شـــوان خــورشـــــید: بۆ کورد بە هیچ ناگات؟.

گەلی کورد سەرەڕای ئەوەی وەک نەتەوە، هەموو مەرجەکانی سەربەخۆ بونی هەیەو، خاوەنی تایبەتمەندی خۆیەتی و گەلێکی مەزن و خاکێکی فراوانی لە سەر نەخشەی گۆی زەوی نەخشاندوە، بەڵام دەبینین تا ئێستاشی پێوە بێت، نەیتوانیوە قەوارەیەکی هەبێت لە چوارچێوەی ئەو قەوارەیە،کوردبونی وەک ئەوەی هەیە مومارەسە بکات. ئەگەر لە هۆکاری ئەو نەگەیشتن بە ئامانجە بکۆڵینەوە، ڕاستی ئەوە بزانین ئایا بۆ کورد سەرەڕای خەباتی درێژخایەن و قوربانیدانی زۆرو لەڕادەبەدەر، بۆ بەهیچ نەگەیشتوەو نەیتوانیوە بەسەربەخۆیی بگات، بۆ تاکو ئێستا بەژێر دەستەیی و داگیرکراوی ماوەتەوە؟
ئەگەر ئاوڕێک لە مێژووی دورودرێژی گەلی کورد بدەینەوە،گەر بۆ سەرەتای بزوتنەوەکان بگەڕێینەوە، ڕۆبچینە نێو ئیمارات و میرنشینەکانی کوردەوە، خودی ئیمارات نشینە کوردی و میرنشینەکانی کورد لە کوردستان بە خیانەت لەباربراون و هۆکاری ڕوخان و لەباربردنەکانی خودی کورد بوە. ئیماراتێ لەسەر حیسابی ئیماراتێکی تر یان میرنشینێکی تر دەستیان لە گەڵ دوژمن و داگیرکەرانی کوردستان تێکەڵ کردوەو، دوژمنیان تا بەردەرکەی ژووری نوستن هێناوەو، ئەوەی هەمان بوەو نەمان بوە ڕادەستی داگیرکەرانیان کردوە.کەواتە گەر بۆ مێژووی ئیمارات و میرنشینەکان بگەڕێینەوە،کە سەرەتای جوڵانەوە کوردیەکان بوە بە خیانەت لەبار براون، هەموو خیانەتەکانیش هەر کورد خۆی کردونی زۆر زوو کەوتونەتە نێو داوو و تەڵەی نەیارانی کوردەوەو، دوای لەباربردنی بزوتنەوە کوردیەکان تەڕوو وشکیان پێکەوە سوتاندوە.
ئەگەر ئاوڕێکیش لە گۆڕانکاری و داڕشتنەوەی نەخشە جیهانیەکانیش بدەینەوە، ئەو ڕاستیە دەبینین، هیچ لە پریاسکەی هێزە نەخشە داڕێژەرەکانی جیهان بۆ کوردی تیا نەبوە، ئەگەر بپرسین بۆچی؟، بێ گومان خوێندنەوەی عەقڵی کورد هۆکارێک بوە کە گەلی کورد بۆ قەدەر جێ بهێڵدرێ و هاوکاری نەکرێن لە بنیاتنانی قەوارەیەکی سەربەخۆ، چونکە زلهێزەکانی جیهان زۆر باش کوردو سەرکردایەتی کوردیان شرۆڤە کردوەو ئەو ڕاستیەیان بۆ دەرکەوتوە کە کورد نەک ئەوەی بەرژەوەندی خۆیان پێ ناپاراسترێ جا چ جای پاراستنی بەرژەوەندی ئەوان. بۆیە لەو بابەتەدا هەمیشە پەراوێز خراوین و هۆکاری پەراوێز خستنەکەش کورد خۆی بوە، چونکە ئەوەندەی بە شتی لاوەکیەوە خۆی خەریک کردوە، لە سەر ڕاستی بابەتەکان نەوەستاوە، ئەوەمان بیر نەچێت کوردستان دابەشکراوە، هەر پارچەیەکی لکێنراوەتە سەر دەوڵەتێکی داگیرکەری ناوچەکە، ئەو وڵاتانەی کوردستانیان بەسەردا دابەشکراوە، کوردستان بە بەشێک لە خاکی خۆیان دەزانن و هەر پێشکەوتنێکی کورد لە هەر شۆێنێک بێت بە مەترسی ئاسایشی نەتەوەیی خۆیانی دەزانن،کەواتە سەرجەم داگیرکەرانی کوردستان لەسەر ئەوە کۆکن، دژی کورد دەس بخەنە دەسی یەک سەرەڕای ناکۆکیەکانیان. بەڵام وەک دەبینین بزوتنەوە و حیزبە کوردیەکان دەستیان خستۆتە دەسی داگیرکەران و ئەجندای داگیرکەران جێبەجێ دەکەن، بەپێی بەرژەوەندی ئەوان شۆڕش و بەرنامە و ستراتیژی کوردایەتی ئاراستە دەکەن.کەی لە دونیادا هەبوە دوژمن باری دوژمنەکەی ڕاست بکاتەوە، وەک ئێستای باشوری کوردستان، حکومەتی هەرێم یا باشتر بڵێین دوو حیزبە فەرمانڕەواکەی، ڕێک هەموو پیرۆزیەکانی کوردیان ڕادەستی تورکیاو ئێران کردوەو بە فەرمانی میت و گەرارگا دەجوڵێنەوەو ئەوەی ئەوان بیڵێن ڕەت ناکرێتەوە تەنانەت کار گەیشتۆتە سەر ئەوە، دەس بخەنە نێو ڕایەڵە حیزبیەکانەوەو، لە دەستنیشانکردنی کەسایەتیەکان بێنە ناوەوەو ڤیتۆیان هەبێت، ئێستا وەک ڕۆژی ڕوناک ئەوە بە دی دەکرێت، لە جێی ئەوەی قەوارەی هەرێم ببێتە پشت و پەنای جوڵانەوە کوردیەکان لە باکورو ڕۆژهەڵات و ڕۆژئاوا. دەبینین ڕۆژانە لە جێی داڵدەدان لە پەنای ئەوەی پێی دەڵێن هەرێمی کوردستان، تیرۆر دەکرێن، ڕادەست دەکرێن، ڕێ لە گردبونەوەو خۆپیشاندانیان دەگیرێت، تەنانەت کەوا سوری پێش لەشکری داگیرکەرانیش دەکرێت. ئەی نابینی هەواڵگری داگیرکەران، تەراتێنی شارو گوندو بست بە بستی باشور دەکات، نابینرێ لە قوڵای گوندەکانی گەرمیان ڕاوی شوڕشگێڕانی باکور دەکرێت، تیرۆری کوردانی ڕۆژهەڵات و ڕۆژئاوا دەکرێت، ئەی ئەوە گەر جێبەجێ نەکردنی ئەجندای داگیرکەران نەبێت، سنور چۆن بەڕووی هاوزمان و برای خوێنین دا دادەخرێ، وەک پێشتر ئاماژەم پێدا هەر تروسکاییەک کورد لێی نزیک بێتەوە داگیرکەرانی کوردستان بە مەترسی ئاسایشی نەتەوەیی خۆیانی دەزانن. چۆن دەوڵەتی تورکی لە شەستەکان بانگێشتی سەفیری چیکی کردبوو لەسەر ئەوەی لە پڕاگی پایتەختی چیک هاوڵاتیەکی کورد، تابلۆی کافتریاکەی بە کوردستان داڕشتبوو،حکومەتی تورکیا ئەوەی بە مەترسی لەسەر وڵاتەکەی چواندبوو ناڕەزایی گەیاندبوە دەسەڵاتدارانی پڕاگ، جا ئەمە بیرکردنەوەی وڵاتێکی هاوسێی داگیرکەری کوردستانت بێت پشت بەستن پێی ئەبێ چەنێک جێگای ئومێد بێت، جگە لەوەی ئێستا بە بەهانەی ڕاوەدوونانی پەکەکە هەر ڕۆژەو ناوچەیەکی باشوری کوردستان داگیر بکات و تۆش ڕەوای بە داگیرکردنەکەی بدەیت و هیچ ناڕەزایەتیەکت نەبێت و تاوانباری سەرەکی بە براکەت ببڕی و، هاوکاری سەربازی و هەواڵگری داگیرکەران بکەیت ڕێک وەک سەردەمی میرنشین و ئیماراتە کوردیەکان، چۆن دەکرێت ئومێدێک بەم جوڵانەوانە خۆش بکرێت، کە دەرسیان لە ڕابردوو وەرنەگرتوە لە پێناوی بەرژەوەندی حیزبیان ئامادەن نەیارە حیزبیەکەیان بە خاک و خۆڵەوە ڕادەستی داگیرکەرانی کوردستان بکەن.
کەواتە ئەگەر بۆ ئەو هۆکارە بگەڕێین کە بۆچی کورد لە دێر زەمانەوە تاکو ئێستا، هەر لۆقە دەکات و هەمیشە لە دوای ڕوداوەکانەوە غار دەکات، ئەوە خیانەتەو هەر جوڵانەوەو شۆڕشێکیش بێتە سەر ئەرزی واقیع دروستکراوی دوژمنانە، بونەتە هۆکارێک تامی شۆڕش و کوردایەتی وا کاڵ بکەنەوە،کەس بڕوای پێ نەبێت، چونکە ئەوەی ئەم شۆڕش و جوڵانەوانە کردویانە لە بێ ئەهمیەت کردنی کوردایەتی هیچ کاتێک بە دوژمنان و داگیرکەرانی کوردستان نەکراوە،کارێکیان کردوە هەستی نەتەوایەتیان ئەوەندە بێ ئەرزش کردوە،هیچ کەسێک نەیبێت یان نەیمینێت،خیانەت بە جۆرێک ڕۆ چوەتە قوڵای جوڵانەوە کوردیەکان،تاکی کورد، ئاهـــ بۆ داگیرکەران هەڵکێشێ، نەک ئەوەی کورد حوکمی بکات و ئەزمونی باشوری کوردستان لەکەداری بکات، چونکە گەلی کورد دەریایەک خوێنی بەخشیوەتە ئازادی،کەچی ئێستا لەسەر مێزی داگیرکەرانی کوردستان قوماری پێوە دەکرێت،کەواتە هۆکاری ئەوەی کورد بەهیچ نەگەیشتوەو تا ئێستا بەسەربەخۆیی نەگەیشتوە،خیانەتی کورد خۆیەتی،نەک بەهێزی دوژمنانی ،لەبەر ئەوەی چەندین هەڵی گونجاو بۆ کورد هاتۆتە پێشێ بەڵام نەیانتوانیوە ئیدارەی بدەن و هەستاون گرەویان لەسەر کردوە،وەک گرەوکردن لەسەر کەرکوک و ناوچە جێ ناکۆکەکان و سپاردنی بە مادەی 140ی دەستوری عێراقی و دەسبەرداربونی، چونکە وەک دەبینین دوای سپاردنی ئەو ناوچانە بەو مادە دەستوریە،لە جێی ئەوەی شەڕی دەستوری لەسەر بکرێت لە بەغدا شەڕی پۆست و پارە دەکرێت،شەڕی مل شکاندنی یەک دەکرێت،ئەم حیزب هەوڵی بە ئەرزا دانی ئەو حیزب دەدات،گەر وانیە ئەو مادە دەستوریەی زامنی کەرکوک و ناوچە جێ ناکۆکەکانە لەگەڵ عێراق چی بەسەر هاتوەو بۆ لە کولەکەی تەڕیش دا ناوی ناهێنرێت.

لە گۆگلە بنوسە wtarikurd ڕۆژانە بابەتی نوێ بخوێنەوە. ACEPTAR
Aviso de cookies