نەوزادى موهەندیس: ئاشتى مرۆڤایەتى کۆدەکاتەوە و جەنگیش پەرتیان دەکات!
کلیک بکەرە سەر وێنەی نوسەر دەگەیت بە ئەرشیڤەکەی
وەک دەوترێت پارێزگاریکردن لە ئاشتى سەختترە لە دروستکردنى، هەربۆیە چەسپاندنى ئاشتى و بەرقەرارکردنى لەنێوان یەک کۆمەڵگا و وڵاتدا، یان لەنێوان دەوروجیراندا و دواتریش تەواوى جیهاندا هەمیشە خواست و ویستى تاک و خێزان و کۆمەڵگە مرۆڤایەتیەکان بوە و هەمیشەش سەرکردە کاریزما و بەتوانا و خەمخۆر و دادپەروەرەکان لەهەوڵى بەرقەرارکردنى ئەو ئاشتیە کۆمەڵایەتیەدا بوون لە نێوان چین و توێژە جیاوازەکان و هەوڵیانداوە کە جیاوازیە نەتەوەیى و ئاینى و مەزهەبى و ناوچەییەکان نەبنە هۆکارى جیاوازى و دڕدۆنگى و لێکترازانى ڕیزەکان و هەڵایسانى جەنگ و ململانێ خوێناوییەکان و براکان و مرۆڤەکان دەستیان نەچێتە خوێنى برا مرۆڤەکانیانەوە و هەمیشە کاریان کردوە کە بنەبڕى چەوساندنەوەى مرۆڤەکان بۆ مرۆڤەکانى تر بکەن. چونکە ئەو سەرکردە و دەسەڵاتدارە ئاشتیخوازانە زۆرباش لە مانا و چەمکى ئاشتى گەیشتوون و زۆر باش زانیویانە تەنها لەسایەى ئاشتى و برایەتى و تەبایى و پێکەوەییدا دەتوانرێت گەشە و پێشکەوتن و خۆشگوزەرانى و دادپەروەریش وەدیبێت و بچەسپێنرێت لە وڵات و کۆمەڵگاکانداو بە پێچەوانەشەوە لەسایەى جەنگ و ململانێ خوێناویەکانیشدا هەمیشە کاولکارى و وێرانى و هەژارى و بێکارى و برسێتى و تاوانەکان زیادەبن و کۆمەڵگا و چین وتوێژەکان و پەیوەندییەکانیان لە گرێژەنە دەچن.
لەگەڵ ئەم هەموو ڕاستیانەشدا، بەڵام جیهان و مرۆڤایەتى و شارستانێتیە جیاوازەکان و قۆناغە جیاوازەکانى ژیان و گوزەران لەسەر ئەم گۆى زەویە دوورنەبوون لە جەنگ و کاولکارى و ململانێ خوێناویەکان و داگیرکارى و کوشتن و بڕینى مرۆڤەکان لەلایەن مرۆڤەکانى ترەوە، هەموو پاڵنەرەکانیش بۆ ئەو جەنگە ناڕەواو و ماڵوێرانەکەرانەش بەدرێژایى مێژوو خواست و ویستە نەرجسیەتەکانى سەرکردە و تاکڕەو و پادشاو و دیکتاتۆرەکان بوە بۆ فراوانبوونى دەسەڵاتەکانیان و تێرکردنى غەریزە خۆویست و خود پەسەندەکانیان و دەستگەیشتنیان بەهەموو خۆشى و پێویستیەکانى ژیانی دونیایان بێئاگا لەوەى کە خۆشى دەروون و ئارامى دڵەکان زۆر گەورەترن لەو خۆشیە کاتیەى کە لەدەستکەوتنى سەروەت و سامان و دەسەڵات وکەڵەکردنیانەوە وەدەستدێن. بەهەمان شێوە بێئاگا لەو ڕاستیەى کە سەرکەوتنە ڕاستەقین و هەمیشەییەکان ئەوانەن کە لە ئاشتیەوە دێن نەک سەرکەوتن لە جەنگەکاندا.
خۆشبەختانە لەم قۆناغ و سەردەمە پێشکەوتوەى جیهان و تەکنەلۆجیا و هۆکارەکانى پەیوەندى و ڕاگەیاندنەکان و سۆشیال میدیادا و جیهانى سەردەمى بەجیهانبووندا مرۆڤایەتى و کۆمەڵگە مرۆڤایەتیەکان پێکەوە کاردەکەن بۆ سەقامگیرکردن و بەرقەرارکردنى ئاشتیەکى ڕاستەقینە لە هەموو کونج و ناوچەیەکى جیهاندا، بەهەمان شێوە ئیڕادە و ویستى کۆمەڵگە مرۆڤایەتیە پێشکەوتوو و دواکەوتوەکانیش لە ڕۆژئاوا و ڕۆژهەڵاتى جیهان لەباشوور و باکورى گۆى زەویشدا ویست و خواستى ئاشتى و ئاشتەوایى و پێکەوە ژیانى مرۆڤەکان بەهێزترن لە هێز و ویستى شەڕەنگێزى و دەنگى تۆپ و فڕۆکە و بۆمب و تانک و کڵاشینکۆفەکان.
مرۆڤایەتى لە ئێستادا پێکەوە دژى جەنگە خوێنازیەکانن و هەموان داواى پاراستنى مافەکانى مرۆڤ و منداڵان و پیر و پەکەوتەکان و دیل و ئاوارەکانى جەنگەکان دەکەن. بۆیە دڵنیام کە هەمیشە ئیڕادەى چەسپاندن و بەرقەراکردنى ئاشتى لەجیهاندا بەسەر خواست و ویستە ناڕەواکانى جەنگ و کوشت و کوشتاردا سەردەکەوێت.
زیندووترین نموونەش هەماهەنگى و یەک ویستى و یەک ئیڕادەیى گەلانى جیهانە بۆ سەپاندنى ئاشتى و ڕاگرتنى جەنگى خوێناویە لە نێوان فەلەستین و ئیسڕائلیدا کە ماوەى نزیکەى 40 ڕۆژى ڕێکە بەردەوامە بەوپەڕى توندوتیژى و بەخوێناویترین شێواز کە زۆرینەى قوربانیانى لە منداڵان و ژنان و بێتاوانەکانى هەردوولایە.
خۆپیشاندانە جەماوەرییە پانوپۆڕ و فراوانەکان لە وڵاتانى بەریتانیا و فەڕەنسا و ئیسپانیا و ئیتالیا و ئەڵمانیا و تەنانەت ئەمریکا و لەناوخودى کۆمەڵگە جولەکەکانیشدا و لەوڵاتانى ئەندەنوسیا و مالیزیا و ئوستوڕالیا و… هتد. مانا و ئاماژەیەکى گرنگن بۆ زیندوو مانەوەى ویژدانى مرۆڤەکان و دەرخەرى ئەو ڕاستیەن کە مرۆڤایەتى لەتەواوى جیهاندا پێکەوە گرێدراون و هەمووان لە ئازار و نەهامەتیەکاندا یەکن و بۆ ئەم سەردەم و قۆناغەش جەنگ و ململانێکان ڕاستەوخۆ، یان ناڕاستەوخۆ کاریگەرى گەورە دەکەنە سەر سیاسەت و ئابورى و کۆمەڵایەتى و ئەمنیەتى هەمووان. بۆیە پێکەوە لەهەوڵى چەسپاندنى ئاشتیەکى هەمیشەیى و ڕاستەقینەدان بۆئەوەى چیدى جەنگ و کاولکاریەکان باڵنەکێشن بەسەر جیهاندا و هەمووان پێکەوە دروشمەکانى سەرکەوێت ئاشتى و نەفرەت لەجەنگ بەدەنگى بەرزدەڵێنەوە.
وەک دەوترێت هەمیشە ئاشتى لەلایەن کەسە ئازاکانەوە دروستدەکرێت و دەشچەسپێنرێت و پارێزگاریشى لێدەکرێت و بەپێچەوانەشەوە کەسە ترسنۆک و بەرژەوەندخواز و نەرجسیەکان پەنا دەبەنە بەر هەڵایسانى جەنگ و کاولکارى بۆ خۆپارێزى و خۆشاردنەوە لە پەناى دیوارە ڕووخاو و لەرزۆک و خەونە زڕەکانیان بە دەستبەسەراگرتنى هەمواندا. خۆشبەختانە لە ئێستاداو لەجیهانى سەردەمدا دەنگى ئاشتى بوێر و فراوانتر و بەهێزترە لەدەنگى شەڕخوازان و شەڕەنگێزەکانیش بۆ هەمیشە ڕسوا و ترسنۆک و نەفرەتلێکراون.
هەر بۆیە گەرەکە لە پێناو پاراستنى مرۆڤایەتى و ئەم شارستانێتیە پێشکەوتوەدا ئاشتیەکى ڕاستەقینە بەرقەراربێت و هەموان پێکەوە ببینە قەڵاو و شوراى پارێزگارى لە ئاشتى جیهانى بەبێ گوێدانە جیاوازیە نەتەوەیى و ئاینى و مەزهەبیەکانى نێوان مرۆڤەکان.
بەڵێ بۆ ئاشتى و نەفرەت لە جەنگ و شەڕ و شەرخوازان لەجیهاندا. جا بۆ چەسپاندنى ئاشتى گەرەکە هەموان ئامادەبین بۆ جەنگ لەو پێناوەدا. چونکە هەمیشە ئاشتى دایکى خۆشگەوزەرانى و پێشکەوتن و گەشەکردن و برایەتى و تەبایى و پێکەوەیى و دادپەروەرى کۆمەڵایەتیە لەنێوان مرۆڤەکاندا. هەمیشەش ئایندەى ژیان و مرۆڤایەتى لەسایەى ئاشتیدا ڕووناکتر و گەشاوەترە و لە سایەى جەنگ و کاولکاریەکاندا تاریک و توون و شەوەزەنگە.
کلیک بکەرە سەر وێنەی نوسەر دەگەیت بە ئەرشیڤەکەی