سەربەست فەتاح: تێکچوونی تەونی کۆمەڵایەتی لە نێوان باڵا پۆشی و بۆتۆکس و نمایشە جەستەییەکانی شاشەی تیڤیەکان.

سەرەتا بۆ تێگەیشتن و خوێندنەوە لەسەر کەسێتی مرۆڤی کورد ئەبێ ئەوە بزانین کە کار و ئەرکێکی زۆر وورد و گرانە، پێویستت بە سەدان بەدوادا چوونی مەیدانی و نوسین و کۆکراوە بیانیەکان ھەیە تا بگەیتە ئەنجامێک لوغزی تێڕوانین و ھەڵسەنگاندنەکانت سەبارەت وەک ئەڵێن بەم مەخلوقی خوایە دەست نیشان بکەیت.

لێرەدا ھەوڵ ئەدەم بەکورتی سەرنج و بۆچوونێک کە باوەڕی خۆمن، بخەمەڕوو.
بۆ ئەمەش بەگەڕانەوەیەکی خێرا بەڕووداوەکانی چەند سەدەی ڕابردوو و ھاتنی ئاینی ئیسلام و دواتر پەلھاویشتنی و فراوانخوازی لە دوورگەی عەربیەوە بۆ ناوچەکە، گەلی کورد تا ڕادەی قڕکردن و ھەڕەشەی لەناو چوون بەرگری لە بوونی خۆی کردووە مێژووی ھاتن و داگیرکاریەکان لە گێڕانەوە ئیسلامیەکان و بەڵگە مێژوویەکانیش ئەو ڕاستیانە ئەسەلمێنن. ئاینی ئیسلام بۆ نەتەوەی عەرەب کاریگەری نەبوو لەسەر شکاندنی شکۆی کەسێتیان، چونکە ھەڵقوڵاوی ناو نەتەوەیی خۆیان بوو، بەڵام بەداگیرکردن و دەست بەسەراگرتنی سەرزەمینی کورد وەک نەتەوە و بەزاڵبوون و سەلبکردنی مافەکانی نەتەوەیی لەکەسایەتی کورددا، توانی ڕەگی خۆی داکوتێ، تاڕادەیەکی زۆریش وابەستەی کردن بەکەلتووری عەربی و بیابانی ئەو سەردەمە.!!
ئەمە ئەو سەرتایەیە کە شکۆی کەسێتی تاکی کوردی تیادا شکا، بەتێپەڕبوونی سەردەم و سەدەکان و گۆڕانکاریە جوگرافی و گەشەکردنە کۆمەڵایەتیەکانی کۆمەڵگە جیاوازەکان و ھاتنە کایەی جەنگە باوچەیی و جیھانیەکان و بەرژەوەندیە ئابووری و مرۆیەکان گەلی کورد نەیتوانی کەسێتیەکی نەتەوەییانەی تەندرووست و خاوەن خود لەخۆیا بەرجەستە بکاتەوە لەچوارچێوەی خێڵ و عەشیرەتگەرایی و پاشکۆیەتیدا بەردەوام ئەمبەر و ئەوبەری پێکراوە نەیتوانی ببێتە گەلێکی خاوەن یەک گووتار، لایەنی کەم ئەگەر تەنھا بگەڕێینەوە بۆ سەدەیەک پێش ئێستاو لە دوای جەنگی جیھانی یەکەمەوە، ھەژموونی عەشیرەت بازی و ئیسلامگەرایی و ھاڕینی لەنێوان بەرداشی ڕۆم و عەجەم، عوسمانی و سەفەوی، بلۆکی شەرق و غەرب، ئەمڕۆش لەنێوان ئیسلامی و عەلمانی بەداخەوە بوینەتە ئەو مەخسەرەیەی کە دواکەوتوو ترین کۆمەڵگا ئیرەیمان پێنابات.

بۆتۆکس و نمایشە جەستەیی شاشەی تیڤیەکان:
تەنھا خاڵێكی ئەرێنی کە گەلی کوردستان شانازی پێوە بکات توانیویەتی بەھۆی قوربانیدانی بەشێک لە مرۆڤەکانیەوە پارێزگار لە بوون مانەوەی خۆی بکات لە ڕێگای شۆڕش و یاخیبوونیەوە لەدەسەڵاتە داگیرکەرەکانی نیشتمانەکەی. بەڵام حەیف سەد مەخابن ئەم شۆڕش و دەسەڵاتانە ھەرگیز نەیانتوانیوە ببنە چەتر و بەدیھێنەری ئامانجە پیرۆزەکانی، ھۆکارە ھەرە سەرەکیەکەش بەدەر لەھەر پیلان و نەخشەیەکی دوژمن…، ڕابەرانی کورد خۆیان بوون « ئەمەیان بابەتێکی ترە و پێویستی بە خوێندنەوەی زیاتر ھەیە». ھەر بۆیە ئەوەی ئەمڕۆ ئەگوزەرێ دەسەڵات بەبەرنامەو بۆ مەشغوڵکردنی خەڵک و درێژکردنەوەی دەسەڵاتە خۆسەپێنەکەیتی، بۆ ھەڵوەشانەوەی خێزان و کۆمەڵگایە، ئاشی دەسەڵات بەمە ئەگەڕێ.. بۆشاییەکی درووستکردووە بەشێوەیەک تەونی کۆمەڵایەتی تێکداوە کە ڕێکخستەوە و ڕاستکردنەوەی شۆڕشێکی ئەوێت.!؟؟
ئەوەی ئەمڕۆ ئەو دەسەڵاتە بەناوی عەلمانیەت و دیموکراسیەوە دەرخواردی کۆمەڵگاکەی ئەدات ئەگەر زیاتر نەبێت لە تاریکستانی داعش و داعشیەکان ھیچی کەمتر نیە و بگرە بەشێکە لە ھۆکاری ھاتنەکایەشیان.

باڵا پۆشی و تێکچونی تەونی کۆمەڵایەتی:
وەک سەرتا باسم کرد لە ھاتنی ئاینی ئیسلام و داگیرکاری کوردستان و گۆڕانکاریەکان، کەسێتی تاکی کورد چی بەسەرھاتووە. نەمن وە نەکەس و لایەنێکیش ھەیە کەبتوانێ بەرگی ئیسلام بوون لە زۆرینەی موسڵمانانی ئەمڕۆی کۆمەڵگای کوردی دابماڵن و بسەننەوە، نەبۆچوون و نەبابەتەکەشمان بەزەبری زۆر لێسەندنەوەی ئاینی ئیسلام نیە..، پرسیار ئەوەیە ئایا ئەو نمایشی باڵا پۆشی و بەڕیکلامکردنی ئەم ھەژموونی ئیسلامگەراییە ئەچێتە خزمەتی نیشتمانی و نەتەوەییمان ؟؟ یان دیسانەوە ئەمیش ئەبێتە ئەو بیانوو و فەراغەی کە ئەچێتە خزمەت ئەجێندا و پیلانی دەسەڵاتداران لەلایەک ، سەرنج و ھەڵوەستەی ھێزە ئیقلیمی و جیھانیەکان لەلایەکی ترەوە ؟؟.
مەخابن ئەوە ھەزار و چوارسەد ساڵ زیاترە زۆرینەی گەلی کورد بەقورسی کۆڵی ئیسلامی لەخۆناوە، کەچی زۆرینەی زۆری دەووڵەتە ئیسلامیەکان و ئیسلامەکان مافی بوونی وەک گەلێکی خاوەن ماف و نیشتمانی خۆی نەک ھەر پێڕەوا نابینن بەڵکو لەژێر ناوی ئایەتی قورئان و لە مزگەوت و حەوزەی دینی و فەتوا بەدەستەکانی فەتوای قەتڵی عامی بۆ دەرئەکەن.
بەشێکی تری ئەم نمایشە ئەچێتە خزمەتی برەودان بەو ئەجێندا و بەرەڵاخانەیەی دەسەڵات کەبەناوی ئازادی لەلایەک و شکست بە پڕۆژەی ئیسلامگەرایی داعشی لەلایەکی ترەوە تەمەنی خۆی پێدرێژ ئەکاتەوە لای کۆمەڵگای نێودەوڵەتی و ھێزە بڕیار بەدەستەکانی ناوچەکە.
« لەکاتێکدا من ئەم چەند دێڕە ئەنووسم دەووڵەتی داگیرکەری تورک و ئەردۆگانی زاڵم کە خۆی بە خەلیفەی ئیسلام ناساندووە لە باکور و ڕۆژئاوا و باشوری کوردستان بەدڕەندەترین شێوە لە ھەوڵی سڕینەوەی ناسنامەو کلتور و سرووشتی کوردستاندا دەستبەکارە و جیھانی ئیسلامیش پشتیوان و دەستخۆشانەی لێ
ئەکەن».

چارەسەر:
پێش ھەموو شتێک پێویستمان بەوەیە ھەموو ھەوڵەکان بەجۆرێک بێت کە گەلەکەمان بەرەو ئەو ئاڕاستەیە ببەین کە شکۆ و ئیرادە و متمانە بەخۆ بوون سەرچاوەی ھزری مرۆڤەکانی بێت.
دواجار لەسایەی حکومەت و دەسەڵاتێکی ڕەشیددا.. دین و دەووڵەت ھەریەکە لەشوێن و پێگەی خۆیەوە بەگوێرەی بەرژەوەندیە باڵاکانی گەلەکەمان جوڵەو نمایشەکانی بەرجەستە بکات، بەڕەچاوکردنی گۆڕانکاری و کرانەوە جیھانیەکان بە جۆرێک، نەجەستە ڕووت و دەسکاری کراوەکان…. نە باڵا پۆش و داپۆشراوەکان، ببنە ئەودووانەیەی کە دەرخواردمان ئەدرێت، بەھەردووکیانەوە بوونەتە مایەی تێکدانی تەونی کۆمەڵایەتی و وێرانکردنی کەلتووری ڕەسەنی کوردیمان.

بەسوپاسەوە وێنەکان وەرگیراوە

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies