ئارام هادی: هەڵە ستراتیژیەكانی پارتی ئایندەی هەرێم بەرە و نادیاری دەبات.
لەهەڵەی ڕیفراندۆم ستراتیژیتر، سەرباری هۆشداریەكانی دۆستانی ئەوەبوو پارتی هەوڵی لێكترازانی ناوماڵی شیعەیدا بە ڕێككەوتن لەگەڵ (موقتەدا و حەلبوسی) بۆپێكهێنانی حكومەتی عیراق، لەناوخۆی هەرێمیش پشتی كردە پرۆژە و پێشنیارەكانی یەكێتیی و لایەنەكانیتر بۆ گۆڕینی یاساكانی تایبەت بە هەڵبژاردن، لەوەزارەتی پێشمەرگە فەرزی ئیرادەی بەسەر یەكێتیی خەونی یەكگرتنەوەی هێزەكانی پێشمەرگەی لەگۆڕنا، لەیەك لیستی كورد لەكەركوك ڕایكرد و بەرە و پێكهێنانی لیست لەگەڵ توركمان و عەرەب هەنگاوی نا، بەناوی حكومەتی هەرێمەوە مامەڵەی دوژمنکارانە لەگەڵ سلێمانی دەكات، لەساتەكانی گەیشتن بەڕێككەوتنی (یەكێتیی و پارتی) كەمال كەركوكی و نمونەكانی بەشەكرشكاندنێك ڕیسەكە دەكەنەوە بەخوری!، ئەرێ بەڕاست كەسێك نیە لەناو پارتی بە سەركردایەتیەكەیان بڵێ “وانابێ”؟.
بەردەوامبونی پارتی لەسەر هەڵە ستراتیژییەكانی ئایندەی هەرێم بەرە و نادیاری دەبات، خوێندنەوەی ئەم دۆخەی ئێستا لە ئایندەیەكی نزیكدا قەوارەی هەرێم بەجۆرێك دەخاتە مەترسیەوە تا لێواری لەناوچون دەیبات، وادەكات هەڵبژاردنی پەرلەمانی كوردستان لەساڵی داهاتوش ئەنجام نەدرێت، هەرێمی كوردستان بەرە و دوو ئیدارەیی یان مامەڵەی ڕاستەخۆی پارێزگاكان لەگەڵ ناوەند دەبات، پەیوەندیەكانی هەرێم بەجیهانی دەرەوە و دەروازە سنوری و فرۆكەخانەكان دەخاتە ژێركۆنترۆڵی بەغداد، ڕەنگە كونسوڵخانەكان نوسینگەكانیان لەهەولێر دابخەن، حكومەتی عیراقیش لەڕێگەی دادگای فیدراڵییەوە هێندەیتر فشارەكانی لەسەر هەرێم بەردەوام دەكات، ئەمەش باجی هەڵە ستراتیژییەكانی پارتیە كەهەموومان دەیدەین، لەبری ئەمانەش باشترین ڕێگای چارەسەر ڕێككەوتن و یەكخستنی بۆچونەكان و وەلانانی ناكۆكیەكانی ناوماڵی كوردیە.
كورد لەسەر ئاستی هەرچوار پارچەی كوردستان بەهەڵگیرساندنی سەدان شۆڕش و ملیۆنان قوربانی تاكە دەستكەوتێك كەبەدەستی هێناوە “هەرێمی كوردستانە”، گوناحی هەزاران شەهید و كەمئەندام چیە كە بەخوێنی خۆیان و بەخشینی پارچەیەك لە جەستەیان قەوارەی هەرێمیان دروستكرد، ئێستاش هەڵەكانی پارتی پێگەی قەوارەكەی لاوازكردووە و نزیكی كردۆتەوە لە فەوتان!، بەم حاڵەوە كامە ئامادەكاری و پرۆژەی هاوبەشی كوردە بۆ ڕووبەڕووبونەوەی ئاڵنگاریەكانی بەردەمی؟ هەروەها ستراتیژی كورد بۆ دوای كشانەوەی سەربازی ئەمریكا لە عیراق چیە؟، بەرنامەی كورد بۆ پێشهاتە نوێ یەكان و گۆڕانكاری لەسیستەمە جیهانی و ناوچەییەكە بۆ گۆڕینی هاوكێشەی هێز كامانەن؟، بەم سیاسەتەی پارتی یەكڕیزی و یەكگوتاری كوردی بەرامبەر مەترسیەكان دروستنابن.
