ھوشیار ئەحمەدی: لە یادی دوکتۆر قاسملوودا.

بۆچی ھەزارانی وەک من ھۆگری حیزب و رێبازەکەی بوون؟
_ ئەو خۆی بە رێبەر دەرنەئەخست، بەڵکوو ئەوە خەڵک بوون کە وەک رێبەر سەێری دکتۆر قاسملویان ئەکرد.
_ ئەو خۆی بە خاوەن رێباز و رێچکە نەئەناساند، بەڵکوو ئەوە ھاوڕێیانی رێبازەکەی بوون کە ئەویان بە رەچەشکێن، رێبەر، رێکخەر، پێشڕەو، پێشەنگ و سەرقافڵە ئەزانی.
_ ئەو خۆی وەک بەڕێوەبەر (مودیر) نەئەناساند، بەڵکوو وەک ھاوڕێ، ھاوکار، ھاوسەنگەر، ھاوڕێباز لەگەڵ ھاوڕێیانی کاری ئەکرد، بەڵام ئەوە ھاوکاران و ھاوڕێیانی بوون کە ئەویان بە بەڕێوەبەر ئەزانی و پێڕەوییان لێ ئەکرد.
_ ئەو خۆی بە مامۆستا نەئەناساند، بەڵکوو ھاوڕێیان و ھاوسەنگەرانی بوون کە لە ئاستی ئەو خۆیان تا ئێستاش پێ قوتابی و ئەویان پێ مامۆستا بوو. ھەتا ئێستاش شوێنکەوتەی رێباز و بیروباوڕەکانی، بە شانازییەوە خۆ وەک قوتابی و رێبواری رێگا و رێبازەکەی ئەناسێنن. ئەو فێرگەیەی ئەو وانە کادریی لێ ئەوتەوە، پڕی زانکۆدیتوو بوو لە ئەفەسەری کاڵجی ئەفسەرییەوە تا، قازی دادگا، مامۆستای قوتابخانە، مامۆستای زانکۆ و…،. گشتیان بە حەز و باوڕەوە لە پۆلەکانی دائەنیشتن.
_ لە بابەتی بەڕێوەبەری دا خاڵێ ھەس کە ئێژێ بەڕێوەبەری سەرکەوتوو و بەتوانا ئەو کەسەیە کە لەگەڵ دەوروبەرەکەیا کارەکان بەڕێوە ئەبا، نەک خۆی وەک بەڕێوەبەر بەسەریانا فەرز بکات و تەنیا فەرمان دەربکات و چاوەڕوانیی پێڕەویی پڕمتمانەی ژێردەستانی(لەم حاڵەتا بەژێردەست چاولێکردن دەبێ نەک بە ھاوکار زانین) بێ. بەڵام ئەو ئەو پەڕی ھەوڵ ئەدا کە بەڕێوەبەری و رێبەریی بەکۆمەڵ لە حیزبەکەیا جێگیر بکات و مەودای نێوان رێبەرایەتی و کادر و پێشمەرگە و خەڵک کەم بکاتەوە، بەو چەشنەش ھاوڕێیانی وەک ھاوکار دێنێتە ھەژمار نەک وەک بەردەست. د.قاسملو لەو شێوازە بەڕێوەبەرییە بۆ رێبەریی حیزب و کارەکانی کەڵکی وەرئەگرت.
_ ئەو تەنیا جلی خاکیی نەئەپۆشی، بەڵکو وەک رێبەر، مرۆڤێکی خاکی و خاکەڕا بوو. بە چەشنێ کە ھەتا مابوو بە حەزەوە لەگەڵ ھاوڕێ د.شەرەفکەندی دەچوونە ھۆڵی خواردنی گشتیی پێشمەرگەکان و پێشمەرگانە، خوانچەیەکیان ئەگرتەدەستەوە و لە ناو ریزی چاوەڕوانیا ژەمەخواردنا ئەوەستان. ھەتا ئەوانیش مابوون، ئەو کولتورە ھەر ھەبوو و ئەوەش بەتایبەت وا دانرابوو کە لە ریزەکانی شۆڕشا مەودا نەکەوێتە نێوان کادر و پێشمەرگە و رێبەر و بەڕێوەبەر و بەرپرسانیان.
ئەو ھەوڵی ئەدا لەگەڵ کادر و پێشمەرگە ھەتا گەڕەلاوژە(خولە گۆرانیی مەجلێسانە) تێکەڵ بێ و بەم چەشنەش گەرمی، تێکەڵاوی، ھۆگری و متمانە و نزیکییەکی تایبەتی لە نێوان خۆی و کادر و پێشمەرگە و ھاوسەنگەرانیا پێکھێنابوو.
_ ئەم نمونە سادانە و سەدان و ھەزاران نمونەی دیکە، ویڕای وانە، وتار، تێڕوانین و ھەڵویست و ھەڵوەستەکانی، د.قاسملویان کردبووە رێبەرێکی خەڵکی، مودیرێکی کارلێھاتوو و بەبڕشت، پێشمەرگەیەکی خۆشەویست و لەبەردڵان و خەباتکارێکی شێلگیر و پێشەنگ.
ئەمانەش وەک ئاوێنەیەکی باڵانوێن لە دوکتۆر قاسملوو، ھەتا ئێستاش قوتابی بۆ قوتابخانەکەی، رێبوار بۆ رێبازەکەی ، کادر و پێشمەرگە بۆ حیزبەکەی و خەباتکار بۆ ئامانجە نەتەوەییەکانی رەکێشی مەیدانی خەباتی نەتەوەیی، دیمۆکراتی ئەکات.
سڵاو لە گیان و یادی ھەرگیز نەمری د.قاسملوو و سەرجەم کاروانی شەھیدانی کوردستان.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies