پەشێو حەمەد ئەمین : هاتنەوەی مەلا کرێکار لەنێوان (وەهم و واقیع ) دا .
دەرزی لە چاوی خەڵکدا مە بینە لە کاتێکدا شوژن لە چاوی خۆتدا بەدی ئەکرێ
ئەم جوملەیە ئاماژەیە بۆ ئەو مرۆڤانەی کرێکار وەك جەللاد دەبینن وخۆشیان وەك فریشتە . لە ڕاستیدا ئەوانە جۆرە مرۆڤێکن لە سایەی کۆت بونیان لە نێو حیزبدا ، لە قوڕی بەردەستی گۆزەگەرێك دەچن گەرگۆزەگەر چۆن بیەوێت ئاوا لە قاڵبیان دەدات و دروستیان ئەکات ، دواتریش بازرگانیان پێوە دەکات .
من نامەوێ بەرگری لە کرێکار بکەم ، چونکە نەپێی سەرسامم و نە جیهاد کارێکی سەلەفیشم بەڵکو ئەوەی مەبەستمە زیاتر وێناکردنی وڵاتێکە ، کە ڕۆژانە بە سەدان جەللاد و دێوەزمەی جەنگ ، بە سەربەستی تیا دێن و ئەڕۆن . کە چی بە تەنها کرێکار بەد ناوە .
لەم وڵاتە بەشێوەیەك وێنای ئەو پیاوە کراوە ، لە ئەگەری هاتنەوەی بۆ نیشتمان وڵات وێران دەبێ وهەموان بە دەستی خۆی سەر دەبڕێت . ئاخرئەوەی کە باس دەکرێ دەجاڵە نە ك کرێکار وە لە قورئانیشدا نەوتراوە دەجاڵ کوردە . من تێ ناگەم کە هێشتا ئیسڕافیل فوی بە نەفغی سوردا نەکردووە ، ئیترهەڵسانی ئەو قیامەتە ی کە باس دەکرێ چ بایەخێکی دەبێ ؟ لە کاتێکدا کرێکار لە نەرویجە نەك وەك دەجاڵ لە خۆراسان .
لە ماوەی ساڵانی ڕابردوودا کوشتو بڕێکی گوماناوی لە گوندی خێڵی حەمەی ناوچەی هەورامان ئەنجامدرا ، ئەم تاوانکاریە دژ بەمرۆڤایاتیە ، لەلایەن ڕاگەیاندنەکانی یەکێتیەوە خرایە ئەستۆی ( انصارالاسلام ) کە مەلاکرێکار ئەمیریان بوو . بەو هۆیەوە زیاترلە ٤١ جار لە دادگای نێودەوڵەتی نەرویجدا بانگهێشت کراوەو ، سەرەنجام تێیدا بێ تاوان دەرچوە و هیچ کەس ولایەنێك نەیتوانیوە ئەوە بسەلمێنێت ، کە مەلاکرێکار دەستی لەو تاوانکاریەدا هەبووە . وە هەر بۆ ئەو مەبەستەش بۆ سەلماندنی بێ تاوانی خۆی چەندین جار داوای کردوە کە بچێتە بەر دەم دادگای لاهای نێودەوڵەتی . بەڵام تاوەکو ئیستا بانگهێشت نەکراوە ، چونکە کەس نەیتوانیوە دەلیلێکی وای هەبێت کە بیسەلمێنێ مەلا کرێکار تیرۆرستەودەستی سورە بە خوێنی قوربانیانی خێڵی حمە .
بەو پێیەی لە ئیستادا یەکێتی نیشتمانی کوردستان زۆر بە توندی دژی هاتنەوەی مەلا کرێکارن . دەمەوێ ئەوەبڵێم ، باوادابێین تەواوی ئەو مرۆڤانەی لە خێڵی حەمەدا تیا چون ئەو کوشتوونی وە بۆ خۆیشی پێ لەو راستیە بنێ .
بەڵام یەکێتی بۆ لەخۆی ناپرسێ کرێکار دەستی زیاتر سورە بە خوێنی کورد یا فڕۆکەوانەکەی هەڵەبجەی کیمیا باران کرد ؟ کە تاوەکو ئیستا زامەکانی ئەوشارە هەرماون وتا دونیاش ماوە مەیسەر نابێ . کەچی ئەوان بە لوتفەوە جەللادەکەیان لە باوەش گرت ودواتریش ئازادیان کرد .
با لەخۆیان بپرسن ئەو شەڕە قۆچەی یەکێتی وپارتی لە شەڕی ناوخۆدا کردیان و بەدرێژایی ٢٠ ساڵ ، کە زیاتر لە 50 هەزار کەس بونە قوربانی لە ژێر سەرکردایەتی ( مامی گەورەو کاکی سەرۆك ) دا ، بەراورد بە کارەساتی خێڵی حەمە کامیان کاریگەرترن ؟ لەوانەیە بڵێن ئەوانە مرۆڤ نەبون ، بۆیە لازم بو لە ناو بچن .
بپرسن کێ بەرپرسە لە زیندانی کردنی ٥ ملیۆن هاوڵاتی ئەم نیشتمانە لە ساڵانی نەوەدەکاندا ، کە هیچ کەس بۆی نەبو لە سلێمانیەوە بچێت بۆ هەولێرو، وە پێچەوانەش سەفەر بکات . بەشێوازێك بوك وزاوا بە قاچاغ لە نێوان ئەو دوشارەدا زەواجیان دەکرد ، ئەم واقیعە کرێکار دروستی کردبو لەم ووڵاتە یا سەرانی یەکێتی و پارتی ؟
هەموو ئەم پرسانە مشتێکن لە خەروانێك ، بۆیە هەر بەڕاستی سەیرە خوێنەوار بیت ولە سەدەی بیست ویەکدا ژیان بکەیت ، کە چی باوەڕدار بیت بەوە ی ئەو هەزاران کرمەی لە لاشەی خۆتدا دێن وئەڕۆن نەیانکوشتوی وناتکوژن ، بەڵام کرمێکی لاوازی بچوك لە دەرەوە دێت وهەموو گیانت ئەخوات .
بە ڕاستی مەهزەلەیە کوشتنی دەیان هەزار کەس کە قاتیل بێ شەرمانە دەڵێ من کوشتومن ، لات کەمتر بێت لە کوشتنی چەند کەسێك ، کە بە هیچ جۆرێك نەسەلمێنراوە .
بۆیە باوەڕ پێ کردن بە وەهمی هاتنەوەی کرێکار قوڕمیش بونی عەقڵی مرۆڤە بەدەستی سەعەتچیەکانی بازاڕی حیزب . بەڵکو ئەوەی خەتەرە بۆ ئاسایشی وڵات سەربەست سوڕانەوەی ئەو هەزاران جەللادەن بە ئازادی دێن وئەڕۆن و ، نەك وەك تیرۆرست وێنا نەکراون بەڵکو پیرۆز کراون وئەشپەرسترێن .
