پێشمه‌رگه‌و قه‌ندیل . سه‌ركه‌وت محمد فتاح ..

نه‌ته‌وه‌ی كورد یه‌كێكه‌ له‌كۆنترین نه‌ته‌وه‌كانی سه‌ر ڕووی زەوی به‌ژماره‌ی دانیشتوانێكی زۆرو به‌ڕووبه‌ری خاكێكی فراوان كه‌تا ئێستا خاوه‌نی هیچ مافێكی سه‌ره‌تایی خۆی نیه‌ .

پێ دەچیت قەدەری کورد بێت ، هەمیشە شاخەسەرکەشەکان بیپاریزن.! ئەگەر ئەم قسەیە بۆ سەدەی ڕابردوو ڕاست ودروستبێت، ئەوا بەپێی هەندێک لە لیدوانی سەرانی کورد قەندیل یش ئەو گرنگیەی جارانی نەماوە! قەندیل لە میژوی خەباتی چەکداری کوردا پێگەیەکی گرنگ وستراتیژی هەبوەو، هەیە. زنجیرە چیای قەندیل جگە لە سەختی وهەڵکەوتەی جوگرافی کە بوەتە سێکوچکەی گرێدانی نیوان سێ بەشی گرنگی کوردستانی گەورە، ئەوا لەڕوی جوانی و سروشتەوە هیندە سەرنج ڕاکێشە ، کە دەبێتە ئیلهامی گیانی بەرگری و،هەستێکی یاخی بونی وا لە مرۆڤ دا دروست دەکات کە سڵ لەهیچ هیزوداگیرکەرێک نەکاتەوە. رەنگە ئەمە سیحری گەورەیی قەندیل بێت . بۆیە ناوبانگی لەخەباتی چەکداری کوردا گرتوه و ‌زۆربه‌ی شۆرشه‌كانی كوردستان بنكه‌ سه‌ره‌تایییه‌كانیان له‌ قه‌ندیله‌وه‌ بووه‌و هه‌ر له‌وێ‌ شه‌وه‌ بانگی سه‌ربه‌ستی و ئازادی و شۆڕش دراوه‌.

ڕژیمی داگیركه‌رانی كوردستان به‌ هیچ جۆرێك چاویان به‌ ئازادی كورد هه‌ڵ نایه‌ت هه‌میشه‌ له‌هه‌وڵدابوون كه‌ڕێگه‌یه‌كی نوێ‌ تر بدۆزنه‌وه‌ بۆ له‌ناو بردن و سه‌ركوت كردنی كورد.

ڕژێمی به‌عسی ڕووخاو هه‌وڵی زۆری دا ، هه‌موو ڕێگاكانی تاقی كرده‌وه‌ ته‌نانه‌ت به‌ چه‌كی قه‌ده‌غه‌ كراوی جیهانیشه‌وه‌، زیاتر له‌ 5 هه‌زار گوندو شارو شارۆچكه‌ی كاول كردوو دانیشتوانه‌كانیشی كوشت و ئه‌نفال كرد،به‌ڵام قه‌ندیل و لوتكه‌ به‌رزه‌كانی كوردستان هه‌ر له‌شوێنی خۆیان مانەوە .. ئێستا ، كه‌ بە ناوبه‌شێكی كوردستان ئازاده‌ ؛ دوژمنانی كورد به‌تایبه‌تی تورك و فارس ئه‌یانه‌وێت ئه‌وه‌ی عه‌ره‌بی به‌عسی شۆڤێنی نه‌ی توانی ته‌واوی بكات ئه مان ببنه‌ میراتگری و ته‌واوكه‌ری بن،ئه‌و چه‌ند گوندەی كه‌ له‌سه‌رده‌می ڕژێمی به‌عسدا ده‌ستیان پێ‌ نه‌گه‌یشت ئه‌مان تۆپ باران و وێرانکاری کەن.

دیاره‌ زۆر شتی شاراوه‌ی تریش هه‌یه‌ له‌پشت ئه‌م هێرشانه‌ی توركیاو ئێرانه‌وه‌ بۆ قه‌ندیل و كوردستانی باشوور هه‌ر له‌ بێ‌ ده‌سه‌ڵاتی حكومه‌تی كوردی و، پشتیوانی ئه‌مریكاو، بێ‌ ده‌نگی عێراق، كه‌ ئه‌مانه‌ هه‌مووی جێگه‌ی پرسیارن؟ .

گەر کەسێک کتیبەکەی شەهید ڕیبازی خوێندنبێتەوە بە ناونیشانی (قەندیل بەغدای هەژاند) ، زیاتر گرنگی قەندیل وشۆرشی بۆ دەردەکەوێت .

خەباتی کورد لە باشوری کوردستان ، دوای زیاتر لە 40 ساڵ خەباتی چەکداری سەرەنجام لە کۆتایی دەیەی سەدەی ڕابردو، لەلایەک بەهۆی خۆراگری پێشمەرگەی کوردو، لە لایەکی ترەوە بەهۆی سەرکێشیەکانی سەدامەوە ، هەلێکی زێرینی بۆ ڕەخسا ، کە توانی لەسەرەتای نەوەدەکانی سەدەی رابردودا بناغەی سیستمی حوکمرانی کوردی دامەزرێنێ . لەسەرەتای سەدەی بیستویەک و بەتایبەتی دوای روخانی دەسەلاتی حیزبی بەعس . ئیتر لەچوارچیوەیەکی دەستوری دا ،هەرێمی کوردستان بوە کیانێکی دانپیادانراو، ئەگەر کورد بتوانێ ناوماڵی خۆی ڕێک بخات، ئەوا دەتوانێت مافە بەدینەهاتوەکانی تریشی بەدەست بینێ.

