عوسمان عومەر: خیانەت و مێژوو.

عوسمان عومەر

ئەرک نەبێت، کلیک بکەرە سەر سمبولی فەیسبووک، ئەم بابەتە بنێرە سەر بەشەکەت

ساڵی 1940 کاتێ ئەڵمانەکان فەرەنسایان داگیرکرد و پاریسی پایتەختیان وێران کرد، ماریشال فیلیپ بیتان کەپێشتر سەرۆک وەزیرانی فەرەنسا بوو ھاوکاری ئەڵمانەکان و خیانەتی لەگەل وڵاتەکەی کرد. لە ژەنەراڵ دیگۆل- یان پرسی بۆچی بیتان خیانەتی کرد؟ لەوەڵامدا وتی: چونکە مێژوی فەرەنسای نەخوێندۆتەوە.
خوێندنەوەو تێگەیشتن لەمێژوو، یەکەمین وانەی نیشتمانییە بۆ سەرکردە سیاسییەکان کەھەنگاو و ھەڵوێستیان لەئاست دوژمن و داگیرکەراندا بەرجەستە دەکات.
مێژوی کورد لەلایەک خاڵی نییە لەسەرکردەی دڵسۆزو لەھەمان کاتیشدا پڕە لەخیانەت و نۆکەری بۆ داگیرکەران، ھەرئەو لاپەڕانەی مێژووى سەرکردەو بزوتنەوەو شۆرشەکانى دەخەنە بەردەم ویژدان و دادگای گەل. ئەگەر مێژووی کورد جێی شانازی یان شەرمەزاری بێ، بەڵام ئەو ڕاستییە دووپات دەکاتەوە کە بەدرێژایی مێژوو دەیان و بگرە سەدان ئیمپراتۆرو ھێزی داگیرکەر کوردستانیان خستە ژێر دەسەڵاتی خۆیانەوە سەرەنجام لەژێر ھەر بارودۆخێکدا خۆیان ڕانەگرت و کوردستانیان بۆخاوەنەکەی بەجێ ھێشت.
ئەگەر نۆکەرایەتی بۆ داگیرکەران لە سەدەو ساڵانی ڕابردووی سەرۆک ھۆزو تەنانەت بەناو سەرکردە سیاسییەکان بەخیانەت لەقەڵەم بدرێ ئەی دەبێ لەسەردەمی ئێستادا جاشایەتی بۆ تورک و شەڕی براکان بەچ تاوانێک پۆڵێن بکرێ؟
لەمێژووی ھیچ گەل وڵاتێکدا نەبووە نۆکەرو خیانەتکاران لەسایەی داگیرکەراندا مەرامە سیاسیەکانیان بێننەدی، چارەنوسیان لەبەرامبەر خوداو گەل و مێژوو ڕیسوایی و شەرمەزارییە و پاداشتیان لەلایەن داگیرکەرانەوە لەوکیسە پارەیە زیاتر نابێ کە ناپلیۆن لەڤیەننا لەسەر ئەسپەکەیەوە بۆ نۆکەرەکەی نەمسای فڕێدا.کە ئەڵمانیای نازی شکستی ھێنا دادگا سزای مەرگی بەسەر ماریشال بیتان سەپاند، بەڵام دیگۆل سزاکەی بۆ زیندانی ھەمیشەیی سوککرد ساڵی1955 لەزیندان مرد.
ژه‌نه‌ڕال جیاب ده‌ڵێت: داگیرکه‌ر ده‌به‌نگه‌، به‌ڵام ئه‌وانه‌ی پێشی ده‌که‌ون و هاوکاری ده‌که‌ن ده‌به‌نگترن…

کاتژمێرو ئابڕوو
ئابڕوی خۆتم پێ بده‌ و کاتژمێرێکت پێ ده‌به‌خشم که‌کاتی داگیرکردنت پێشان بدات.
جارێکیان لە فلادیمێر پۆتینیان پرسی که‌ خۆرئاواییه‌کان به‌دیکتاتۆرو هه‌رخه‌ریکی خۆ پڕچه‌ککردن‌ ناو زەدیان دەکرد، ئەویش له‌وه‌ڵام دا ئه‌م چیرۆکه‌ فۆڵکلۆریه‌ کۆنه‌ی ڕووسی گێڕاوەتەوە: خێزانێک هه‌بوون خاوه‌ن کێڵگه‌و باخێکی گه‌وره‌بون، مه‌رو ماڵات و مانگا و ئه‌سپیان تێدا به‌خێو ده‌کرد و، به‌روبومی هه‌مه‌جۆر و گه‌نم و خێروبێرێکی زۆری به‌رهه‌م ده‌هێنا. هه‌هوو هه‌فته‌یه‌ک گه‌وره‌ی خێزانه‌که‌ به‌ربومی ئه‌و ڕه‌زو باخه‌ی کۆده‌کرده‌وه‌ و ده‌یبرده‌ بازارو ساغى دەکردەوە، له‌وسه‌ره‌وه‌ پاره‌یه‌کی باشی ده‌هێنایه‌وه‌ و ته‌نها کورە گەنجە هەرزەکارەکەى بەدیار دایک و خۆشک و مناڵ له‌وێ ده‌مایه‌وه‌ بۆ پاسه‌وانی و گه‌نجه‌که‌ش شاره‌زای به‌کارهێنانی چه‌ک بوو. ڕۆژێک له‌کاتی پاسه‌وانی به‌ناو سنوری کێڵگه‌و باخه‌که‌ ده‌گه‌ڕا چه‌که‌که‌ی به‌شانه‌وه‌ بوو، چه‌ند پیاوێکی ده‌نگ دا و ڕایگرتن له‌دووری خۆی و، به‌قسه‌ی خۆش و شیرین که‌وتنه‌ گفتوگۆ له‌گه‌ڵی و پێیان ڕاگه‌یاند که‌ ئێمه‌ هیچ مه‌به‌ستێکمان نییه‌ ته‌نها بۆکارێکی خێر هاتوین، به‌ڵام له‌ڕاستی دا ئه‌وانه‌ تاقمێ دزو جه‌رده‌ بون و شاره‌زاییان له‌ دزی و تالان و هه‌ڵکوتانه‌ سه‌ربوون.کاتژمێرێکی زۆر جوان و به‌نرخیان پێشان دا و به‌شانوباڵی ئه‌و کاتژمێریان هه‌ڵده‌دا. پاسه‌وانه‌ گه‌نجه‌که‌ حه‌زی چوه‌ کاتژمێره‌که‌ پێی گوتن حه‌زده‌که‌م شتێکی وام هه‌بێ، کاتێ جه‌رده‌و دزه‌کان دڵنیا بون که‌ دڵی پێوه‌یه‌تی ئاره‌زوو ده‌کات خاوه‌نی بێ، که‌وته‌ پرسیارو ئه‌وه‌ نرخی چه‌نده‌؟ جه‌رده‌کان پێیان ڕاگه‌یاند که‌نایفرۆشن پێشنیاریان بۆکرد ئاڵوگۆڕی پێبکه‌ن له‌گه‌ڵ چه‌که‌که‌. ته‌نانه‌ت هێنده‌ی نه‌مابوو ڕه‌زامه‌ندی نیشان بدات، دوای بیرکردنه‌وه‌یه‌کی باش په‌شیمان بۆوه‌ پێی ڕاگه‌یاندن ڕۆژێکی تر وه‌رنه‌وه‌. دزو جه‌رده‌کان که‌زانییان نه‌یانتوانی به‌فێڵ و ته‌ڵه‌که‌ کڵاوبکه‌نه‌ سه‌ر ئه‌وگه‌نجه‌ ڕۆیشتن. که‌ ئێواره‌ باوکی و براکانی گه‌ڕانه‌وه‌ چیرۆکه‌که‌ی بۆ گێڕانه‌وه‌ و باسی به‌نرخی و جوانی کاتژمێره‌که‌ی بۆ باوک و براکانی ده‌کرد، باوکی وتی: زۆر باشه‌ چه‌که‌که‌یان پێ بده‌و کاتژمێره‌که‌ وه‌رگره. به‌ڵام کاتێ هیرش ده‌که‌نه‌ سه‌رت و مه‌رو ماڵات و گاوگۆتاڵ به‌روبومی ڕه‌زوباخه‌که‌ تاڵان ده‌که‌ن و لاقه‌ی دایکت و خوشکت و براکانت ده‌کوژن تۆش له‌و کاته‌ هه‌ر سه‌یری کاتژمێره‌ جوانه‌که‌ بکه‌و بڵێ ئای کاتژمێره‌که‌ چه‌نده‌ به‌نرخ و جوانه‌ کاتژمێر ئه‌وه‌نده‌یه..
کوڕه‌ گه‌نجه‌که‌ له‌مه‌به‌ست گه‌یشت و چه‌که‌که‌ی لا خۆشه‌ویست تر بوو و زانی گه‌مژه‌یی و هه‌ست و سۆز جولاندن، واته‌ مردن و له‌ناوچون به‌ده‌ستی دوژمنان..
ئێستا له‌خۆرئاوا دیموکراتیه‌ت و مافی مرۆڤ و ئازادی وه‌ک له‌ده‌ست کردنى ئه‌و کاتژمیره‌ وایه‌ که‌ خائینان ده‌یانه‌وێ له‌ده‌ستی بکه‌ین تا ئه‌وه‌ی گه‌لان به‌ده‌ستیانه‌وه‌یه‌ له‌چه‌کی به‌رگری و نیشتیمان په‌روه‌ری دایماڵن و یه‌ک ڕیزی گەلان تێک بدەن که‌نایانه‌وێ خاکی نیشتیمان گه‌له‌که‌یان بفرۆشن کەمه‌به‌ستیانه‌ ئاڵ و گۆڕى پێبکەن. هه‌ندێکی دیکه‌ی گێل و گه‌مژه‌ به‌قسه‌و دروشمی باق و بریق و درۆیان هه‌ڵده‌خه‌ڵه‌تێن و باوه‌ڕیان پێده‌که‌ن…
هه‌رگیز خاکی ووڵات مه‌فرۆشن تا کاتژمێرێکی جوانتان هه‌بێ تا کاته‌کانی داگیرکردن و لاقه‌کردنی که‌س و کارتان و به‌تاڵان بردنی سه‌روه‌ت سامانی ووڵاته‌که‌تانی پێ بزانن.
سیخوڕی بۆ دوژمنانی گه‌ل و نیشتیمان مه‌که‌ن و باوه‌ر به‌قسه‌ی دزو تاڵانچی که‌به‌قسه‌ی خۆش و هه‌نگوینی بۆتان ده‌که‌ن باوه‌ڕ مه‌که‌ن، مه‌بنه‌ که‌واسوری به‌رله‌شکری دوژمن.. زۆر به‌داخه‌وه‌ ئێمه‌ی کورد له‌دێر زه‌مانه‌وه‌ به‌فریو و قسه‌ی دوژمنانمان هه‌ڵخه‌ڵه‌تاوین تاڕۆژگاری ئه‌مڕۆش هه‌ر به‌رده‌وامین.