عیماد عەلی: تەنها بۆ بەرچاوی دڵسۆزانی کوردستان.
پێش هەموو شتێک لەوە یەکلایی بوومەتەوە کە دەسەڵاتی کوردستان بە سەرجەم حزبەکانیەوە لە دونیایەکدا سیاسەت دەکات و دیفاکتۆی دەسەڵاتی خۆی فەرزکردووە کە برٍوای بەم قسانەم نیە و تا ئێستا جگە لە بەرژەوەندی تەسکی حزبی و هۆز و عەشیرەت و ناوچە و زۆنی خۆی، هیچ لەبەرچاو ناگرێت و کەرٍو لاڵە لە ئاست بیروبۆچون و حیکمەتی سەرجەم دڵسۆزانی ئەم گەلە ستەمدیدەیە. بۆیە ئامانجی ئەم نوسینە تەنها بۆ مێژوو و خستنە بەرچاوی خەڵکە دڵسۆزە بەشخوراو و بەشمەینەت و پەراوێزخراوەکەیە، نەک خۆسەپێنەرانی سەرلوتکەی دەسەڵاتی کوردستان.
ئەوەی زانراوە هەموو دەسەڵاتێکی دڵسۆزی دیموکراسی لە هەموو جیهاندا، لەو ماوەیەی لە دەستورەکەیدا بۆی دیاریکراوە، لە هەرماوەیەکدا بەخۆداچونەوەی جددی بە خۆیدا دەکات و خۆی هەڵدەسەنگێنێت و کێماسی و کەموکورتیەکانی خۆی دیاری دەکات و تا ئەو ئاستەی بە رێژەیەک لە خۆی رازیبێت بەردەوام دەبێت و گۆرٍانکاری دەکات، بەو مەرجەی نەگەیشتبێتە پلەی شکست و زیان گەیاندن بە میلەتەکەی. ئەگەر پێچەوانە بێت، ئەوان پێش ئەوەی میلەت راو بۆچون و هەڵوێستی خۆی دەربرێت، خۆیان بەرکەنار دەکەن و ئەڵتەرناتیڤی ئیجابی و چارەسەری کێشەکان و هەنگاوی بەخۆداچونەوە و گرتنەبەری رێگەی راست هەڵدوەبژێرن و بە سنگفروانیەوە داوای لێبوردن لە گەل و نیشتمانەکەیان دەکەن..
ئەوەی لە کوردستانی لەمەر خۆمان دەیبینین، لە وەزعێکدا دەیگوزەرێنین گەیشتۆتە چڵەپۆپەی شکست و نەزانی و زیانی گەورە تا رادەیەک کە ترس و دڵەرٍاەکێ گەیشتۆتە رادەی لەناوچونی ئەزمونەکە بە یەکجاری و ئەگەری تەفروتونابونمان زۆر لە ئارادایە و بە روون و ئاشکرا دەیبینین و تەنها ئەم دەسەڵاتەی کە ناتوانرێت جگە لە کەمتەرخەمی و نادڵسۆزی و گوێنەدا بە خوێنی خۆبەختکردوان و قوربانیان هیچ ناوێکی تری لێ بنێیت. ئەگینا گەر تەماشای دۆخەکە بە گشتی بکەیت و ئەگەر بەراوردێکی سەرپێیانەی ئەمرۆی هەرێم و ساڵانی پێشووش بکەیت، جگە لە دواکەوتن و خراپبوون و گەیشتن بە رۆخی هەرەسی یەکجاری هیچی تری لێنابینرێت و لەوە خەمەتر هیچ هەوڵێک لە هیچ لایەک لە ئارادا نابینرێت بۆ گرتنەبەری هەنگاوی راستەرٍێکردن.
بۆیە، گەر بڵێین ئەم دەسەڵاتە زادەی ئاستی بیرکردنەوە و رۆشنبیری و تێگەیشتنی ئەم میلەتەیە، بۆیە وا گەیشتۆتەی ئاستێکی وا، ناحەقی دەکەین. بەڵام ئەوەی چاوەرٍوانی دەکرێت و لەم میلەتە بینراوە کە مێژووەکەی دەخوێنیتەوە، لەوە یەکلایی دەبیتەوە کە جامەکە پر بووە و خەریکە لێی دەرژێت و چاوەرٍێی هەنگاوی جدی دەکرێت. بەڵام دڵسۆزان لەوە دەترسن هەموو شتێک لەباربچێت و رەش و سپی تێکەڵ بن و بۆ چەندین ساڵی تر ئەم ژێر دەستەییە بەردەوام بێت و چەندین نەوەی تر بناڵێنن. بۆیە تەنها هەوڵی رزگار بوون لەبەردەستدا دەمێنێتەوە کە ئەویش دیاریکردنی کاتی گونجاوە بۆ تارٍنان و دەرکردن و دادگایی کردنیان. لە بەرامبەردا لای ئەوان، جگە لە وازهێنان خۆقوتارکردن و گرتنەبەری رێگەی راکردن، هیچیان لەبەردەستدا نەماوە و گەندەڵان و خۆسەپێنەران، جگە لە شکست و ملکەچبون و نەفرەت لێکردنیان، هیچی تریان بۆ نەماوەتەوە.
