزەری ئەو ئارامی و ئازادییە بێت بۆ هەموان.
یەكێتی ئەگەر مەبەستێتی نوێ ببێتەوە پێویستە لەڕێی برەودان بە ئەزمون و مومارەسەری كەسانی نوێ و خاوەن بیرو فیكری سیاسی نوێ و توێژی ڕۆشنبیرانەوە لە شوێنێكی وا دایان بنێت كە ببنە سەرپەرشتیاری سەرەكی و راستەقینە لەناو حیزب و جومگە حكومڕانییەكاندا و ڕێگەنەدات دەستنیشانكردنی كەسانی پلەدار بۆ كەسانی نەزان جێبهێڵدرێت و جەهل نەزانینیش بەسەر مەعریفەو شارەزاییدا زاڵ بێت لەبەرئەوەیە كە دەیڵێین كە ئەرك بدرێتە دەست چینێكی ئۆرۆستۆكراتی كە خاوەنی زانست و مەعریفە بن.
یەكێتی ئەو هێزەی لەڕیزی پێشەوەو هاوبەشی مەسەلە سیاسی و ستراتیژییەكان بوە، چونكە بەپێی دەسەڵات و پێگە جوگرافییەكەی هەر گەشەیەك یان سستییەك لەكایەی سیاسی و كۆمەڵایەتی و ئیداری و ئابوری ئەم. ناوچەیە ڕویدابێت هێزی یەكەمە لەبەرپرسیارێتیدا، ئەو پرەنسیبە سیاسی و ئایدۆلۆژییەی لەسەروەختی دروست بونی ئەم هێزەوە وەك تیۆریایەك دائەنران لەزۆر روەوە لەگەڵ واقعی دوای ڕاپەرین یەكنایە، وەئەمەش بەهۆی هەندێك خاوەن كارەكتەری سیاسی و بەرپرسی نێوخۆی حیزبەكەوە كە تەنها چنینەوەی بەروبومی ئەو بەرهەمەی بەری رەنجی شەهیدان و هاوكارانی شۆڕشە خەمێتی و خەمێكی دیكەی نییە، ئێستای یەكێتی پێویستی بە ژێراوژوركردنی ئەو سیستەم و دەستانەیە كە لە هەناوی یەكێتیدا هەڵگری ئەو بیرو كارانەن كە تیاچون و لاوازی یەكێتی ئامانجیانە!
تائێستا بەرەوپێشچون و پەرەسەندن نەبۆتە مایەی زاڵبونی ئەو نوێبونەوەی كە هاوسەرۆكانی یەكێتی لە كۆنگرەی حیزبەكەیان ئاماژەیان پێ ئەدا، چونكە نەیانتوانیوە هەمو كارێك قەدەغە بكەن و یاسای پاداشت و سزا بەهەند وەربگرن و هاوڵاتیانیش لە زوڵم و زۆری حكومەتەكەیان و كەسانی بەرپرسی نێو حزبەكەی خۆشیان بپارێزن تا ئەو كات ئێمەو هەموانیش یەكێتییەك ببینن لە نوێ نوێبونەوەیەكی تەواو جیاوازدا.

 

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies