دانا مەنمی: ئازادی و خەم و ترسی کۆمەڵگا.
ئازادی باوكى مافه‌كانه و ستوونێكى سه‌ره‌كیى دیموكراسییه‌ته، دیموكراسى به‌رهه‌مێكه له‌به‌رهه‌مه‌كانى ئه‌م پێویستى و ئه‌م مشتومڕ و ئه‌م ویستى ئازادییه، مرۆڤ هەمیشە خواستى ئه‌وه‌یه كه ئازاد بێت ،چونکە ئازادى مافێکی سروشتی مرۆڤە و هه‌روه‌ك نان و ئاو پێویستییەکی زەرورییە بۆ وجودی ئینسان، بە دریژایی مێژوو هەموو قوتابخانە فیکری و ڕێبازە فەلسەفیەکان و تەنانەت هه‌موو سیستم و به‌رهه‌مه فكرییه‌كانیش هه‌ر له‌م سۆنگه‌یه‌وه سه‌رچاوه ده‌گرن كه چۆن مرۆڤ ئازاد بكه‌ن؟! لەراستیدا مرۆڤ له بنه‌ڕه‌تدا كائینێكى خه‌سڵه‌ت ئازاده و دەبێ ئازاد بژی و دیدو روانینەکانیشی ئازاد بیت و ریز لە دونیای جیاوازییەکانی بگیرێت.
ئازادی لە کوردستاندا پیداویستی ژیانی خەڵکێکە کە دەیان ساڵ لە سایەی سەرکوت وشەڕدا لەگەڵ ڕژێمە یەک لە دوای یەکەکانی عیراقدا ژیاون ، دوای ڕاپەڕین خەڵک خواستی هەبوو لەو ئیمکاناتەی لە کوردستاندا هەیە بەهرەمەند بێت و ژیانێکی ئازادو خۆشگوزەرانی بۆ دابین بکرێت، بەڵام نەبوو ، پارتی و یەکێتی هەر زوو شەڕی ناوخۆیان هەڵگیرساندو زیانی زۆریان بە ژیرخان و سەرخانی کۆمەلگا گەیاند ،هێشتاش کۆمەڵگای کوردی لەناو مۆتیڤێکی زیندووی ئەو شەڕەدایە و هەموو ئەو مۆتیڤ و کەرەستانەی کە شەڕی ناوخۆی (پارتی و یەکێتی ) پێ هەڵگیرسا مۆتیڤ و کەرەستەی زیندوون و رۆژانە درکیان پێدەکەین و دەیانبینین ، پارتی وەک حیزبێکی فەرمانڕەوایی سیاسی کێشەیەکی قوڵی لەگەڵ ئازادی تاک و کۆمەلگادا هەیە و ئەم مافە بۆ خەڵکی کوردستان بەڕەوا نابینن و تادێت هەڕەشەی پارتی بۆ کپکردنی دەنگی ئازاد زەقتر دەردەکەوێت ، ئەم فۆڕمەی کە پارتی و هەندێکجاریش یەکێتی لە قەڵەمڕەوی خۆیدا بۆ کپکردن و سەرکوتکردنی هاوڵاتیان بەکاری دەهێنن فۆڕمێکی تۆتالیتاریزمانەیە کە دواجار ڕووی هیچ لایەک سپی ناکاتەوە.
بەداخەوە نەریتی هێرش و پەلاماردان و کوشتن و زیندانیکردنی ڕۆژنامەنوسان نەریتێکی قێزەونەو یەکێکە لە گرفتە قوڵەکانی بەردەم کۆمەڵگای کوردی ، لەناو ئەم تابلۆیەدا کۆمەڵگای کوردی خەمساردە و خەباتی مەدەنی خەڵک نەگەیشتووەتە ئاستی بەرپرسیارەتی کە کۆت و بەندی سیاسی پارتی و یەکێتی تیک بشکێنێت و ئازادی بە دەست بهێنێت ، گرنگە ئەم کۆمەڵگایە قۆناغی ترس تیپەڕینن کە بە داخەوە لە دەوڵەتەکەی شێخ مەحمودەوە کورد لەناو قەیرانی ترس و ژینگەی رەنگریژکراو بە ترسدا دەژی ، بۆ ئەوەی بژی دەبێ سنورەکانی ترس تیپەرێنیت ،لەناو ئەم گەردونەدا هیچ کۆمەلگایەک نیە کە ترسی هەبێت لە بیرکردنەوە و لە خەمی ئازادی خۆیدا نەبێت ، ئەم کۆمەڵگایە وەکچۆن لە خەم و ترسی سبەینێ دا نیە کە دەبێت لەخەمیدا بن ،بەڵکو ترسیشی لە متمانە بەخشین بە هیزێکی سیاسییە کە لە گۆڕەپانەکەدا تاقینەکراوەتەوەو لەوانەیە ئەم هێزە سیاسییە نوێیە کە ناوی (ئۆپۆزسیۆنە ) بە پلیکانەی دەسەڵاتدا سەرکەوێت خۆی یەکەم کەس بێ کە ئازادییەکان بەرتەسک بکاتەوە و ژیانی خەڵک لە هەژاری و گرانی خراپتردا ڕابگرێت ، نموونەی زیندمان هەیە و هێزێکی سیاسی وەک بزوتنەوەی گۆڕان هێزێکی ناڕازی کە زادەی ناڕەزایەتیەکان بوو تاقیکرایەوە و خەڵک متمانەی پێ بەخشی ، وەلێ ئەم بزوتنەوەیە ئیستا خۆی نوقمی قەیرانە و خاڵییە لە ڕاستگۆیی و پەرۆشی بۆ گەل ونیشتیمان، نائومێدبوونی خەڵک لە بزوتنەوەی گۆڕان دەست شتنە لەھەنگاو نان بەرەو ئایندەیەکی باشتر!
ھەموو گریمانەیەکی دیموکراسی ئەوەیە کە خەڵکی نەلە ترسان و نەلەبرسان و نەلەبەر زۆداری ،بەڵکو لە دڵەوە متمانەی بە حکومەت و حیزبەکان بکات ، بێ ئومێدبوونی خەلک لە پارتی و یەکێتی و بزوتنەوەی گۆڕان و ئیسلامیەکان نەوەی نوێ لێ دروست بوو ، شاسوار عبدالواحید لە دونیای بازرگانی و میدیاوە هاتە نێو دونیای سیاسەت و دەنگی ناڕازی هیزەکانی تری لە هەناوی خۆیدا کۆکردەوە، بەڵام ئیشکالەکە ئەوەیە نەوەی نوێش هەڵگری هەمان توخم ڕەگەزو خەسڵەتە ناشیرینەکانی ( پارتی و یەکێتی و گۆران )ەو زۆر نا دیموکراسیانە پەرچەکرداری ڕوبەڕوبونەوە بۆ لێدان لە ئەندام و لایەنگرو هەڵسوڕاوەکانیان ئەنجام ئەدەن، لە دیدی منەوە کوردستان بەبێ گۆڕینی بونیادی عەقلی ئەم حیزبە کوردییانە پێشناکەوێت و لە دۆخێکی چەفبەستوودا دەمێنێتەوە ، بەڵام گرنگە خودی کۆمەڵگا ئاسه‌واره‌كانى ئەو ئەدەبیاتە لە ناته‌بایی و دووبه‌ره‌كى، لە رق و ناوچه‌گه‌رێتى ، لە خیانه‌ت و پاشقول له یه‌كترگرتن بسڕێتەوە و نەبنە بەشێک لەو سیناریۆ سیاسییە قێزەونە وقووڵكردنه‌وه‌ى زیاترى برین و درز و گرێ ده‌روونییه‌كان و دنه‌دانى سیاسەتی ناتەندروست تا دەگاتە یارى كردن به ژیان و چاره‌نووسی خۆیان و ئەوانیتر به بیانووى جۆراوجۆر.