بۆیە ئێستە هیچ لۆژیکێک لەگەل ئەوە نییە کە باسی خەباتی چەکداری لەم بەشەی کوردستاندا بکرێت. دەبیت کورد هەوڵ بدات بنەماکانی دامەزراندنی دەولەتی کوردی کە خۆی لە هێزیی چەکداری نیشتمانی ، ئابورییەکی پتەو، بوژاندنەوەی ئابوری لادێ وپیشەسازی، دابینکردنی دادپەروەری کۆمەلایەتی دا دەبینێتەوە ، دابین بکات. بەلام ئاخۆئەمانە تائێستە کراون؟ بەدڵنیاییەوە نەخێر.ئەی بۆ؟ ئەوە دەبێت لەسەرانی کورد بپرسین و، ئەم کورتە نوسینەم بۆ بەشی باکوری کوردستانە ، کە سەرانی کورد زۆر بەئاسانی داوای چەک دانان وتەسلیم بونەوەیان لێ دەکەن.! بەکێ بەو دەوڵەتەی کە مستەفا کەمال ئەتاتورک لەسەرخوێن وجەستەی کورد لەسالێ 1923 دەوڵەتی بۆ تورک دامەزراند .!

ماوەیەکە بەڕیزان بارزانی وتاڵەبانی بەگەرمی باس لە وە دەکەن کە خەباتی چەکداری باوی نەماوە روشیان لە پارتی کریکارانی کوردستان (پێ کاکا) پارتی ژیانی کوردستان (پژاک) ە.

هەندێک جار ئامۆژگاری و، ناو بەناویش هەڕەشەیان لێ دەکەن. پێیان دەڵین قەندیل چۆل کەن وبرۆنەوە لە ولاتەکانی خۆتان خەباتی سیاسی وپەرلەمانی بکەن!.

دیارە ئەگەر بەندەش بژارەیەکم بخرێتە بەردەم لە نێوان خەباتی چەکداری توندوتیژو، خەباتی سیاسی وپەرلەمانی مەدەنی دا، بێ دودڵی خەباتی مەدەنی هەلدەبژێرم .

بەلام جیاوازی هەیە لەنێوان چەکدانان ودەستکردن بەخەباتی مەدەنی وتەسلیم بون دا. چەکدانان بێ بونی زەمینە بۆخەباتی سیاسی، بێ ئەلتەرناتیڤ بۆ چۆلکردنی قەندیڵ و دیاریکردنی میکانیزم بۆی . هیچ نییە لەداوی تەسیلم بون زیاتر.هیچ مانایەکی نیە جگە لە شکاندنی ئیرادەی بەرگری پیرۆزو هەماهەنگیکردن لەگەڵ دوژمنان.

هەرکەس ولایەنێکیش بێ خۆشکردنی زەمینەسازی و، بێ خستنەڕوی ئەلتەرناتیڤ داوای چۆلکردنی قەندیل وتەسلیم بونەوەی گەریلابکات ، خزمەت بە بیرۆکەی دوژمن دەکات .!

خۆ ئەگەر لە بەندە بپرسن ئایە جیاوازی هەیە لەنیوان حکومڕانی حیزبی دادوگەشەپیدان و حوکمڕانانی پێشتردا ، بێ دودڵی دەڵێم بەڵی ، بەباری باشەش دا. بەلام ئاخۆ ئەوانەی ئەردۆگان وحیزبەکەی دەیکەن بەسن بۆ ئەوەی بروا بەوە بهێنین و لەسەر سیقەی بەڕیزان تاڵەبانی وبارزانی قەندیل چۆڵبکرێت و گەریلا تەسیلم ببنەوە.!؟

بەداخەوە هەڵسوکەوتی تورکەکان بەسەرۆکایەتی ئەردۆگان، بەتایبەت لەهەلومەرجی ئیستادا ، جێێ بڕواومتمانە نییە. لەسایەی ئەردۆگاندا چەکی کیمایی دژی گەریلاو خەڵکی مەدەنی بەکار دەهێنرێت، وەک ئەوەی سەدام دژ بەباشورکردی! لەسایەی حیزبەکەی ئەردۆگاندا نوێنەرەکانی گەل ، پارلەمانتارانی کورد، سەرۆک شاروەانیەکان ولەیلا زاناکان لە دادگاییەکی بەعسیانەدا ،دادگای دەکرێن، ڕاودەنرێن وبێ ڕیزی بەرامبەریان دەکرێت. ئایە لە هەلومەرجێکی وادا، چ ژیری وسیاسەت زانینێکی تیایە کەداوا لە گەریلا بکرێت قەندیڵ چۆڵکەن؟ هەلومەرجەکە بەپێ چەوانەی بۆچونەکانی سەرانی کوردەوە، خەریکە پێچەوانە دەبێتەوە. لەجیاتی گەریلاکان قەندیل چۆلکەن وبچنەوە بۆشار!! نوێنەرانی کورد شارەکان جێدێڵن ودەچنە قەندیل ولەگەل گەریلا گۆرانی لەقەندیلی سەربەرز دەڵێنەوە. ئۆباڵەکەشی لە ئەستۆی دەوڵەتی تورکە .

لە گۆگلە بنوسە wtarikurd ڕۆژانە بابەتی نوێ بخوێنەوە. ACEPTAR
Aviso de cookies